އިއްޔެ އެއާޕޯޓުން ދެ ބިދޭސީއަކު ހައްޔަރު ކުރީ ދޫކޮށްލާފައި އޮތް ދަބަހެއްގެ ތެރޭގައި އިން ގަމީހެއްގައި ބަޓަން ކެމެރާއެއް އޮތުމުން އެ މައްސަލައިގައި ކަމަށް ފުލުހުން މިއަދު ބުނެފި އެވެ.
ފުލުހުން މިއަދު ބުނީ ދެ ބިދޭސީން ހައްޔަރު ކުރީ "އިތުރު ބައެއް ކަންކަން" ސާފު ކުރުމަށް ކަމަށެވެ. އެއީ ކޮން ގައުމެއްގެ ބައެއްކަން ފުލުހުން ނުބުނެ އެވެ.
"އެއާޕޯޓުގައި ވެރިއަކު ނެތި ދޫކޮށްލާފައި ލަގޭޖެއް ހުރިކަމުގެ މައުލޫމާތު ލިބިގެން އޮގަސްޓު 28 ވަނަ ދުވަހު ފުލުހުން ހަރަކާތްތެރިވެފައިވޭ. އަދި ލަގޭޖުގައި އޮތް ގަމީހެއްގައި ބަޓަން ކެމެރާއެއް އިންކަން އެނގުމާ ގުޅިގެން ލަގޭޖު ބެހެއްޓިފަރާތަކީ ކާކުކަން ބެލުމަށްފަހު، އިތުރު ބައެއްކަންކަން ސާފުކުރުމަށް އެ ލަގޭޖާ ގުޅުންހުރި ދެ ބިދޭސީން އިއްޔެ ފުލުހުންގެ ބެލުމުގެ ދަށަށް ގެނެސްފައިވޭ،" މިއަދު ފުލުހުން ބުންޏެވެ.
އެ މައްސަލައިގައި ހައްޔަރު ކުރި ދެ ބިދޭސީންގެ ބަންދުގެ މުއްދަތަށް 10 ދުވަސް ކްރިމިނަލް ކޯޓުން މިއަދު ވަނީ ޖަހައިފަ އެވެ.
