މަސްތުވާތަކެތީގެ މައްސަލަތަކުގައި ނިޒާމުގެ ތެރޭގައި ހުރި ލޫޕްހޯލްތައް ބޭނުންކޮށްގެން ގަސްދުގައި ގޯސްހަދާ ފަރާތްތައް ފުލުހުންގެ ތެރޭގައި ތިބި ކަމަށް އެޓާނީ ޖެނެރަލް އިބްރާހީމް ރިފްއަތު މިދިޔަ މަހު ވިދާޅުވި ނަމަވެސް, ހޯމް މިނިސްޓަރު އިމްރާން އަބްދުﷲ މިއަދު އެ ވާހަކަ ދޮގުކުރައްވައިފި އެވެ.
ރައްޔިތުންގެ މަޖިލީހުގެ ޖުޑިޝަރީ ކޮމިޓީގައި އޭޖީ ދެއްކެވި އެ ވާހަކައާ ގުޅިގެން ލިއުމުން ޖަވާބު ހޯއްދަވަން މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ކުރެއްވި ސުވާލަކަށް ފޮނުއްވި ޖަވާބުގައި އިމްރާން ވިދާޅުވީ ފުލުހުންނަކީ އެކަށީގެންވާ ތައުލީމާއި ތަމްރީނު ލިބިގެން އިހުލާސްތެރިކަމާ އެކު މަސައްކަތް ކުރާ ގާބިލު ބައެއް ކަަމަށެވެ. އަދި އޭޖީ އެވިދާޅުވި ފަދަ ގޮތަކަށް ގަސްދުގައި ގޯސްހަދާ ބަޔަކު ފުލުުހުންގެ ތެރޭގައި ތިބިކަމަށް ބުނުމަކީ އެންމެ ރަނގަޅުގޮތެއް ނޫން ކަމަށް ވެސް އިމްރާން ވިދާޅުވި އެވެ.
ކޯޓުތަކުގައި މައްސަލަތައް ލަސްވާ މައްސަލައާ ގުޅޭ ގޮތުން ކަމާ ބެހޭ އިދާރާތަކުގެ ވެރިންނާ އެކު ރައްޔިތުންގެ މަޖިލީހުގެ ޖުޑިޝަރީ ކޮމިޓީން 17 ފެބްރުއަރީގައި ބޭއްވި ބައްދަލުވުމުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން ރިފްއަތު ވިދާޅުވީ، ގޯސްހަދާ ފަރާތްތައް ފުލުހުންގެ އިދާރާއާއި ތަހުގީގީ އެހެން އިދާރާތަކުގައި ވެސް އެބަތިބި ކަމަށެވެ. އޭނާ ވިދާޅުވީ އެފަދަ ފަރާތްތަކުން ގޯސް ހަދަނީ ރޭވިގެން އިންތިޒާމްވެގެން ކުރާ ކަމެއްގެ ގޮތުގަ އެވެ.
"ހާއްސަކޮށް މަސްތުވާތަކެތީގެ މައްސަލަތަކުގައި ހަމަ ރޭވިގެން އިންތިޒާމްވެގެން ވެސް އެބަ ތަހުގީގީ އިދާރާތަކުގެ މެދުގައި ނޫނީ ފުލުހުންގެ ތެރޭގައި ނޫނިއްޔާ ދައުލަތުގެ އެހެން ތަންތަނުގައި ވެސް އެބަ ތިބި ހަމަ ގޯސް ހަދާ މީހުން،" ރިފްއަތު އެ ދުވަހު ވިދާޅުވި އެވެ.
އެވާހަކައާ ގުޅުވައި ހަސަން ލަތީފު ކުރެއްވި ސުވާލަށް ލިއުމުން ދެއްވި ޖަވާބުގައި އިމްރާން ވިދާޅުވީ އެފަަދަ މީހުން ފުލުހުންގެ ތެރޭގައި ތިބިކަން މިހައިތަނަށް ފާހަގަކުރެވިފައި ނުވާ ކަމަށެވެ.
