ފީފާ ވޯލްޑް ކަޕް/އޭޝިއަން ކަޕް ޖޮއިންޓް ކޮލިފައިން ޕްރިލިމިނަރީ ބުރުގެ ދެ ވަނަ ލެގުގައި 2-1 އިން ރާއްޖެ ބަލިކޮށް ބަންގްލަދޭޝް އިން ކޮލިފައިން ގްރޫޕް ސްޓޭޖުން ފުރުސަތު ހޯދައިފި އެވެ.

ދެ ލެގަށް ބަލާއިރު ބަންގްލަދޭޝް އަށް ކުރި ލިބުނީ 3-2 ގެ އެގްރިގޭޓް ނަތީޖާ އަކުންނެވެ. ވޯލްޑް ކަޕް ކޮލިފައިން ގްރޫޕް ސްޓޭޖުގައި ބަންގްލަދޭޝް އިން ކުޅެން ޖެހޭނީ އޮސްޓްރޭލިއާ އާއި ލެބަނަން އަދި ފަލަސްތީނާ އެވެ.

ރާއްޖޭން މިއަދުގެ މެޗަށް ވެސް ނެރެފައިވަނީ މިދިޔަ ބުރާސްފަތި ދުވަހު މާލޭގައި ބަންގްލަދޭޝާ 1-1 އިން އެއްވަރުވި ފުރަތަމަ ލެގުގެ މެޗަށް ނެރުނު ފުރަތަމަ އެގާރަ އެވެ. ބަންގްލަދޭޝް އިން ވަނީ ފުރަތަމަ އެގާރަ އަށް ބަދަލެއް ގެނެސްފަ އެވެ. އެ ގޮތުން، އެ ޓީމަށް މާލޭގައި ކުޅުނު މެޗުގައި ލަނޑު ޖަހައިިދިން ސާދްއުއްދީން ވަނީ ފުރަތަމަ އެގާރައިގައި ހިމަނައިފަ އެވެ.

ބަންގްލަދޭޝްގެ ޗެމްޕިއަން، ބަޝުންދަރާ ކިންގްސްގެ ދަނޑު، ބަޝުންދަރާ އެރީނާގައި މިއަދު ކުޅުނު މެޗު ފަށައިގެން މާގިނައިރެއްނުވެ، ރާއްޖެ އަށް ގޯލެއް ޖަހަން ފުރުސަތެއް ލިބުނެވެ. ބަންގްލަދޭޝްގެ އޭރިއާތެެރެއިން ރާއްޖޭގެ ހަސަން ރާއިފް އަހުމަދު (ހަންނަ) އަށް ލިބުނު ބޯޅަ އޭނާ އަށް ފޮނުވާނުލެވުނީ، ކުރިމަތީގައި ހުރި ބަންގްލަދޭޝްގެ ޑިފެންޑަރުން ބްލޮކްކުރުމުންނެވެ.

މެޗުގެ 11 ވަނަ މިނިޓްގައި ބަންގްލަދޭޝް އިން ވަނީ ލީޑުނަގައިފަ އެވެ. އެ ގޮތުން އޭރިއާތެރެއަށް ހުރަސްވި ބޯޅައަކަށް ހުސްކޮށް އަރައި ރަކީބް ހުސެއިން ޖެހި ބޯޅަ ވަނީ ގޯލުގެ ތެރެއަށެވެ. އޭގެ ފަހުން، ލީޑުފުޅާކުރަން ރަކީބް އަށް ރަނުގެ ދެ ފުރުސަތެއް ލިބުނެވެ. އެ ގޮތުން، ރާއްޖޭގެ ޑިފެންޑަރު، އަހުމަދު ނޫމާން (ހެލްމެޓް) ބޮލުގައި ޖެހިފައި ރަކީބަށް ލިބުނު ފުރުސަތުން ޖެހި ބޯޅަ ރާއްޖޭގެ ކީޕަރު ހުސެއިން ޝަރީފް (ހުސެން) ވަނީ މަތަކޮށްފަ އެވެ. އޭގެ ފަހުން، ލިބުނު ފުރުސަތުގައި ރަކީބް ޖެހި ބޯޅަ ބޭރުވީ ދަނޑީގައި ޖެހިފަ އެވެ.

ރާއްޖެ އަށް އެއްވަރުކޮށްދޭން ފުރަތަމަ ފުރުސަތު ލިބުނީ ހަމްޒާ މުހައްމަދު (ހަމްޕު) އަށެވެ. އެ ގޮތުން، އަރިމަތިން ހަމްޕު އަށް ލިބުނު ބޯޅައެއް ހިފައިގެން އޭރިއާތެރެއަށް ވަދެ، ތިން ކުޅުންތެރިން ކައިރިން ނައްޓާފައި ހަމްޕު ފޮނުވާލި ޝޮޓް ވަނީ ބްލޮކްވެފަ އެވެ.

