މަރުގެ އަދަބާމެދު ރާއްޖެއިން ގެންގުޅޭ ސިޔާސަތު ބަދަލުނުވާ ކަމަށް ހޯމް މިނިސްޓަރު އިމްރާން އަބްދުﷲ މިއަދު ވިދާޅުވެއްޖެ އެވެ.
މަރުގެ ހުކުމް ތަންފީޒުކުރުމާ ގުޅޭ ގޮތުން، މި ސަރުކާރުން ގެންގުޅޭ ސިޔާސަތާ ގުޅޭ ގޮތުން ސުވާލުކުރުމަށް މިނިސްޓަރު އިމްރާން ވަނީ ރައްޔިތުންގެ މަޖިލީހުގެ ޖަލްސާއަށް ހާޒިރުކޮށްފަ އެވެ. މިކަމާ ގުޅޭ ގޮތުން މިނިސްޓަރާ ސުވާލުކޮށްފައިވަނީ މަހިބަދޫ ދާއިރާގެ މެންބަރު އަހުމަދު ތޯރިގެވެ.
"އެކަމާ ގުޅޭ ގޮތުން މިހާރު ވެސް އަމަލު ކުރަމުން އަންނަ މޮރިޓޯރިއަމް ދެމެހެއްޓުން، މިއީ މި ސަރުކާރުން އަލަށް އުފަން ކުރި ސިޔާސަތެއް ނޫން، މިއީ ޒަމާނުއްސުރެ ރާއްޖޭގައި އަމަލު ކުރަމުން އައި ގޮތް،" އިމްރާން ވިދާޅުވި އެވެ.
އިމްރާން ވިދާޅުވީ ވޭތުވެދިޔަ ބައެއް ސަރުކާރުތަކުން މަރުގެ ހުކުމް ތަންފީޒު ކުރުން ސިޔާސީ ހަތިޔާރެއްގެ ގޮތުގައި ބޭނުން ކޮށްފައިވާ ކަމަށެވެ. އެގޮތުން އެކި ފަހަރު މަތީން އެކަމާ ގުޅޭ ވާހަކަ ދައްކާފައިވާ ކަމަށް ވިދާޅުވި އެވެ. އެހެންނަމަވެސް ދެވަނަ ޖުމްހޫރިއްޔާގެ އެއްވެސް ވެރިކަމެއްގައި މަރުގެ ހުކުމާ ގުޅިގެން އަމަލު ކުރަމުން އަންނަ ސިޔާސަތަށް އެއްވެސް ބަދަލެއް ގެނެސްފައި ނުވާ ކަމަށެވެ.
"ވޭތުވެދިޔަ ސަރުކާރުގައި އެ ކަން ތަންފީޒު ނުކޮށް އޮތީ މި މޭރުމުން ކަމުގައި އަޅުގަނޑު ދެކެން،" އިމްރާން ވިދާޅުވި އެވެ.
އިމްރާން ނުސީދާކޮށް އިޝާރާތް ކުރެއްވީ، ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވެރިކަމުގައި ހުންނެވިއިރު، އެ މަނިކުފާނުގެ ސަރުކާރުން މަރުގެ ހުކުމް ތަންފީޒު ކުރަން ފަސް ނުޖެހޭނެ ކަމަށް ވިދާޅުވެ، ދެއްކެވި ވާހަކަތަކަށް ކަމަށް ބެލެވެ އެވެ.
ޔާމީންގެ ސަރުކާރުގައި ލީތަލް އިންޖެކްޝަން ޖަހައިގެން މަރުގެ ހުކުމް ތަންފީޒު ކުރަން ނިންމައި އެކަމަށް ބޭނުންވާ ވަސީލަތްތަކާއި ސާމާނު ވެސް ގެނެސްފައިވާ ކަމަށް އޭރުގެ ހޯމް މިނިސްޓަރު އުމަރު ނަސީރު ވިދާޅުވެފައިވެ އެވެ.
އަދި މަރުގެ ހުކުމް ތަންފީޒު ކުރަން ފުރިހަމަ ކުރަންޖެހޭ އިޖުރާއަތްތައް ހިމެނޭ ތަފްސީލީ ގަވައިދެއް ވެސް އެކުލަވައިލި އެވެ. ނަމަވެސް، ޔާމީން ވެރިކަން ނިމުމާ ހަމައަށް އެކަމަށް އަމަލީ ސިފައެއް ގެނެސްފައެއް ނުވެ އެވެ.
ރާއްޖޭގައި މަރަން ހުކުމްކޮށްފައިވާ މީހުންގެ ތެރެއިން އިސްތިއުނާފުގެ ހުރިހާ މަރުހަލާތަކެއް ނިމިފައި މިވަގުތު ތިބީ ތިން މީހުންނެވެ.
