ދޯހާ (ނޮވެމްބަރު 23) - ގަތަރުގައި މިހާރު ކުރިއަށްދާ ފީފާ ވޯލްޑް ކަޕްގައި މިއަދު ޖަޕާނާ ދެކޮޅަށް ޖަރުމަން ނުކުންނައިރު، މި މުބާރާތުގައި ޖަރުމަންގެ އަމާޒަކީ 2018 ވަނަ އަހަރުގެ ވޯލްޑް ކަޕްގައި އެ ޓީމަށް ކުރިމަތިވި ލަދުވެތި ނާކާމިޔާބީގެ ހަނދާންތައް ފޮހެލައި، ރަނގަޅު ކާމިޔާބެއް ހޯދުން ކަމަށް އެ ޓީމުގެ މިޑްފީލްޑަރު ޔޯސުއާ ކިމިޗް ބުނެފި އެވެ.
ރަޝިއާގައި 2018 ވަނަ އަހަރު އޮތް ވޯލްޑް ކަޕަށް ޖަރުމަން ކުރިމަތިލީ އެންމެ ފަހުގެ ޗެމްޕިއަނުންގެ ގޮތުގައެވެ. އެކަމަކު، ލަދުވެތި ގޮތަކަށް އެ މުބާރާތުގެ ގުރޫޕް ސްޓޭޖުން ޖަރުމަން ވަނީ ކަޓައިފަ އެވެ. މިއީ ވޯލްޑް ކަޕްގެ މުބާރާތެއްގެ ގުރޫޕް ސްޓޭޖުން ޖަރުމަން ކެޓި ފުރަތަމަ ފަހަރެވެ.
ވޯލްޑް ކަޕް ހަތަރު ފަހަރު ކާމިޔާބުކޮށްފައިވާ ޖަރުމަން މި އަހަރުގެ ވޯލްޑް ކަޕްގައި ކުޅޭ ފުރަތަމަ މެޗުގައި މިއަދު ޖަޕާނާ ދެކޮޅަށް ނުކުންނައިރު، މީގެ ހަތަރު އަހަރާއި ބައިގެ ކުރިން ވޯލްޑް ކަޕްގައި ކުރި ހިތި ތަޖުރިބާ ޖަރުމަންގެ ކުޅުންތެރިންގެ ހިތުން ފިލައިގެންނުދާ ކަމަށް ކިމިޗް ބުންޏެވެ.
މިއަދު މެޗަށް ނުކުންނައިރު ޖަރުމަންގެ ކުޅުންތެރިން ތިބީ "ވަރަށް މޯޓިވޭޓް"ވެފައި ކަމަށް ކިމިޗް ގަބޫލުކުރެ އެވެ.
"މީގެ ހަތަރު އަހަރާއި ބައިގެ ކުރިން ވޯލްޑް ކަޕްގައި ލިބުނީ އަހަރަމެންނަށް ހީވެސްނުކުރާހާ ދަށް ނަތީޖާއެއް. އެ ހަނދާން ފިލުވަން ދިގު އިންތިޒާރެއް މިކުރީ،" ޖަރުމަންގެ ބަޔާން މިއުނިކަށް ކުޅެމުންދާ ކިމިޗް ބުންޏެވެ.
"މުބާރާތުގެ ފުރަތަމަ މެޗަކީ ވަރަށް މުހިންމު މެޗެއް. އެންމެ ފަހުން ކުޅުނު ޔޫރޯގައި ވެސް އަހަރަމެން މުބާރާތުގައި ކުޅުނު ފުރަތަމަ މެޗުން މޮޅެއް ނުވި. އަދި އެ މުބާރާތް ކާމިޔާބުކުރެވޭ ގޮތެއްވެސް ނުވި."
ޖަޕާންގެ ޓީމުގައި ޖަރުމަން ބުންޑަސްލީގާގާއި ކުޅޭ އަށް ކުޅުންތެރިން ހިމެނޭއިރު، އެ ޓީމު ބަލިކުރުމަކީ ފަސޭހަކަމަކަށް ނުވާނެ ކަމަށް ކިމިޗް ބުންޏެވެ.
ޖަޕާނާ ދެކޮޅަށް ޖަރުމަން ނުކުންނައިރު، އެ ޓީމުގެ ލެރޯއީ ސާނޭ އަށް މިރޭގެ މެޗުގައި ނުކުޅެވޭނެ އެވެ. ސާނޭ އަށް ލިބުނު އަނިޔާއަކާ ގުޅިގެން މި މެޗުގައި ނުކުޅެވުނަސް، ދެ ވަނަ މެޗަށް އޭނާ ފިޓުވާނެކަމުގެ އުންމީދު އެބައޮތް ކަމަށް ޖަރުމަންގެ ކޯޗު ހަންސީ ފްލިކް ވަނީ ބުނެފަ އެވެ.
ސާނޭގެ ބަދަލުގައި ޖަޕާނާ ދެކޮޅަށް ޖަރުމަންގެ ފުރަތަމަ 11 ގައި ކުޅޭނެކަމަށް ބެލެވެނީ ތަޖުރިބާކާރު ފޯވަޑް ތޯމަސް މުލާ އެވެ. މި ފަހަކަށް އައިސް މުލާގެ އިންޖަރީގެ މައްސަލަތައް ބޮޑުވިޔަސް، މި މެޗުގައި އޭނާ ބޭނުންކުރެވޭނެ ކަމަށް ފްލިކް ވަނީ ބުނެފަ އެވެ.
މިއީ 2006 ވަނަ އަހަރުގެ ވޯލްޑް ކަޕަށް ފަހު ޖަރުމަނުން އާ ކޯޗެއްގެ ބެލުމުގެ ދަށުން ވޯލްޑް ކަޕެއްގައި ކުޅޭނެ ފުރަތަމަ ފަހަރެވެ. ޖަރުމަނުން 2006 ވަނަ އަހަރުގެ ވޯލްޑް ކަޕްގައި ނުކުތީ ޔާގެން ކްލިންސްމަންގެ ކޯޗުކަމުގަ އެވެ. އޭގެ ފަހުން 2010، 2014 އާއި 2018ގެ ވޯލްޑް ކަޕްގައި ކުޅުނީ ޔަކީމް ލޯގެ ކޯޗުކަމުގަ އެވެ. ބްރެޒިލްގައި 2014 ވަނަ އަހަރު ޖަރުމަނުން ވޯލްޑް ކަޕް ޗެމްޕިއަންކަން ހޯދިއިރު، ލޯގެ އެސިސްޓަންޓަކަށް ހުރި ފްލިކް ޖަރުމަނު ކޯޗުކަމާ ހަވާލުވީ މިދިޔަ އަހަރުގެ ޔޫރޯ އަށް ފަހު އެވެ.
ޖަރުމަނާއި ޖަޕާން ކުޅޭ މެޗު ފަށާނީ މިއަދު އިރުއޮއްސި ހައެއް ޖަހާއިރު އެވެ.
