ރާއްޖޭގައި ތިބި އިންޑިއާ ސިފައިން އަނބުރާ ގެންގޮސްދެއްވުމަށް އެދި ދިވެހި ސަރުކާރުން ރަސްމީ ގޮތުން އިންޑިއާ ސަރުކާރުގައި އެދިވަޑައިގެންފިއެވެ.
މިކަމަށް އެދިވަޑައިގަތީ ރައީސުލްޖުމްހޫރިއްޔާ ޑރ މުހައްމަދު މުއިއްޒު އާތް ސައިންސެސް މިނިސްޓަރު، ކިރެން ރިޖޫޖޫ އާއެކު މިއަދު ރައީސުލްޖުމްހޫރިއްޔާގެ އޮފީހުގައި ބޭއްވެވި ބައްދަލުކުރެއްވުމުގައި އެވެ.
އެ ބައްދަލުވުގެ އިތުރު ތަފްސީލެއް ރައީސް އޮފީހުން ނުދެ އެވެ.
ރާއްޖޭގައި ތިބި އިންޑިއާ ސިފައިން ބޭލުމަކީ އިންތިހާބީ ރައީސް ޑރ. މުހައްމަދު މުއިއްޒު ރިޔާސީ ވައުދެކެވެ. ވެރިކަމާ ހަވާލުވެވަޑައިގަންނަވާ ފުރަތަމަ ދުވަހުން ފެށިގެން އިންޑިއާ ސިފައިން ރާއްޖެއިން ބޭލުމުގެ މަސައްކަތް ފަށްޓަވާނެ ކަމަށް އެމަނިކުފާނު ތަކުރާރުކޮށް ވިދާޅުވެފައިވެ އެވެ.
އަދި ވެރިކަމުގެ ހުވާ ކުރެއްވުމަށް ފަހު ދެއްވި ފުރަތަމަ ތަގުރީރުގައި ވެސް އެ ވާހަކަތައް ތަކުރާރު ކުރެއްްވި އެވެ. ރައީސް ވިދާޅުވީ ދިވެހި ދައުލަތުގެ މިނިވަންކަމުގެ "ރަތް ރޮނގު" ދަމާނީ ފަލަކޮށް ކަމަށާއި ބޭރުގެ އެއްވެސް ގައުމެއްގެ ސިފައިން ނެތް ފަސްގަނޑަކަށް ހައްދަވާނެ ކަމަށެވެ.
ރާއްޖޭގައި ތިބީ އިންޑިއާ ސިފައިންގެ އަދަދެއް އަދި އެއްވެސް ސަރުކާރަކުން ހާމަކޮށްފަ އެއް ނުވެ އެވެ. ކުރީ ސަރުކާރުން ބުނަމުން ގޮސްފައިވަނީ ރާއްޖޭގައި ތިބީ ހިއުމެނިޓޭރިއަން މަސައްކަތުގައި ހަރަކާތްތެރިވާ ސިފައިންގެ އިތުރުން ރާއްޖޭގައި އޮންނަ ޑޯނިއާ ފުލައިޓާއި ދެ ހެލިކަޕުޓަރު އުދުއްސާ މީހުން ކަމަށެވެ. އަދި އެމީހުން ރާއްޖޭގައި ތިބެނީ ސިފައިންގެ ގޮތުގައި ނޫން ކަމަށް ވެސް ސަރުކާރުން އެތައް ފަހަރެއްގެ މަތިން ބުނެފައިވެ އެވެ.
ނަމަވެސް އިންތިގާލީ މަރުހަލާގައި މުއިއްޒުގެ އޮފީހުން އެދިގެންވެސް ކުރީ ސަރުކާރުން ސިފައިންގެ އަދަދު ހާމަކޮށްފައިނުވާ ކަމަށް އެ އޮފީހުން ވަނީ ބުނެފަ އެވެ.
ރައީސް މުއިއްޒު އިންޑިއާ ސަރުކާރުގައި އެ ގައުމުގެ ސިފައިން އަނބުރާ ގެންގޮސްދޭން ރަސްމީކޮށް އެދިވަޑައިގެންފައިވާއިރު މިއަދު ހަވީރުވެސް ޑޯނިއާ ފުލައިޓުގައި ތ. އަތޮޅު ހޮސްޕިޓަލުން މާލެއަށް ބަލިމީހަކު ވަނީ އުފުލާފަ އެވެ. މި ފްލައިޓާއި ހެލިކަޕުޓަރު ބޭނުންކޮށްގެން ރާއްޖޭގައި ރެސްކިއު ގިނަ އޮޕަރޭޝަންތައް ހިންގަ އެވެ. އަދި ގިނަ އަދަދަކަށް ބަލިމީހުން އުފުލަ އެވެ
