ދޯހާ، ގަތަރު (ނޮވެމްބަރު 27) - މި ވަގުތު ކުލަބެއް ނެތިފައި ހުރި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަށް ސައުދީ އަރަބިއްޔާގެ ކުލަބަކުން ޖުމްލަ އެކު، 225 މިލިއަން ޑޮލަރު (186 މިލިއަން ޕައުންޑް)ގެ ކޮންޓްރެކްޓެއް ހުށަހަޅައިފި އެވެ.
ރިޕޯޓްތައް ބުނާގޮތުން ރޮނާލްޑޯ ގެންނަން ޝައުގުވެރިކަން ފާޅުކޮށްފައިވާ ސައުދީ އަރަބިއްޔާގެ ކްލަބްތަކަކީ އަލް ހިލާލް އާއި އަލް ނަސްރު އެވެ.
މި ވަގުތު ޕޯޗުގަލް ގައުމީ ޓީމާ އެކު ވޯލްޑް ކަޕްގައި ކުޅެން ގަތަރުގައި ހުރި، ރޮނާލްޑޯ، 37، ކުލަބެއް ނެތިފައި ހުރީ އޭނާގެ ކުރީގެ ކުލަބު މެންޗެސްޓާ ޔުނައިޓެޑާ އެކު ހަދާފައިވާ އެއްބަސްވުން އުވާލުމުންނެވެ.
ވޯލްޑް ކަޕްގައި ޕޯޗުގަލް ކުޅުނު ފުރަތަމަ މެޗުގެ 24 ގަޑިއިރު ކުރިން ކޮންޓްރެކްޓް އުވާލިކަން އިއުލާންކުރިއިރު، އޭނާ އާއި ކުލަބާ ދެމެދު ވަނީ ގިނަ މައްސަލަތަކެއް ޖެހިފަ އެވެ. ވަކިން ހާއްސަކޮށް، ޔުނައިޓެޑްގެ ކޯޗު އެރިކް ޓެން ހާގް، އޭނާ އަށް އިހުތިރާމް ކުޑަވާގޮތަށް އަމަލުކުރަމުން ދިޔަކަން ރޮނާލްޑޯ ފާހަގަކުރި އެވެ.
ސައުދީން ރޮނާލްޑޯ އަށް ހުށަހަޅާފައިވަނީ އޭނާ އަށް ޔުނައިޓެޑުގައި ލިބުނު މުސާރައަށް ވުރެ ދެ ގުނަ ބޮޑު އަދަދެކެވެ. މިގޮތުން ހަފްތާއަކު އޭނާ އަށް 1.41 މިލިއަން ޑޮލަރު (1.19 މިލިއަން ޕައުންޑް)ގެ މުސާރައެއް ދޭން އެކުލަބުން އޮތީ ތައްޔާރަށެވެ. ޔުނައިޓެޑްގައި ރޮނާލްޑޯ އަށް ލިބެމުން އައީ ބޯނަހާ އެކު 700،000 ޑޮލަރު އެވެ.
ރޮނާލްޑޯ އަށް ދެ އަހަރުގެ ކޮންޓްރެކްޓެއް ދޭން އެ ކުލަބުން ތައްޔާާރަށް އޮތްއިރު، މި ކޮންޓްރެކްޓްގެ ދަށުން އޭނާ އަށް އަހަރަކު 74 މިލިއަން ޑޮލަރު (62 މިލިއަން ޕައުންޑް) ލިބޭނެ ކަމަށް ބެލެވެ އެވެ. އޭގެ އިތުރުން އިސްތިހާރު ބޯނަސްއާ އެކު، ސީޒަނަކަށް ޖެހޭ މިންވަރު 100 މިލިއަން ޑޮލަރަށް ވުރެ އިތުރުވާނެ އެވެ.
ސައުދީގެ ޗެމްޕިއަންކަން މީގެ ކުރިން ނުވަ ފަހަރު ހޯދާފައިވާ އަލް ނަސްރް އިން މި ވަގުތު ރޮނާލްޑޯގެ އޭޖެންޓް، ޖޯޖް މެންޑޭޒްއާ ވާހަކަދައްކަމުން އަންނައިރު، ވޯލްޑް ކަޕްގެ މެޗުތައް ނިމުމާ އެކު ރޮނާލްޑޯ މިކަމާ ގުޅޭގޮތުން ވާހަކަދައްކާނެ ކަމަށް ބެލެވެ އެވެ.
އަންނަ ޖެނުއަރީ މަހު ސައުދީގެ ކްލަބަކަށް ރޮނާލްޑޯ ސޮއި ނުކުރިކަމުގައި ވިޔަސް ފަހުން ވެސް ރޮނާލްޑޯ ގެންނަން ސައުދީގެ ކްލަބްތަކުން ޝައުގުވެރިވެ އެވެ.
ރޮނާލްޑޯ ހޯދުމަށް ޔޫރަޕްގެ ކުލަބުތަކުން މި ވަގުތު ފަށާފައި ނުވި ނަމަވެސް އޭނާ އަކީ ކުރިއަށް އޮތް ޓްރާންސްފާގައި ޑިމާންޑް ބޮޑުވާނެ ކުޅުންތެރިއެއް ކަމަށް ބެލެވެ އެވެ.
