ބިން ހިއްކުމުގެ މަޝްރޫއުތަކުގައި ބޭނުންކުރުމަށްޓަކައި އެމްޓީސީސީއިން، ބެލްޖިއަމްގެ ކުންފުންފުންޏެއްގެ ޑްރެޖަރެއް ކަމަށްވާ "ފިލީޕޯ ބްރޫނެލޭޝީ" ރާއްޖެއަށް ގެނެސްފި އެވެ.
އެމްޓީސީސީގެ ސީއީއޯ އާދަމް އާޒިމް "އަދަދު" އަށް ވިދާޅުވީ، ރޭގެ ވަގުތެއްގައި ރާއްޖެއައި އެ އުޅަނދު ބޭނުންކޮށްގެން މިއަދު ބިން ހިއްކުމުގެ މަސައްކަތް ފަށާނެކަމަށެވެ.
"މި ޑްރެޖަރު ބޭނުންކޮށްގެން ބިން ހިއްކުމުގެ މަސައްކަތް މިއަދު ފެށޭނެ. ފުރަތަމަ މި ޑްރެޖަރު ބޭނުންކުރަން ނިންމާފަވަނީ ހއ. އިހަވަންދޫގެ ބިން ހިއްކުމަށް," އާޒިމް ވިދާޅުވި އެވެ.
އެ ޑްރެޖަރުގެ ފުޅާ މިނުގައި 27.5 މީޓަރު އަދި ދިގުމިނުގައި 142.5 މީޓަރު ހުންނައިރު، 11،300 ކިއުބިކް މީޓަރުގެ ހޮޕަ ކެޕޭސިޓީ ހުރެ އެވެ.
އެމްޓީސީސީއިން ހަ މަސް ދުވަހަށް ޗާޓާކޮށްގެން އެފަދަ އުޅަނދެއް ގެނައުމުގެ މަގުސަދަކީ ބިން ހިއްކުމުގެ މަޝްރޫއުތަކުގެ މަސައްކަތް އަވަސްކުރުން ކަމަށް އާޒިމް ވިދާޅުވިއެވެ.
"އަޅުގަނޑުމެން މި ޑްރެޖަރު މިގެނައީ ބިން ހިއްކުމުގެ މަޝްރޫއުތައް އަވަސްކުރަން. މިގޮތުން އަންނަ އޮކްޓޯބަރު މަސް ނިމުމުގެ ކުރިން ނުވަ ރަށެއްގެ ބިން ހިއްކައި ނިންމާލެވޭނެ،" އާޒިމް ފާހަގަކުރެއްވި އެވެ.
އެ ޑްރެޖަރު ބޭނުންކޮށްގެން ހިއްކަން ނިންމާފައިވާ ރަށްތަކުގެ ތެރޭގައި ހއ. އިހަވަންދޫ، ށ. ކޮމަންޑޫ، ރ. އުނގޫފާރު، ކ. ދިއްފުށި، ކ. ގުޅި، އއ. އުކުޅަސް، އއ. ބޮޑުފޮޅުދޫ، މ. ދިއްގަރު އަދި ފ. ފީއަލީ ހިމެނެއެވެ.
