ފެނަކަ ކޯޕަރޭޝަނުގެ މެނޭޖިން ޑިރެކްޓަރު އަހުމަދު ސައީދާއި ޗެއާމަން މުހައްމަދު ރަޝީދަށް ބޮޑެތި ތުހުމަތުތަކެއް ކުރެއްވުމަށް ފަހު، އެ ކުންފުނީގެ ޑެޕިއުޓީ މެނޭޖިން ޑިރެކްޓަރު ކަމުން އިބްރާހީމް ވަހީދު (އެންސްޕާ އިބްރޭ) އިސްތިއުފާ ދެއްވައިފި އެވެ.
އިބްރާހީމް ވަހީދު ފެނަކައިން އިސްތިއުފާ ދެއްވީ މިމަހުގެ ހަތް ވަނަ ދުވަހު ކަމަށް ވިޔަސް، އޭނާގެ އިސްތިއުފާގެ ސިޓީ ސޯޝަލް މީޑިއާގެ ބައެއް ޕްލެޓްފޯމްތަކުގައި ދައުރުވާން ފެށީ މިއަދު އެވެ. އެ ސިޓީގެ ކޮޕީއެއް "އަދަދު" އަށް ވެސް ލިބުނެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރު އަހުމަދު ސައީދު. ފޮޓޯ: މުހައްމަދު ޝާބިން/އަދަދު
އިބްރާހިމް ވަހީދުގެ އިސްތިއުފާގެ ސިޓީގައި ވިދާޅުވެފައި ވަނީ ކުންފުނީގެ ދަރަނި ބޮޑުވެފައިވަނީ ޗެއާމަން އާއި އެމްޑީގެ ނާގާބިލް ކަމުންނެވެ. އެ ދެ ބޭފުޅުން ފެނަކަ ހިންގުމާ ހަވާލުވެވަޑައިގެންނެވި އިރު އެ ކުންފުނީގެ ދަރަނީގެ ގޮތުގައި އޮތީ 680 މިލިޔަން ރުފިޔާ ކަމަށް ވިޔަސް މިހާރު ދަރަނި 1.3 ބިލިޔަން ރުފިޔާއަށް އަރާފައިވާ ކަމަށް އޭނާ ވިދާޅުވެފައިވެ އެވެ.
ފެނަކައިން އެކި ކަންކަމުގައި ފައިސާ ދައްކަން ޖެހިފައިވާ އާއްމު ވިޔަފާރިތަކުގެ ތެރެއިން، ޗެއާމަން އާއި އެމްޑީއާ ގުޅުން ނޯންނަ ވިޔަފާރިތަކަށް ފައިސާ ނުދައްކާ ކަމަށް ވެސް ސިޓީގައި ތުހުމަތުކުރައްވާފައި ވެ އެވެ. ފެނަކައިގެ ޑެޕިއުޓީ މެނޭޖިން ޑިރެކްޓަރުގެ ހައިސިއްޔަތުން އޭނާ އަދާކުރައްވަން ޖެހިވަޑައިގަންނަވާ މަސްއޫލިއްޔަތު އަދާކުރެއްވުމަށް ޗެއާމަން އާއި މެނޭޖިން ޑިރެކްޓަރު ހުރަސް އަޅުއްވަމުން ގެންދަވާ ކަމަށް ވެސް ސިޓީގައި ތުހުމަތުކުރެއްވި އެވެ.
"މި ގޮތުން ކޯޕަރޭޓް ގަވާނެންސް ކޯޑާ މުޅިން ހިލާފަށް، މަނިކުފާނާއި ޗެއާމަންގެ ޒާތީ ހަސަަދައެއް ފިލުވުމުގެ ބޭނުމުގައި އަޅުގަނޑުގެ މައްޗަށް ދޮގު ތުހުމަތުކޮށް، މައްސަލަތަކެއް ބަލާކަމަށް ދައްކައިގެން، އަަޅުގަނޑަށް އެއްވެސް އެއްޗެއް އެންގުމަކާ ނުލައި ކުންފުނީގެ އެއްވެސް ޑޭޓާއަކަށް އަޅުގަނޑަށް އެކްސެސް ނުވެވޭ ގޮތަށް ހުންނަތާ ވެސް ތިން އަހަަރުވީ،" ސިޓީގައި ވިދާޅުވި އެވެ.
އޭނާ ވިދާޅުވި ގޮތުގައި އެކަމާ ގުޅޭ ގޮތުން ފޮނުއްވި އެއްވެސް ސިޓީއަކަށް ވެސް ފެނަކައިގެ އެމްޑީ ސައީދު ޖަވާބެއް ނުދެއްވަ އެވެ.
މިކަމާ ގުޅޭ ގޮތުން ސައީދުގެ ބަހެެއް އަދި ނުލިބެ އެވެ.
