ޕީޕީއެމް/ޕީއެންސީގެ ވެރިކަމެއްގައި ދައުލަތުގެ ބަޖެޓުން ވަކި ޕަސެންޓެއް އަމިއްލަ މީޑިއާތަކަށް ކަނޑައަޅައި، އެ ފައިސާ ހަމަޖައްސައިދޭނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވައުދުވެވަޑައިގެންވި ނަމަވެސް، އަންނަ އަހަރަށް ލަފާކުރާ ދައުލަތުގެ ބަޖެޓުގައި އެ ފައިސާ ހިމަނާފައެއް ނެތެވެ.

ސަރުކާރުގެ ކުންފުނިތަކުން ދޫކުރާ ސްޕޮންސަ ފައިސާއަށް ބަރޯސާވާން ޖެހުމުގެ ސަބަބުން މީޑިއާތައް އޮންނަނީ "އަޅުވެތިކަމެއްގެ ތެރޭގައި" ކަމަށް ޑރ. މުއިއްޒު ވިދާޅުވީ ރިޔާސީ އިންތިހާބުގެ ކެމްޕޭނުގައި ސެޕްޓެމްބަރު 14، ގައި އދ. މަހިބަދޫގައި ބޭއްވި ޖަލްސާ އެވެ.

ސަރުކާރު ޖަވާބުދާރީ ކުރުވަން ނޫސްވެރިންނަށް އެންމެ މިނިވަން މާހައުލެއް ލިބޭނެ އެއް ގޮތަކީ ދައުލަތުގެ ބަޖެޓުން ވަކި ޕަސެންޓެއް ނޫސްވެރިކަމުގައި މަސައްކަތް ކުރާ ފަރާތްތަކަށް ހަމަޖެއްސުން ކަމަށް މުއިއްޒު ވިދާޅުވި އެވެ.

ނަމަވެސް އަންނަ އަހަރުގެ ބަޖެޓުގައި އެކަމަށް ފައިސާ ހިމަނާފައެއް ނެތެވެ.

އިންތިގާލީ ތަރުޖަމާނު މުހައްމަދު ފިރުޒުލް ވިދާޅުވީ އަންނަ އަހަރުގެ ބަޖެޓު އެކުލަވާލުމަށް އިންތިހާބީ ރައީސްގެ ބަޖެޓު ކޮމިޓީއަށް ލިބިގެން ދިޔައީ "ހަނި" ޖާގައެއް ކަމަށެވެ. ނަމަވެސް އާ ސަރުކާރުން މުޅިން އަލަށް ފަށަން ހުށަހެޅި 314 ޕްރޮޖެކްޓެއް އަންނަ އަހަރުގެ ދައުލަތުގެ ބަޖެޓްގައި ވަނީ ހިމަނައިފަ އެވެ.

ދައުލަތުގެ ބަޖެޓު 49.5 ބިލިއަނަށްވުރެ އިތުރުކުރަން އިންތިހާބީ ރައީސް ޑރ. މުއިއްޒު ބޭނުންފުޅު ނުވާކަމަށް ފިރުޒުލް ވިދާޅުވި އެވެ.