ބިސާއޫ (ޖެނުއަރީ 7) - ހުޅަނގު އެފްރިކާގެ ގައުމެއް ކަމަށްވާ ގިނީ-ބިސާއުގެ ސްޓޭޑިއަމަކަށް ވެސް ދާދި ފަހުން މަރުވި ބްރެޒިލްގެ ލެޖެންޑް ޕެލޭގެ ނަން ދިނުމަށް ނިންމާފައިވާކަން އެ ގައުމުގެ ސަރުކާރުން ހުކުރު ދުވަހު އިއުލާންކޮށްފި އެވެ.
ގިނީ-ބިސާއުގެ ސަރުކާރުން، އެ ގައުމުގެ ސިޓީއެއް ކަމަށްވާ ބަފާޓާގެ ސްޓޭޑިއަމަށް ޕެލޭގެ ނަން ދިނުމަށް ކަނޑައެޅީ އިއްޔެ އޮތް ކެބިނެޓް ބައްދަލުވުމެއްގަ އެވެ. މި ކެބިނެޓް ބައްދަލުވުން ފެށުމުގެ ކުރިން، މިދިޔަ މަހުގެ 29 ވަނަ ދުވަހު އުމުރުން 82 އަހަރުގައި މަރުވި ޕެލޭގެ ހަނދާނުގައި ސުކޫތެއް ވެސް ވަނީ ގެނެސްފަ އެވެ.
ބަފާޓާގެ ސްޓޭޑިއަމްގެ ނަން "ޕެލޭ ސްޓޭޑިއަމް" އަށް ބަދަލުކުރިއިރު، މިއީ 15،000 މީހުންގެ ޖާގައިގެ ސްޓޭޑިއަމްއެކެވެ.
ފީފާ ހުރިހަ މެމްބަރު ގައުމަކުން ވެސް، އެ ގައުމެއްގެ ސްޓޭޑިއަމްއަކަށް ޕެލޭގެ ނަން ދިނުމަށް ފީފާގެ ރައީސް ޖިއާނީ އިންފަންޓީނޯ ވަނީ ގޮވާލައްވައިފަ އެވެ.
އެފްރިކާގެ ގައުމެއް ކަމަށްވާ ކޭޕް ވާޑާގެ ވެރިރަށް ޕްރައިއާގެ ސްޓޭޑިއަމްގެ ނަން "ޕެލޭ ސްޓޭޑިއަމް" އަށް ބަދަލުކުރަން ނިންމާފައިވާކަން އެ ގައުމުގެ ބޮޑު ވަޒީރު ވަނީ ބުދަ ދުވަހު އިއުލާންކުރައްވައިފަ އެވެ.
މީގެ އިތުރުން، ކޮލަމްބިއާގެ ސްޓޭޑިއަމަކަށް ވެސް ޕެލޭގެ ނަން ދިނުމަށް ވަނީ ނިންމައިފަ އެވެ.
ބްރެޒިލްގެ ރިއޯ ޑި ޖަނެއިރޯ ސިޓީގެ މަޝްހޫރު މަރަކާނާ ސްޓޭޑިއަމްގެ ނަން ޕެލޭ އަށް ހާއްސަކުރުމަށް 2021 ވަނަ އަހަރުގެ މާޗް މަހު ނިންމި އެވެ. އެއީ ރެއި ޕެލޭ ސްޓޭޑިއަމް ގޮތަށް ކިއުމަށެވެ. އެކަމަކު، އެ ސްޓޭޓްގެ ގަވަރުނަރު ނިންމީ އެ ދަނޑުގެ ނަން ކުރިން ވެސް އޮތް ގޮތަށް މަރަކާނާ ސްޓޭޑިއަމްގެ ނަމުގައި ބޭއްވުމަށެވެ. ފީފާ ވޯލްޑް ކަޕް ފުޓްބޯޅަ މުބާރާތުގެ ތަށި ތިން ފަަހަރު ހޯދި ހަމައެކަނި ކުޅުންތެރިޔާ ޕެލޭގެ ހަނދާނުގައި ގިނަ ކަންތައްތަކެއް ކުރުމަށް އެކި ގައުމުތަކުގެ ފުޓްބޯޅައިގެ ރަސްމީ އިދާރާތަކުން އަންނަނީ މަޝްވަރާ ކުރަމުންނެވެ.
