މޮނާކޯ، ފްރާންސް (އޭޕްރީލް 3) - އިޓަލީގެ އަރަމުން އަންނަ ޓެނިސް ތަރި ޔަނިކް ސިނާގެ ރެކޯޑެއް، އެކާވީސް ވަނަ ގަރުނުގައި މިހާތަނަށް ފެނުނު އެންމެ މޮޅު ތިން ޓެނިސް ކުޅުންތެރިން ކަމަށްވާ ސްވިޒަލެންޑްގެ ރޮޖާ ފެޑެރާ، ސްޕެއިނުގެ ރަފައެލް ނަޑާލް އަދި ސާބިއާގެ ނޮވަކް ޖޮކޮވިޗަށް ވުރެ ރަނގަޅުކަން ފާހަގަކުރެވިއްޖެ އެވެ.
އުމުރުން 20 އަހަރުގެ ސިނާ، މިހާރު ކުރިއަށްދާ މިއާމީ އޯޕަންގެ މެޗުތަކުގައި ދެއްކި ކުޅުމާ އެކު އޭނާ އަށް ވަނީ ޒުވާން އުމުރުގައި ޓެނިހުގެ ރަނގަޅު ރެކޯޑެއް ލިބިފަ އެވެ.
ސިނާ އަކީ 21 އަހަރު ފުރުމުގެ ކުރިން އެންމެ ގިނަ މެޗުތަކުގައި މެޗު ޕޮއިންޓްތައް އަނބުރާލައި ނަތީޖާ ނެރުނު ކުޅުންތެރިޔާ އެވެ. އުމުރުން 20 އަހަރުގައި ސިނާ މިހާތަނަށް ވަނީ 14 މެޗު ޕޮއިންޓް އަނބުރާލައި، ހަ މެޗުން މޮޅުވެފަ އެވެ. މިއީ ޓެނިހުގެ ގިނަ ތަޖުރިބާކާރުންގެ ލޯ އަމާޒުވެފައިވާ ކަމެކެވެ.
ޒުވާން އުމުރުގައި ސިނާގެ ރެކޯޑާއި މަޝްހޫރު ތިން ކުޅުންތެރިންގެ ރެކޯޑާ ވަނީ އަޅާކިޔައިފަ އެވެ. އެ ގޮތުން ފެޑެރާ އެ އުމުރުގައި ހަ މެޗުން މޮޅުވިއިރު، އޭނާ އަށް އަނބުރާލެވުނީ 10 މެޗު ޕޮއިންޓެވެ. ދާދި ފަހުން 21 ގްރޭންޑް ސްލޭމް ތަށީގެ ރެކޯޑް ހާސިލްކުރި ނަޑާލަށް އުމުރުން 21 އަހަރު ފުރުމުގެ ކުރިން ހަތަރު މެޗު ޕޮއިންޓް ހާލަތު އަނބުރާލައި ތިން މެޗުން މޮޅުވި އެވެ. އަދި ދުނިޔޭގެ އެއް ވަނައިގައި އޮތް ޖޮކޮވިޗަށް ޒުވާން އުމުރުގައި އަށް މެޗު ޕޮއިންޓް އަނބުރާލެވުނުއިރު، މޮޅުވެވުނީ އޭގެއިން ދެ މެޗުންނެވެ.
ޓެނިހުގެ ތަޖުރިބާކާރުން ގަބޫލުކުރާގޮތުގައި ސިނާގެ ތަފާތަކީ މެންޓަލީ ވަރުގަދަ ވުމާއި ގޮތްދޫނުކޮށް މެޗު ނިމެންދެން އެ ކުރާ ހިތްވަރެވެ.
މި ފަހަރުގެ މިއާމީ އޯޕަންގެ ކުރިން ދުބާއީ މުބާރާތުގައި ސިނާގެ ފަރާތުން ފެނުނު ކުޅުމާ އެކު ޓެނިހުގެ ތަޖުރިބާކާރުންގެ ނަޒަރުގައި ސިނާ އަކީ މުސްތަގުބަލުގައި ވިދާލާނެ ތަރިއެކެވެ.
ސިނާގެ އިތުރުން ދެން އެންމެ ގިނަ ބަޔެއްގެ ލޯ އަމާޒުވާ ޓެނިސް ކުޅުންތެރިއަކީ ސްޕެއިނުގެ 18 އަހަރުގެ ތަރި ކާލޯސް އަލްކަރާޒް އެވެ. މިއާމީ އޯޕަންގެ ފައިނަލުގައި އަލްކަރާޒް މިރޭ ކުޅޭނީ ނޯވޭގެ ކެސްޕާ ރޫޑްއާ ދެކޮޅަށެވެ.
