މޯލްޑިވިއަން ޑިމޮކްރެޓިކް ޕާޓީ މީގެ 17 އަހަރު ކުރިން އުފެދުނު އެއް ސަބަބަކީ ރާއްޖޭގައި އަނިޔާވެރިކަން އިތުރުވުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިރޭ ކުރިއަށްދާ އެ ޕާޓީގެ ހަތަރު ވަނަ ކޮންގްރެސް ފެށުމުގެ ޖަލްސާގައި ވިދާޅުވެއްޖެ އެވެ.
ސޯޝަލް ސެންޓަރުގައި ކުރިއަށްދާ އެމްޑީޕީގެ ކޮންގްރެސްގައި ވާހަކަ ދައްކަވަމުން ރައީސް ސޯލިހު ވިދާޅުވީ "އަނިޔާވެރިކަން ހައްދުފަހަނައަޅައި" ދިޔުމަކީ އެމްޑީޕީ އުފެދުމުގެ ސަބަބެއް ކަމަށެވެ.
"އެމްޑީޕީ އުފެދިގެން އައީ ޤަބޫލުކުރާ ހަމަތަކަކާ ، އުސޫލުތަކަކާ ، ގެންނަން ބޭނުންވާ ބަދަލުތަކެއްގެ މައްޗަށް. އެއްކަމަކީ ޖަލުގެ ތޭރިތަކުގެ ބިއްދޮށުން އޭރު އިވެމުންދިޔަ ރުއިމުގެ އަޑު. އާދެ! އަނިޔާވެރިކަން ހައްދު ފަހަނައަޅާ ދިޔުން. ކުރެވޭ އިޝާރާތަކުން، ބުނެވޭ ބަހަކުން ނުވަތަ ހީވާހީވުމަކުން ވެސް މީހާގެ އަޖަލު އޭނާގެ ދޮރުގާ ޓަކި ޖަހައިފާނެ. އެކަމަށް ވަކި އިރެއް ހިނދެއް، މެންދުރެއް އަދި މެންދަމެއްގެ ތަފާތެއް ނެތް. ވަންނާކަށް ވަކިގެއެއް، ދައްކާކަށް ކޯޓުއަމުރެއް، ފުރިހަމަ ކުރާކަށް ގާނޫނީ އިޖުރާއަތެއް އޭރަކު ނޯވޭ،" ރައީސް ވިދާޅުވި އެވެ.
ރައީސް ވިދާޅުވީ އެ ލާއިންސާނީ އަނިޔާަވެރިކަން ނިމުނީ އެމްޑީޕީއަށް ނިސްބަތްވާ ވަރަށް ގިނަ ބަޔަކު ކުރި ބުރަ މަސައްކަތުގެ ސަބަބުން ކަމަށެވެ.
"މިއީ އެދުވަހުގެ ޙާލަތު އޮތްގޮތް. ނައްތާލަން ބޭނުންވީ މިދެންނެވި ބިރުވެރިކަން. ބޭއިންސާފާ ލާއިންސާނިއްޔަތާ އަނިޔާ. ހަމައެކަނި މިބަދަލަށް ބެލި ނަމަވެސް އެމްޑީޕީ އަށް. އެމްޑީޕީއަށް ނިސްބަތްވާ ކޮންމެ މެމްބަރަކަށް ޙައްގުވާ ތަޢުރީފުގެ ކޮޅެއްނެތް،" ރައީސް ވިދާޅުވި އެވެ.
އޭގެ އިތުރުން ވެސް ރާއްޖޭގައި އިތުރުވަމުންދިޔަ އިޖްތިމާއީ މައްސަލަތަކަށް ހައްލެއް ހޯދުމަކީ ޕާޓީ އުފެދުމުގެ މަގްސަދެއް ކަމަށް ރައީސް ވިދާޅުވި އެވެ.
"އެއްތަނެއްގައި ހިފަހައްޓާ، ޖަމާކޮށް "ގުދަންކުރެވިފައިވާ" ޒަމާންވީ ސިޔާސީ އަދި އިދާރީ ބާރުތައް ދޫކޮށްލުން، އެއީ އެމްޑީޕީ އުފެދުނު އެއް މަގްސަދު. ބޯހިޔާވަހިކަމުގެ ބޮޑު ސުވާލަށް ޖަވާބު ހޯދުމަކީ އޭގެ ކުރިން އެމީހެއްގެ އަމިއްލަ ޒިންމާއެއް. ކަމެއް ދަމެއް ޖެހުމުން އެޖެހުނު ކަމަކަށްވުރެ ބޮޑުދަމެއްޖެހެން ޖެހެނީ ޙައްލެއް ހޯދުމަށް ރަށްވީއްލާ ގޮސްއައިސްވެވޭނެ ގޮތެއް. މަގެއް އޭރު ނެތުމުން. ބޭސްފަރުވާއާ ފޮތް ފަންސުރަށް ސަލާންޖެހުން ނައްތާލުމަކީ އެމްޑީޕީން ގެންނަން ބޭނުންވި ބަދަލުތައް. ފުލުސް ކޯޓުނެތް ، މިނިވަން އިންސާފުވެރި ޖުޑީޝަރީއެއް ރައްޔިތުންނަށް ހޯދައިދިނުން ، އެއީވެސް ގެންނަން ބޭނުންވި ބަދަލެއް،" އެމަނިކުފާނު ވިދާޅުވި އެވެ.
އެމްޑީޕީގެ ކޮންގްރެސްގައި 1100 އަށް ވުރެ ގިނަ މެމްބަރުން ބައިވެރިވެ އެވެ. މިރޭ ހަމަ އޮންނަނީި ކޮންގްރެސް ފެށުމުގެ ޖަލްސާ އެވެ. މާދަމާ އޮންނާނީ މަޝްވަރާތަކާއި ބައްދަަލުވުންތަކާއި ބައެއް ޕްރެޒެންޓޭޝަންތަކެވެ. މުހިންމު ކަންކަމަށް ވޯޓަށް އެހުން އޮންނާނީ އަންނަ އާދީއްތަ ދުވަހެވެ.
