ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް ދިން ބޮމުގެ ހަމަލާއާ ގުޅިގެން ހައްޔަރު ކުރި އަބްދުﷲ އަލީ މަނިކާއި މުހައްމަދު ތަސްލީމާ ދެކޮޅަށް ދައުލަތުން ހުށަހަޅާފައިވާ ސިއްރު ހެކިންގެ ހެކިބަސް ސިއްރިއްޔާތުގައި ނެގޭނެ ގޮތް ހަމަނުޖެހިގެން އެންމެ ފަހުން ހެކިބަސް ނުނަގައި މިއަދުގެ އަޑުއެހުން ނިންމާލައިފި އެވެ.
ހއ. މޮޅަދޫ ބަހާރުގޭ، އަބްދުﷲ އަލިމަނިކު އަދި ހއ. ހޯރަފުށި، އަލަނާސިގޭ، މުހައްމަދު ތަސްލީމްގެ މައްޗަށް ކްރިމިނަލް ކޯޓުގައި ހިންގަމުންދާ ޝަރީއަތަ ޖަލުގައި ތިބެގެން ދެ މީހުން ބައިވެރިވިއިރު، ސިއްރު ހެކިބަސް ނެގުމުގެ އިންތިޒާމް ހަމަޖެއްސުމަށް ކޯޓުގެ އިދާރާއިން ގާތްގަނޑަކަށް ދޮޅު ގަޑިއިރު ހޭދަ ކުރި އެވެ.
ސިއްރު ހެކިންގެ ހެކިބަސް އާންމުކޮށް ނަގާނީ، އެހެން ތަނެއްގައި ބޭއްތިބުމަށް ފަހު އެ މީހުން ދައްކާ ވާހަކައިގެ އަޑު އޮންލައިންކޮށް ޝަރީއަތުގެ މަޖިލީހަށް އިވޭ ގޮތަށެވެ. އެ ގޮތަށް އަޑު ދޫކުރާނީ ކާކުގެ އަޑެއްކަން ދެނެގަނެވޭ ވަރަށް ބަރު އަޑަކަށް ބަދަލުކޮށްގެނެވެ.
ދޮޅު ގަޑިއިރެއްހާއިރު މަސައްކަތް ކުރުމަށް ފަހު، އެ ކަން ހަމަނުޖެހުން ޝަރީއަތް ދެން އެެހެން ދުވަހަކަށް ފަސްކުރަން ނިންމާފައިވާ ކަން ކޯޓުގެ އިދާރާއިން އަޑުއެހުމަށް ހާޒިރުވެ ތިބި މީހުނަށް އެންގި އެވެ.
ރައީސް ނަޝީދު ގެކޮޅުން ނިކުމެވަޑައިގެން ކާރަށް އަރުއްވަނިކޮށް ބޮމެއް ގޮއްވާލާ، އެމަނިކުފާނު އަވަހާރަކޮށްލަން ދިން އެ ހަމަލާ ރޭވުމުގައި އިސްކޮށް އުޅުނު ކަމަށް ފުލުހުން ތުހުމަތު ކުރަނީ މި ދެ މީހުންގެ މައްޗަށެވެ.
އެހެން ނަމަވެސް ދައުލަތުން މި ދެ މީހުންގެ މައްޗަށް ދައުވާކުރަނީ ޓެރަރިޒަމް މަނާކުރުމުގެ ގާނޫނުގެ ދަށުން، ޓެރަރިސްޓް ޖަމާއަތަކަށް ތާއީދުކުރުމުގެ ކުށުގެ ދައުވާ އެވެ. ދައުލަތް ތަމްސީލް ކުރައްވާ ޕްރޮސެކިއުޓާ ޖެނެރަލް އޮފީހުން ބުނެފައިވާ ގޮތުގައި ހެކި ލިބެމުންދާ ވަރަކަށް އިތުރު ދައުވާތައް އަދި އުފުލާނެ ކަމަށެވެ.
މީގެ ކުރިން ޝަރީއަތަށް ވަނީ އަލި މަނިކާއި ތަސްލީމުގެ މައްޗަށް ފުލުހުންގެ އިންޓެލިޖެންސް ރިޕޯޓް ތައްޔާރުކުރުމުގައި އުޅުނު އޮފިސަރުންގެ ހެކިބަސް ނަގައިފަ އެވެ.
މި ގޮތުން، ތަސްލީމަކީ އައިއީޑީ ތައްޔާރު ކުރުމުގެ މާހިރެއް ކަމަށާއި ނަޝީދަށް ހަމަލާ ދޭން ގޮއްވާލި އައިއީޑީ ތައްޔާރުކުރަން އޭނާގެ "އެކްސްޕާޓް އޮޕީނިއަން" ހޯދި ކަމަށް ތަސްލީމާ ގުޅޭ ގޮތުން އިންޓެލިޖެންސް ރިޕޯޓް ތައްޔާރު ކުރި ފުލުސް އޮފިސަރު ހެކިބަސް ދީފައިވެ އެވެ.
މީގެ ކުރިން 2020 ވަނަ އަހަރުގެ ކުރީކޮޅު ހުޅުމާލޭގައި ތިން ފަތުރުވެރިޔަކަށް ދިން ހަމަލާގެ ފަހަތުގައި ހުރީ އަބްދުﷲ އަލިމަނިކު ކަމަށާއި، އޭނާ އެ ކަން ކުރީ އޭނާގެ ދަރިން ދައުލަތަށް ނެގުމުން އެ ކަމުގެ ބަދަލު ހިފުމެއްގެ ގޮތުގައި އޭނާގެ މައްޗަށް ރިޕޯޓް ތައްޔާރު ކުރި އޮފިސަރު ހެކިބަސް ދީފައިވެ އެވެ.
ހަމަލާގެ ތުހުމަތާ ގުޅިގެން އަލި މަނިކު ހައްޔަރުކުރީ މެއި 18، 2021 ގައި ފުލުހުން ހިންގި އޮޕަރޭޝަނެއްގަ އެވެ. އޭނާއަކީ 2007 ވަނަ އަހަރު އއ. ހިމަންދޫގައި ފުލުހުންނާ ސިފައިންނާ ހަރުކަށި ފިކުރަށް ނިސްބަތްވާ ބަޔަކާ ހިނގައިދިޔަ ކުރިމަތިލުންތަކެއްގައި އިސްކޮށް އުޅުނު މީހެކެވެ. އަލިމަނިކު އެ މައްސަލައިގަ ޖަލު ހުކުމް ތަންފީޒު ކުރަމުން ދަނިކޮށް ޖަލުން ވެސް ފިލާފައިވެ އެވެ.
ތަސްލީމަކީ ވެސް ހަރުކަށި ފިކުރު ފެތުރުމުގެ ތުހުމަތު ކުރެވިފައި އޮތް މީހެކެވެ. އަދި، މއ. އެނބޫގޭގެ އެޕާޓްމަންޓެެއްގައި އެޓިކް އިންޓަނޭޝަނަލް ޕްރައިވެޓް ލިމިޓެޑް ކިޔާ ކުންފުންޏަކުން ހިންގަމުން ގެންދިޔަ އޮފީސް ތެރޭގައި އައިއީޑީއެއް ހެދުމުގައި އަމަލީ ގޮތުން ހަރަކާތްތެރިވަނިކޮށް އޭނާ ކުރިން ހައްޔަރުކުރި އެވެ.
