އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދާ ގިނަ ކަންކަމުގައި ހިޔާލު އެއް ގޮތަސް ހުންނަވާނީ މިނިވަން ޗެއާޕާސަނެއްގެ ގޮތުގައި އެމްޑީޕީގެ ޗެއާޕާސަން ކަމަށް ވާދަކުރައްވާ، ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހްމީ (އިންތި) ވިދާޅުވެއްޖެ އެވެ.
އަންނަ މެއި މަހުގެ 14 ވަނަ ދުވަހު ބާއްވާ އެމްޑީޕީގެ އެތެރޭގެ އިންތިހާބު ބެލެވެނީ ރައީސް ނަޝީދާއި ރައީސް އިބްރާހީމް މުހައްމަދު ސޯލިހްއާ ދެމެދު އޮތް ގަދަހިފުމެއްގެ ގޮތުގަ އެވެ. އިންތިއަކީ ނަޝީދުގެ ތާއީދު އޮތް ކެންޑިޑޭޓެވެ. ދެން ވާދަކުރައްވަނީ ރައީސްގެ ތާއީދު އޮތް އިކޮނޮމިކް މިނިސްޓަރު ފައްޔާޒު އިސްމާއީލެވެ.
މި ރޯދަ މަހު "އަދަދު" ނޫހުން ގެނެސްދޭ "ކުޅިކޮށް" ޝޯގައި އިންތި ބައިވެރިވެވަޑައިގެންނެވިއިރު، އެމްޑީޕީގެ އެތެރޭގެ ހިޔާލުތަފާތުވުންތަކާ ގުޅޭ ގޮތުން ވާހަކަ ދައްކަވައިފައިވެ އެވެ. އަދި އިންތި އިންތިހާބުވެގެން މަސައްކަތް ކުރައްވާނީ ނަޝީދު ވިދާޅުވިހާ ގޮތަކަށް ކަމަށް ދެކެވޭ ވާހަކައަށް ރައްދެއް ދެއްވި އެވެ.
"އަޅުގަނޑު ވަރަށް މިނިވަން ވާނެ، އަޅުގަނޑަކީ ޒާތެއްގެ ޕްރޮޖެކްޓްއެއްގައި ތާށިވެފައި ހުރި މީހެއް ނޫން، ލޯނެއްގައި ޖެހިގެން ތާށިވެފައި ހުރި މީހެއް ނޫން، އަޅުގަނޑު އެހެން މީހަކަށް ބަރޯސާވާން ޖެހޭ ކަމެއް ނޯންނާނެ،" އިންތި ވިދާޅުވި އެވެ.
ނަޝީދާ ހިޔާލު ތަފާތުވެ އެމަނިކުފާނާ ދެކޮޅަށް ގޮތެއް ނިންމަން ޖެހިއްޖެ ހާލަތެއްގައި އެ ކަން ކުރަން ކެރޭނެތޯ ސުވާލު ކުރުމުން އިންތި ދެން ވެސް ވިދާޅުވީ "މިނިވަން ވާނެ" ކަމަށެވެ. ނަމަވެސް ނަޝީދާއި އޭނާ ވެސް ބޭނުންވަނީ ޕާޓީގެ އަސާސްތައް ހިފަހައްޓަން ކަމަށް އޭނާ ވިދާޅުވި އެވެ.
"ރައީސް ނަޝީދު ވެސް ނަގަހައްޓަވަން ބޭނުން ވަނީ ޕާޓީގެ ވެލިއުސްތަކާއި އަސާސްތައް، އަޅުގަނޑު ވެސް ބޭނުން ވަނީ އެ ކަންކަން، އެހެންވެ އަޅުގަނޑުމެންގެ ހިޔާލު، ވިސްނުން، ވަރަށް ގިނައިން އެއްގޮތްވާނެ، ހިޔާލު އެއްގޮތްވީތީ އެ ކަހަލަ ހީވުންތަކެއް ވެސް އެ އުޅެނީ،" އިންތި ވިދާޅުވި އެވެ.
ޗެއާޕާސަންގެ އިންތިހާބާ އެކު އެމްޑީޕީގެ އެތެރޭގެ ކޯޅުން އަނެއްކާ ވެސް ވަނީ ބޮޑުވެފަ އެވެ. ދެ ފެކްޝަންގެ ސަޕޯޓަރުންނާއި އިސް ބޭފުޅުންގެ މެދުގައި އަންނަނީ ބަހުގެ ހަމަލާތައް ވެސް ރައްދު ކުރެވެމުންނެވެ. އިންތިއާއި ފައްޔާޒު ވެސް ވިއްކަމުން ދަނީ ޕާޓީ އެކަތިގަނޑަކަށް ހަދާނެ ކަމުގެ ވައުދުތަކެކެވެ.
