ރާއްޖޭގެ އެންމެ އުތުރުގެ އަތޮޅުތަކަށް ކްރޫޒް ޓޫރިޒަމް ތައާރަފް ކުރުމުގެ މަސައްކަތް ކުރަމުން އަންނަ ކަމަށާއި އަމާޒަކީ މި އަހަރުގެ ތެރޭގައި ކްރޫޒްލައިނާތައް އެ ސަރަހައްދުތަކަށް ގެނައުން ކަމަށް ޓޫރިޒަމް މިނިސްޓަރު އަބްދުﷲ މައުސޫމް ވިދާޅުވެއްޖެ އެވެ.
ބޮޑުތިލަދުންމަތީގެ ފަތުރުވެރިކަން ކުރިއެރުވުމަށް ކުރަމުން އަންނަ މަސައްކަތްތަކާ ގުޅޭ ގޮތުން "އަދަދު" އާ ވާހަކަ ދައްކަވަމުން މިނިސްޓަރު މައުސޫމް ވިދާޅުވީ އެކަމާ ގުޅޭ މަޝްވަރާތައް ކްރޫޒްލައިނާތައް ހިންގާ މީހުންނާއި ރާއްޖޭގެ އޮޕަރޭޓަރުންނާއެކު ސަރުކާރުން ކުރަމުން އަންނަ ކަމަށެވެ.
"ކްރޫޒް ޝެޑިއުލް ކުރުމުގެ މަސައްކަތް [ދަނީ ކުރިއަށް] މި އަހަރުގެ ފަހުކޮޅު ނޫނީ މިއަހަރުގެ ތެރޭގައި އެ ސަރަހައްދަށް ކްރޫޒްތައް އަންނަން ފަށާނެ ކަމަށް މި ބަލަނީ،" މައުސޫމް ވިދާޅުވި އެވެ.
މާލެ ސަރަހައްދުގައި އޮޕަރޭޓު ކުރާ ފަދައިން އެ ސަރަހައްދުގައި ވެސް ކްރޫޒްތައް އޮޕަރޭޓު ކުރެވޭނެ ކަމަށް ގަބޫލުކުރައްވާ ކަމަށް މައުސޫމް ވިދާޅުވި އެވެ.
މާލެއާ ހިލާފަށް އެ ސަރަހައްދުގައި ޕަބްލިކް ޓްރާންސްޕޯޓު ގާއިމްވެފައި އޮތުމުން އެ މަސައްކަތް އިތުރަށް ކާމިޔާބުވެގެން ދާނެ ކަމަށް ވެސް މައުސޫމް ވިދާޅުވި އެވެ. .
