އިދިކޮޅު ކެންޑިޑޭޓު އަދި ކުރީގެ ރައީސް ޔާމީނަށް ރިޔާސީ އިންތިހާބުގައި ވާދަނުކުރެވޭ ހާލަތެއްގައި ޕީޕީއެމްގެ ޓިކެޓުގައި ވާދަކުރައްވަފާނެތޯ ކުރި ސުވާލަށް ޖަވާބުދިނުމުގެ ފުރުސަތު ޕާޓީގެ ނައިބު ރައީސް ޑރ. މުހައްމަދު މުއިއްޒުއަށް ދިނުމާ އިދިކޮޅު ލީޑަޝިޕުން ދެކޮޅު ހަދައިފި އެވެ.
ޔާމީނުއަށް އަންނަ އަހަރުގެ ރިޔާސީ އިންތިހާބުގައި ވާދަކުރެވޭނެ ކަމާމެދު ސުވާލު އުފެދިފައިވަނީ ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވުމާއެކު އެވެ.
ޔާމީނުގެ މައްޗަށް ކުށް ސާބިތުވުމަށްފަހު އިދިކޮޅު ކޯލިޝަންގެ އިސްވެރިން ޕީޕީއެމްގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު މުއިއްޒުއަށް ކުރިމަތި ކުރުވި މި ސުވާލަށް ޖަވާބަދިނުމުގެ ފުރުސަތު އެބޭފުޅާއަށް ނުދެއްވައި، ޖަވާބުދެއްވީ ޕީއެންސީގެ ރައީސް އަބްދުއްރަހީމް އަބްދުﷲ އެވެ.
ނޫސްވެރިޔާގެ ސުވާލަށް ޖަވާބު ދެއްވަމުން އަބްދުއްރަހީމް ވިދާޅުވީ މިއަދުގެ ނޫސްވެރިންގެ ބައްދަލުވުމުގައި ވަކިވަކި ބޭފުޅުންނާ ސުވާލު ނުކުރެވޭނެ ކަމަށާއި ހުރިހާ ސުވާލުތަކަށްވެސް ޖަވާބު ދެއްވަން ހަމަޖެހިފައިވަނީ އެބޭފުޅާ އެކަނި ކަމަށެވެ. ރިޔާސީ އިންތިހާބަށް ކުރިމަތިލާނޭތޯ މުއިއްޒުއާ ކުރެވުނު ސުވާލަށް ޖަވާބު ދެއްވަމުން އަބްދުއްރަހީމް ވިދާޅުވީ އިދިކޮޅު ކޯލިޝަނުގެ ކެންޑިޑޭޓަކީ އަދިވެސް ރައީސް ޔާމީނު ކަމަށާއި އަންނަ އަހަރުގެ ރިޔާސީ އިންތިހާބުގައި ޔާމީން ވާދަކުރައްވާނެ ކަމުގެ ޔަގީންކަން އެބައޮތް ކަމަށެވެ.
މީގެ ކުރިންވެސް މުއިއްޒު ރިޔާސީ އިންތިހާބުގައި ވާދަކުރެއްވުމުގެ ޝައުގުވެރިކަން ހުރިކަމުގެ އަޑުތައްވަނީ ފެތުރިފަ އެވެ.