ފުރަތަމަ ހާފު ނިމުމުގެ ކުރިން ރާއްޖޭން ވަނީ ލިބުނު ފުރުސަތެއްގެ ބޭނުންހިފައި އެއްވަރުކޮށްފަ އެވެ. މި ލަނޑު ޖެހީ މެޗުގެ 36 ވަނަ މިނިޓްގައި އައިސަމް އިބްރާހިމް އެވެ. ކޯނަރެއްގައި ހަމްޕު ނެގި ބޯޅައެއް ދިފާއުކުރަން އުޅުމުގެ ތެރޭގައި ބަންގްލަދޭޝްގެ ޑިފެންޑަރެއް ގައިގައި ޖެހިފައި ދިޔަ ބޯޅަ ހޯދައި، އައިސަމް ވަނީ ބޮލުން ގޯލުގެ ތެރެއަށް ފޮނުވާލައިފަ އެވެ.

ދެ ވަނަ ހާފްގެ ކުޅުން ފެށިގެން މިނިޓެއްގެ ތެރޭ ބަންގްލަދޭޝް އިން އަލުން ލީޑުނެގި އެވެ. މިއީ ސާދު ޖެހި ޝޮޓެއް ރާއްޖޭގެ ކީޕަރު ހުސެއިން އޭރިއާތެރެއަށް ޕަންޗުކޮށްލި ބޯޅަ ހޯދައި، އެމްޑީ އަހުމަދު ފަހީމް ޖެހި ގޯލެކެވެ. ހުސެއިން އަތުން ޖައްސާލި ބޯޅަ ބަންގްލަދޭޝްގެ އެމްޑީ ސޮހޭލް ރާނާ ފައިގައި ޖެހިފައި ލިބުމުން ފަހީމް ވަނީ ތިރީ ކަނަށް ފޮނުވާލައިފަ އެވެ. އެ ބޯޅަ ގޯލުގެ ތެރެއަށް ވަނީ ގޯލު ރޮނގުމަތީގައި ހުރި ރާއްޖޭގެ ޑިފެންޑަރު، ހެލްމެޓް ފައި ކައިރިން ގޮހެވެ.

ބަންގްލަދޭޝް އިން ދެ ވަނަ ހާފުގެ ބޮޑުބައި ކުޅުނީ އެއް ކުޅުންތެރިއަކު މަދުކޮށެވެ. އެއީ މެޗުގެ 60 ވަނަ މިނިޓްގައި އެ ޓީމުގެ އެމްޑީ ސޮހޭލް ރާނާ އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ. އޭނާ އަށް ދެ ވަނަ ރީނދޫ ކާޑު ދެއްކީ ރާއްޖޭގެ ހައިޝަމް ހަސަން (ބިޑި) އަށް ކުރި ފައުލަކަށެވެ.

ބަންގްލަދޭޝްގެ އެއް ކުޅުންތެރިއަކު މަދުވުމުގެ ފައިދާނަގައި، ރާއްޖޭން ކުރިއަށް ޖެހި ދެ ވަނަ ގޯލެއް ޖަހައި ނަތީޖާ ހަމަހަމަކުރަން މަސައްކަތް ކުރި އެވެ. އެ ގޮތުން، އޭރިއާބޭރުން އައިސަމް ޖެހި ބޯޅަ އަމާޒުވީ ކީޕަރު މިތުލް އަތަށެވެ. މެޗުގެ އިތުރު ވަގުތުގައި ރާއްޖޭގެ އިބްރާހިމް މަހުދީ (ފޭދޫ އިއްބެ) އާއި ހަސަން ނަޒީމް (ޗޯޓު) އަށް ލިބުނު ފުރުސަތުތަކުގެ ބޭނުމެއް ވެސް ނުހިފުނެވެ.

ރާއްޖޭން ވެސް މެޗު ނިންމާލަން ޖެހުނީ ކުޅުންތެރިއަކު މަދުކޮށެވެ. އެއީ ރާއްޖޭގެ ފަހަތަށް ކުޅެމުން ދިޔަ އަހުނަފް ރަޝީދު (އަހުއްކޮ) އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ.

މިއީ، ވޯލްޑް ކަޕް ކޮލިފައިން ޕްރިލިމިނަރީ ބުރުން ރާއްޖެ މި ފަހުން ކެޓި ފުރަތަމަ ފަހަރެެވެ. އެންމެ ފަހުން ރާއްޖެ، ޕްރިލިމިނަރީ ބުރުން ކެޓީ 2007 ވަނަ އަހަރު އެވެ. އެއީ، 2010 ވަނަ އަހަރު ބޭއްވި ވޯލްޑް ކަޕް ކޮލިފައިންގައި، އެ ފަހަރު ޔަމަނާ ދެކޮޅަށް ކުޅެ މާލޭގައި 2-0 އިން މޮޅުވި ނަމަވެސް، ޔަމަން ދަނޑުގައި ކުޅުނު ލެގުން، ރާއްޖެ ވަނީ 3-0 އިން ބަލިވެފަ އެވެ.