ނޭޕާލުގައި މިހާރު ކުރިއަށްދާ 19 އަހަރުން ދަށުގެ ސާފް ޗެމްޕިއަންޝިޕް ފުޓްބޯޅަ މުބާރާތުގައި ރާއްޖޭގެ ގައުމީ ޓީމު ކުޅުނު ފުރަތަމަ މެޗުން 1-1 އިން ޕާކިސްތާނާ އެއްވަރުވެއްޖެ އެވެ.

ރާއްޖެ ހިމެނެނީ ޕާކިސްތާނާއި ނޭޕާލާ އެކު ގްރޫޕް އޭގަ އެވެ. މި ގްރޫޕްގެ ފުރަތަމަ މެޗުން ޕާކިސްތާން ވަނީ 1-0 އިން ނޭޕާލް ބަލިކޮށްފަ އެވެ. އެހެންކަމަށް ވުމާ އެކު، މިއަދުގެ މެޗުން ރާއްޖެ އަތުން ޕާކިސްތާން ހޯދި ޕޮއިންޓާ އެކު އެ ޓީމަށް ވަނީ ސެމީ ފައިނަލްގެ ޖާގައެއް ޔަގީންވެފަ އެވެ. ގްރޫޕްގެ ދެ ވަނައިގައި އޮތް ރާއްޖެ އަށް އެއް ޕޮއިންޓް ލިބިފައިވާއިރު، ތިން ވަަނައިގައި އޮތް ނޭޕާލަށް އަދި ޕޮއިންޓެއް ނުލިބެ އެވެ.

މި ގްރޫޕުން ދެން ސެމީ ފައިނަލްގެ ޖާގަ ލިބޭ ޓީމެއް އެނގޭނީ މި މަހު 25 ވަނަ ދުވަހު ރާއްޖެ އާއި ނޭޕާލް ބައްދަލުކުރާ މެޗުންނެވެ. އެ މެޗު އެއްވަރުކޮށްލައިގެން ވެސް ރާއްޖެ އަށް ސެމީގެ ފުރުސަތު ލިބޭނެ އެވެ.

ރާއްޖެ ޓީމުގެ ލޫތު (ވ) އަތުން ބޯޅަ ހޯދަން ޕާކިސްތާންގެ ކުރްޝިދު މަސައްކަތްކުރަނީ.--- ފޮޓޯ: ސާފް

ކަތުމަންޑޫގެ ދަޝްރަތު ސްޓޭޑިއަމްގައި މިއަދު މެންދުރު ކުޅުނު މެޗު ފަށައިގެން ދެ ޓީމުން ވެސް މެޗުގެ ކޮންޓްރޯލް ގެއްލުނަނުދީ ރަނގަޅަށް ކުޅެވޭތޯ މަސައްކަތް ކުރި އެވެ.

ރާއްޖެ އަށް މި މެޗުގައި ލީޑުނަގައިދިނީ ޓީމުގެ ކެޕްޓަން ޝަނާން ރަޝާދު އެވެ. ދިވެހި ޕްރިމިއާ ލީގުގައި ޔުނައިޓެޑް ވިކްޓަރީ (ޔޫވީ) އަށް ކުޅެމުން އަންނަ ޝަނާން މި ގޯލު ޖެހީ އޭރިއާތެރެއިން ލިބުނު ފުރުސަތަކުން ގޯލުގެ މަތީ ކަނަށް ބޯޅަ އަމާޒުކޮށްލައިގެންނެވެ. އޭރިއާ ތެރެއިން ޖާގައެއް ހޯދުމަށް ފަހު ޝަނާން ފޮނުވާލި ބޯޅަ ގޯލަށް ވަންއިރު، ޕާކިސްތާން ކީޕަރު ސާހިލް ގުލް އަށް އެ ބޯޅަ އަށް ހަރަކާތް ވެސް ނުކުރެވުނެވެ.

ޕާކިސްތާނުން ނަތީޖާ ހަމަހަމަކުރަން ކުރި މަސައްކަތް ކާމިޔާބުކުރީ މެޗުގެ ފުރިހަަމަ ވަގުތު ހަމަވާން ހަ މިނިޓަށް ވެފައި ހުއްޓަ އެވެ. އެ ޓީމުގެ ގޯލު ޖެހީ 84 ވަނަ މިނިޓްގައި ޝާހް ޖަހާން އެވެ.

މި މެޗުގައި ދެ ޓީމަށް ވެސް ހޫނުގަދަ ވުމުގެ ސަބަބުން ރަނގަޅަށް ކުޅެން އުނދަގޫވި އެވެ.

ނަވާރަ އަހަރުން ދަށުގެ ގައުމީ ޓީމުގެ ކޯޗަކަށް ހުރީ އަހުމަދު ޝާކިރު (ޝާކިއްޓެ) އެވެ. މި މުބާރާތަށް ގައުމީ ޓީމުން ވަނީ ދުރާލާ ގިނަ ޕްރެކްޓިސްތަކެއް ކޮށްފަ އެވެ.