ޓެކްނޯ ސާފް ޗެމްޕިއަންޝިޕް 2026، ހޯސްޓްކުރާ ބަންގްލަދޭޝް އިން މި ފަހަރުގެ މުބާރާތުގައި ކުޅުނު ފުރަތަމަ މެޗުން ބޫޓާން އަތުން 1-0 އިން އުނދަގޫ މޮޅެއް ހޯދައިފި އެވެ.
އެންމެ ފަހުން، އިންޑިއާގެ ބެންގަލޫރުގައި ބޭއްވި ސާފް ޗެމްޕިއަންޝިޕްގައި ބަންގްލަދޭޝް އިން ސެމީ ފައިނަލަށް ދިޔައީ ގްރޫޕްގެ ފަހު މެޗުގައި ބޫޓާން އަތުން 3-1 އިން މޮޅުވެގެންނެވެ. މިރޭގެ މެޗުން މޮޅުވެގެން، ބަންގްލަދޭޝް އަށް ސެމީގެ ފުރުސަތު ބޮޑުވެފައިވާއިރު، މި ގްރޫޕްގައި ދެން އޮތީ ސްރީ ލަންކާ އެވެ.
ޑާކާ ނެޝަނަލް ސްޓޭޑިއަމް (ކުރީގެ ބަންގުބަންދު ސްޓޭޑިއަމް)ގައި މިރޭ ހުޅުވުމުގެ ރަސްމިއްޔާތަކާ އެކު ފެށިގެންދިޔަ މެޗުގެ ފުރަތަަމަ ހާފުގައި ބަންގްލަދޭޝްގެ ބިޝްވަނާތު ގޯޝް އަށް ގިނަ ފުރުސަތުތަކެއް ގޯލު ޖަހަން ލިބި ބޭނުމެއް ނުކުރެވުނެވެ. އިނގިރޭސި ކްލަބް ޝެފީލްޑް ޔުނައިޓެޑުން ރިލީސް ނުލިބޭތީ، ބަންގްލަދޭޝްގެ މިޑްފީލްޑަރު ހަމްޒާ ޗޯދުރީ އަދި ޓީމާ ނުގުޅެ އެވެ. ފީފާ ބްރޭކް އޮތީ މި މަހު 9-18 އަށް ކަމަށްވާއިރު، އޭގެ ކުރިން ސާފް ޗެމްޕިއަންޝިޕް މެޗުތައް ފެށުމުން ގިނަ ކްލަބްތަކުން އަދި ގައުމީ ޓީމަށް ކުޅުންތެރިން ރިލީސްކޮށްފައެއް ނުވެ އެވެ. ގިނަ ކުޅުންތެރިންނަށް ޓީމާ ގުޅެވެނީ ސެމީ ފައިނަލާ ހަމައިންނެވެ.
ހަމްޒާ ނެތުމާ އެކު، ބަންގްލަދޭޝް ޓީމުގެ މެދުތެރެއިން ލީޑުކުރުމުގައި އިސް ރޯލެއް ކުޅުނީ، ކެޕްޓަން ޖަމާލް ބުޔާން އާއި އެމެރިކާގެ ކްލަބް، ނިއުޔޯކް ކޮސްމޯސް އަށް ކުޅެމުން އަންނަ ޝަމިތު ޝޯމޭ އެވެ.
ބިޝްވަނާތު އާއި ފައިސަލް އަހުމަދު ފަހީމް އަދި ޝޯމޭ ފޮނުވާލި ބޯޅަތައް ހުއްޓުވުމުގައި ބޫޓާންގެ ޑިފެންޑަރުން ރަނގަޅު ކުޅުމެއް ދެއްކި އެވެ. އަދި، އެ ޓީމުގެ ކީޕަރު، ގެޔެސްޓެން ވަނީ ބަންގްލަދޭޝް އިން ނެގި ހުރަސްތައް ހުއްޓުވުމުގައި ތަފާތު ދައްކައިފަ އެވެ.
ކައުންޓަ އެޓޭކުގައި ބޫޓާނުން ގޯލެއް ޖެހޭތޯ ކުރި މަސައްކަތުގައި އެ ޓީމުގެ ތަޖުރިބާކާރު، ފޯވާޑް ޗެންޗޯ ގެޔެސްޓެން އަށް ދީގެން ހަމަލާ އުފެއްދޭތޯ ބަލަމުންދިޔަ އެވެ. އޭގެ ތެރެއިން ދެ ބޯޅައެއްގައި ޗެންޗޯ ހުރަސް ކުރެވޭތޯ މަސައްކަތްކުރި ބޯޅަތަކެއް ބަންގްލަދޭޝް ޑިފެންޑަރުން ވަނީ ހުއްޓުވައިފަ އެވެ.
ފުރަތަމަ ހާފާ ހިލާފަށް ދެ ވަަނަ ހާފުގައި ޗެންޗޯ ކުޅެމުން ދިޔައީ މިޑްފީލްޑް ތެރެއަށް ފައިބައިގެންނެވެ. ނަތީޖާއެއްގެ ގޮތުން ފުރަތަމަ ހާފަށް ވުރެން ގިނަ ވަގުތު ދެ ވަނަ ހާފުގައި ބޫޓާނުން ބޯޅަ ހިފަހައްޓައިގެން ކުޅުނެވެ.
ބަންގްލަދޭޝް އިން ލީޑުނެގީ 68 ވަނަ މިނިޓްގައި މުހައްމަދު އިބްރާހިމް ޖެހި ގޯލުންނެވެ. ބޫޓާންގެ އޭރިއާތެރެއަށް މަތިން ކުޅުނު ބޯޅައެއް ހުއްޓުވަން އެ ޓީމުގެ ޑިފެންޑަރުން ކުރި މަސައްކަތް ނާކާމިޔާބުވެ، މުހައްމަދު އިބްރާހިމް އަށް ލިބުނު ފުރުސަތުގައި އޭނާ ވަނީ ގޯލަށް ބޯޅަ ވައްދާލައިފަ އެވެ.
ބޫޓާނުން ފަހު ވަގުތާ ހަމައަށް ވެސް ލަނޑެއް ޖަހައި އެއްވަރުކުރެވޭތޯ ކުރި މަސައްކަތް ކާމިޔާބެއްނުވި އެވެ.
މިއީ، ބަންގްލަދޭޝްގެ ކޯޗުކަމާ އެމެރިކާގެ ތޯމަސް ޑޫލޭ ހަވާލުވި ފަހުން މޮޅުވި ދެ ވަނަ މެޗެވެ. މީގެ ކުރިން މޮޅުވީ، ޖޫން މަހު ސެން މެރީނޯއާ ދެކޮޅަށް ކުޅުނު މެޗުގަ އެވެ. އޭގެ ފަހުން، ފީފާ އާސިއާން ކަޕްގައި ވަނީ 3-0 އިން މެލޭޝިއާ އަތުން، 1-0 އިން ސިންގަޕޫރު އަތުން އަދި 9-2 އިން އިންޑޮނޭޝިއާ އަތުން ބަލިވެފަ އެވެ.
