ލަގްޒަރީ ޓޫރިސްޓް ހޮޓާ ހިންގުމުގައި މަގުބޫލުކަން ހޯދާފައިވާ ކޮރިންތިއާ ގެ ރިސޯޓެއް މާލެ އަތޮޅުގައި ތަރައްގީ ކުރުމުގެ މަސައްކަތް ފަށައިފި އެވެ.
ޓޫރިޒަމް މިނިސްޓްރީން މާލެ އަތޮޅުން، މާރަށް ޕްރައިވެޓް ލިމިޓެޑަށް ދޫކޮށްފައިވާ 19 ނަމްބަރު ފަޅުގައި ރިސޯޓް ތަރައްގީ ކުރަނީ، އެ ކުންފުނީގެ އެއް ހިއްސާދާރު ރޮމޭނިޔާގެ ނިރޯ އިންވެސްޓްމަންޓުންނެވެ. މި ރިސޯޓް ތަރައްގީ ކުރުމަށްޓަކައި މާރަށް ހޯލްޑިންސް ގެ ނަމުގައި، ދުބާއީ އިންޓަނެޝަނަލް ފައިނޭސް ސެންޓަރުގައި ކުންފުންޏެއް ރަޖިސްޓްރީ ކޮށްފައިވެ އެވެ.
ނިރޯ ގްރޫޕްގެ ވެބްސައިޓުގައި ބުނެފައިވާ ގޮތުގައި ރާއްޖޭގައި ތަރައްގީކުރާ "ކޮރިންތިއާ މޯލްޑިވްސް" ރިސޯޓް ވެގެންދާނީ އެ ކުންފުނިން ޓޫރިޒަމް އިންޑަސްޓްރީގައި ކުރާ އެންމެ ފުރަތަމަ އަދި އެންމެ ބޮޑު އިންޓަނެޝަނަލް އިންވެސްޓްމަންޓަށެވެ. މި ޕްރޮޖެކްޓުގެ އަގު ހާމަކޮށްފައެއް ނުވެ އެވެ.
މާލެ އިން ފަނަރަ މިނިޓުން ދެވޭ ހިސާބުގައި އޮތް ފަޅެއްގައި ހަތަރު ރަށް ހިއްކައިގެން ހަދާ ރިސޯޓުގައި ހަ ކިލޯ މީޓަރު ހުންނާނެ ކަމަށް ނިރޯ ގްރޫޕުން ބުނެ އެވެ. މި ޕްރޮޖެކްޓް މިހާރު ފަށާފައިވާއިރު، 2025 ގައި ރިސޯޓް ހުޅުވޭނެ ކަމަށް އެ ކުންފުނިން ބުނެ އެވެ.
ކޮރިންތިއާ މޯލްޑިވްސް ރިސޯޓުގެ ކުރެހުމެއް: މި ރިސޯޓުގައި 73 ކޮޓަރި އާއި ޕްރައިވެޓް އައިލެންޑެއް ހިމެނޭ -- ފޮޓޯ ކޮރިންޓިއާ
ދުނިޔޭގެ ނިސްބަތުން ފާހަގަ ކުރެވޭ، އެޗްކޭއެސް އިން އެން މަޑީގެ ބައްޓަމަށް ޑިޒައިން ކޮށްފައިވާ ރިސޯޓުގެ ފުރަތަމަ ރަށް ހާއްސަ ކުރަނީ އާއިލާތަކާއި ރައްޓެހިންނާއެކު ޗުއްޓީއަށް އަންނަ މީހުންނަށެވެ. ދެވަނަ ރަށް ހާއްސަ ކުރަނީ ލޯބިވެރިންނާއި ބޮޑެތި މީހުންނަށެވެ. ތިން ވަނަ ރަށަކީ އެކްސްކްލޫސިވް ޕްރައިވެޓް އައިލެންޑެކެވެ. އަދި ހަތަރު ވަނަ ރަށަކީ ރެސްޓޯރަންޓް ތަކާއި އިވެންޓް ބޭއްވުމަށް ހާއްސަ ކޮށްފައިވާ ރަށެވެ.
"ކޮރިންތިއާ ރާއްޖެއަށް ދާ ހަބަރު މި އިއުލާނު ކުރަނީ އުފަލާ އެކު، ޕާޓްނަރުނާއި ޑިވެލޮފަރުންނާއި އެކު ތަފާތު ހިތްގައިމު ތަނަކަށް ހެދުމަށް މަސައްކަތް ކުރާނަން،" ކޮރިންތިއާ ހޮޓެލްސްގެ ސިއީއޯ ސިމިއޮން ނައުޑީ، ހޮޓެލް އޮންލައިން އަށް ވިދާޅުވެފައިވެ އެވެ.
ކޮރިންތިއާ ބުނާ ގޮތުގައި 73 ކޮޓަރީގެ ރިސޯޓުގައި ވެލްނަސް އަދި ފިންޓްނަސް ސެންޓަރާއި ފަސް ރެސްޓޯރަންޓް، މަޝްހޫރު ބްރޭންޑު ތަކުން ހިންގާނެ އެވެ.
"ރާއްޖޭގައި ލަގްޒަރީ ރިސޯޓެއް ހެދުމަށް ކަޑަތުކުރެވޭ ހަރުފަތާ އެކު އަހަރެމެން މިތިބީ އުފަލުން. މިކަމުގެ ސަބަބުން ދިވެހިންނަށް ވަޒީފާ ލިބި ރާއްޖޭގެ އިންތިސާދަށް ޓޫރިޒަމުން ލިބޭ ފައިދާ އިތުރުވެގެންދާނެ،" މާރަށް ޕްރައިވެޓް މިނިޓެޑް އަދި މާރަށް ހޯލްޑިންސް ގެ މެނޭޖިން ޑިރެކްޓަރު ރެނޭ ބެއިލް ވިދާޅުވި އެވެ.
އެ ރިސޯޓް ޕްރޮޖެކްޓުގެ ބިން ހިއްކަނީ އެމްޓީސީސީ އިން ނެވެ. ޕްރޮޖެކްޓް މެނޭޖަރުންގެ ގޮތުގައި އައްޔަން ކޮށްފައިވަނީ ރާއްޖޭގައި 14 ރިސޯޓް ޕްރޮޖެކްޓް ހިންގާފައިވާ އާރުއެލްބީ ހޫލޫމެން އެވެ. ޖެނެރަލް ކޮންޓްރެކްޓާ އަކަށް އައްޔަންކޮށްފައި ވަނީ ޗައިނާ ސްޓޭޓް ކޮންސްޓްރަންޝަން އެވެ.
