ގާނޫނީ ހުސްކަމެއްގައި އޮތް އެންޓި ކޮރަޕްޝަން ކޮމިޝަން (އޭސީސީ)ގެ މެމްބަރު ކަމަށް އައްޔަނުކުރަން ރައީސް އިބްރާހިމް މުހައްމަދު ސޯލިހު ހުށަހެޅުއްވި ފަސް ބޭފުޅުންނަށް ރައްޔިތުންގެ މަޖިލީހުން ރުހުން ދިނުމާ އެކު، މަގާމުގެ މަސްއޫލިއްޔަތާ މިއަދު ހަވާލުވެއްޖެ އެވެ.
ރައީސް އޮފީހުގައި މިއަދު ބޭއްވި ރަސްމިއްޔާތުގައި އެ ފަސް މެމްބަރުންނަށް މަގާމުގެ ހުވާ ލައިދިނީ އުއްތަމަ ފަނޑިޔާރު މުއުތަސިމް އަދްނާނެވެ. މަގާމުގެ ފަތްކޮޅު އެރުވީ ރައީސުލްޖުމްހޫރިއްޔާގެ އަތްޕުޅުންނެވެ.
ކޮމިޝަންގެ އާ ދައުރުގެ ރައީސްއަކަށް އައްޔަން ކުރެއްވީ އާދަމް ޝާމިލެވެ. އަދި ނައިބަކަށް އަބްދުއްސަލާމް އެވެ.
ޝާމިލް އެންމެފަހުން ހުންނެވީ ޗިލްޑްރަންސް އޮމްބަޑްސްޕާސަން އޮފީހުގެ އިންވެސްޓިގޭޝަން އެންޑް ލީގަލް ޑިޕާޓްމަންޓުގެ ޑިރެކްޓަރެއްގެ މަގާމުގަ އެވެ. އޭނާ ވަނީ ގާނޫނީ ދާއިރާއިން މާސްޓާސް ހާސިލްކުރައްވާފަ އެވެ.
ސަލާމް އެންމެފަހުން ހުންނެވީ ވަނީ އެންޓިކޮރަޕްޝަން ކޮމިޝަނުގެ ސީނިއާ އިންވެސްޓިގޭޝަން އޮފިސަރުގެ މަގާމުގަ އެވެ. އޭނާ ވެސް ތައުލީމް ހާސިލްކުރެއްވީ ގާނޫނީ ދާއިރާއިން ކަމަށެވެ.
ދެން އެ ކޮމިޝަންގެ މެމްބަރުންގެ ގޮތުގައި އައްޔަން ކުރެއްވީ ތޯހާ މުހައްމަދާއި، ޝަޒްނާ ހާޝިމް އަދި ޝިޔާމާ މުހައްމަދެވެ.
ތޯހާއަކީ ރައީސުލްޖުމްހޫރިއްޔާ އުފައްދެވި "ފްލެޓްތަކުގެ މައްސަލަބަލާ ކޮމެޓީ"ގެ މެންބަރުކަން ވެސް ކުރެއްވި ބޭފުޅެކެވެ. އޭގެ އިތުރުން އޭނާއަކީ ދަ ލިޓިޖެންޓްސް އެލްއެލްޕީ ލޯ ފާމްގެ ޕާޓްނަރެއް ވެސް މެއެވެ. ތޯހާ ވެސް ތައުލީމް ހާސިލްކުރީ ގާނޫނީ ދާއިރާއިންނެވެ.
ދެން އެ ކޮމިޝަނަށް އައްޔަން ކުރި ޝަޒްނާ ހާޝިމް އެންމެ ފަހުން ހުންނެވީ ހައުސިން މިނިސްޓްރީގެ ޑިރެކްޓަރެއްގެ މަގާމުގަ އެވެ. އެކައުންޓް ދާއިރާއިން ފުރަތަމަ ޑިގްރީ އޭނާ ހާސިލްކުރެއްވީ މިސްރުގެ އަލް އަޒްހަރު ޔުނިވާސިޓީންނެވެ.
ޝިޔާމާ މުހައްމަދު އެންމެފަހުން ހުންނެވީ އިލެކްޝަންސް ކޮމިޝަނުގެ ޑެޕިއުޓީ ޑިރެކްޓަރުގެ މަގާމުގަ އެވެ. އޭނާ ވަނީ ވިލާ ކޮލެޖުން މާސްޓާ އޮފް ޝަރީއާ ހާސިލު ކުރައްވާފަ އެވެ.
