ގައުމީ ފުޓްބޯޅަ ޓީމުގެ ކޯޗު، ފްރެންޗެސްކޯ މޮރިއޭރޯ، ޓީމާ އެކު ހަދާފައިވާ ކޮންޓްރެކްޓް އާ ކޮށްފި އެވެ.
އިޓަލީ އަށް އުފަން މޮރިއޭރޯ، 53، އެންމެ ފުރަތަމަ ގައުމީ ޓީމާ ހަވާލުވީ މިދިޔަ އަހަރުގެ އޮކްޓޯބަރު މަހުގަ އެވެ. އެ ފަހަރު ސޮއިކުރީ އެއް އަހަރުގެ ކޮންޓްރެކްޓެއްގަ އެެވެ.
އެ އެއްބަސްވުން މި މަހު ހަމަވާއިރު، މޮރިއޭރޯ މި ވަނީ ގައުމީ ޓީމާ އެކު ހަދާފައިވާ ކޮންޓްރެކްޓް މިއަދު އާ ކޮށްފަ އެވެ. އެއްބަސްވުން އާ ކުރީ އިތުރު އެއް އަހަރަށެވެ،
މޮރިއޭރޯ ވަނީ އޭނާ އަށް އިތުބާރުކޮށް ކޮންޓްރެކްޓް އާ ކުރަން ނިންމި ނިންމުމަށްޓަކައި އެފްއޭއެމާއި އެ އެސޯސިއޭޝަންގެ ރައީސް ބައްސާމް އަދީލް ޖަލީލަށް ޝުކުރު އަދާކޮށްފަ އެެވެ. އަދި އެކުގައި ގުޅިގެން އާ ޓާގެޓްތަކަކަށް މަސައްކަތް ކުރުމުގެ ވިސްނުމުގައި ހުރި ކަމަށް މޮރިއޭރޯ ބުންޏެވެ.
ކޮންޓްރެކްޓް އާ ކުރުމަށް ފަހު މޮރިއޭރޯ (ކ) އާއި ބައްސާމް.
ގައުމީ ޓީމާ މޮރިއޭރޯ ހަވާލުވި ފަހުން މިހާތަނަށް ވަނީ 10 މެޗެއް ކުޅެފަ އެވެ. އޭގެ ތެރެއިން ހަތަރު މެޗުން މޮޅުވިއިރު، ތިން މެޗުން ބަލިވީ އެވެ. އަދި އަނެއް ދެ މެޗު ނިމުނީ އެއްވަރުވެގެންނެވެ. ރާއްޖެ މޮޅުވީ މި އަހަރު ބަންގްލަދޭޝާ ދެކޮޅަށް ކުޅުނު އެކުވެރިކަމުގެ މެޗާއި އޭޝިއަން ކަޕް ކޮލިފައިންގައި ސްރީ ލަންކާ އަތުންނާއި ދާދި ފަހުން ކުޅުނު އެކުވެރިކަމުގެ ދެ މެޗުގައި ބްރުނާއީ ދާރުއްސަލާމާއި ލާއޯސް އަތުންނެވެ.
ބަލިވި މެޗުތަަކަކީ މިދިޔަ އަހަރުގެ ފޯ ނޭޝަންސް ކަޕްގައި ބަންގްލަދޭޝް އަތުންނާއި މި އަހަރު އޭޝިއަން ކަޕް ކޮލިފައިންގައި ތައިލެންޑާއި އުޒްބެކިސްތާން އަތުންނެވެ. އެއްވަރުވީ މިިދިޔަ އަހަރު ނޮވެމްބަރު މަހު ފޯ ނޭޝަންސް ކަޕްގައި ސްރީ ލަންކާ އާއި ސީޝެލްސްއާ ދެކޮޅަށް ކުޅުނު މެޗުގަ އެވެ.
ކޮންޓްރެކްޓް އާ ކުރުމަށް ފަހު އަންނަ މަހު މޮރިއޭރޯގެ އިރުޝާދުގެ ދަށުން އިތުރު މެޗުތަކެއް ކުޅެން އަންނަނީ މަސައްކަތް ކުރަމުންނެވެ.
އެންމެ ފަހުން ނެރުނު ފީފާ ރޭންކިންގައި ރާއްޖެ އަށް ވަނީ ދެ ދަރަޖައިގެ ކުރިއެރުމެއް ލިބިފަ އެވެ. މި އަހަރު ފެށިއިރު، ދުނިޔޭގެ 157 ވަނައިގައި އޮތް ރާއްޖެ، މާޗް މަހުން ފެށިގެން މިދިޔަ ސެޕްޓެމްބަރު މަހުގެ ނިޔަލަށް އޮތީ ދުނިޔޭގެ 156 ވަނައިގަ އެވެ. އެކަމަކު، މިދިޔަ މަހު ކުުޅުނު ބައިނަލްއަގުވާމީ އެކުވެރިކަމުގެ ދެ މެޗުން މޮޅުވެފައިވާތީ، މި މަހު ނެރުނު ރޭންކިންގައި ރާއްޖެ ވަނީ ދުނިޔޭގެ 154 ވަނަ އަށް ޖެހިލައިފަ އެވެ.