"...ފުލުހުންގެ ތެރޭގައި، ނިޒާމު ރަނގަޅަށް އެނގި، ނިޒާމުގެ ތެރޭގައި ހުރި ލޫޕްހޯލްތައް ހޯދައިގެން ގޯސްހަދާ މީހުން އެކަން އެގޮތަށް ކުރަނީ ގަސްދުގައި ނުނިޔަތެއް ބާއްވައިގެން ކަމަށް ބަންޑާރަނައިބު އިޝާރާތްކުރައްވާފައިވާ ކަމަށް ސުވާލުގައި ބަޔާންކުރައްވާފައި ވީ ނަމަވެސް އެފަދަ މީހުން ދިވެހި ފުލުހުންގެ ހިދުމަތުގައި ތިބިކަން މިހައިތަނަށް ފާހަގަކުރެވިފައި ނުވާތީ ބަންޑާރަނައިބު ވިދާޅުވިކަމަށް ބަޔާންކުރައްވާފައިވާ ވާހަކަފުޅާ ގުޅޭ ގޮތުން ދިވެހި ފުލުހުންގެ ހިދުމަތުން މިހައިތަނަށް އެއްވެސް މަޝްވަރާއެއް ބަންޑާރަނައިބާ ކޮށްފައި ނުވާ ކަމަށް ދަންނަވަމެވެ،" އިމްރާން މަޖިލީހަށް ފޮނުއްވި ސިޓީގައި ވިދާޅުވި އެވެ.
އޭޖީ ވިދާޅުވި ގޮތަށް ކަންތައްކުރާ ފުލުހުން ތިބިކަން ފާހަގަކުރެވިފައިވާ ނަމަ އަޅާފައި ވަނީ ކޮން ފިޔަވަޅެއްތޯ ވެސް ސުވާލުގައި ހަސަން ލަތީފު އެއްސެވި އެވެ. އެ ސުވާލަށް ޖަވާބު ދެއްވަމުން އިމްރާން ވިދާޅުވީ ގަސްދުގައި ގޯސް ހަދާ ބަޔަކު ފުލުހުންގެ ތެރޭގައި ތިބިކަމަށް ބުނުމަކީ އެންމެ ރަނގަޅު ގޮތް ކަމަށް ދެކެވަޑައިނުގަންނަވާ ކަމަށެވެ. އެެހެން ނަމަވެސް މައްސަލަތައް ތަހުގީގުކުރުމާއި ދައުވާކުރަން ފޮނުވުން ފަދަ މަސައްކަތްތަކަކީ ވަރަށް ބުުރަ މަސައްކަތްތަކެއް ކަމަށް ވާއިރު، ޕާފޯމެންސް ދަަށްވެގެން ބައެއް މީހުންނާ މެދު އިދާރީ ފިޔަވަޅު އަޅާފައިވާ ކަމަށް ވެސް އޭނާ ވިދާޅުވި އެވެ.
މަސްތުވާތަކެތީގެ ވިޔަފާރި ހުއްޓުވަން ފުލުހުން މިދިޔަ ތިން އަހަރު ކޮށްފައިވާ މަސައްކަތްތަކުގެ ބައެއް ތަފާސް ހިސާބުވެސް އިމްރާންގެ ޖަވާބުގައި ހިމެނުއްވި އެވެ.
"...މައްސަލައެއްގައި ނުނިޔަތެއް ބާއްވައިގެން އެއްވެސް ކަމެއް ހިންގާފައިވާ ކަމަށް ތުހުމަތުކޮށް މުވައްޒަފެއްގެ މައްޗަށް މިހައިތަނަށް މައްސަލައެއް ހުށަހެޅިފައެއް ނުވެ އެވެ. ނަމަވެސް ދާދިފަހުން ކުރިއަށް ގެންދެވުނު މަސްތުވާތަކެތީގެ މައްސަލައެއްގައި ބަލައި ފާސްކުރި ތަކެތީގެ އިންވެންޓްރީ ހެދުމަށް ފަހު މުވައްޒަފަކު ހަނދާން ނެތިގެން އެތަކެތި ނުދީ އޮތުމުގެ ސަބަބުން އެތަކެތި އެނަލައިޒްކުރެވިފައި ނުވާތީ އެތަކެތިން ލިބިދާނެކަމަށް ފުލުހުންގެ އިންޓެލިޖެންސަށް ބެލެވުނު މުހިއްމު ހެކިތަކެއް ގެއްލިގެން ގޮސްފައިވާ ކަމަށް ބެލެވުނު މައްސަލައެއް ބަލައިދިނުމަށް އެދި ޕްރޮސެކިއުޓާ ޖެނެރަލްގެ އޮފީހުން 26 ޖެނުއަރީ 2022 ގައި ދިވެހި ފުލުހުންގެ ހިދުމަތަށް ހުށަހަޅުއްވާފައިވާކަން ފާހަގަކުރަމެވެ،" އިމްރާން ވިދާޅުވި އެވެ.
އެ މައްސަލައިގައި ސުވާލުކުރަން ޖެހޭ ފުލުހުންގެ ޕްރޮފެޝަނަލް ސްޓޭންޑާޑް ކޮމާންޑުން ސުވާލުކޮށްފައިވާ ކަމަށާއި އެހެން ނަމަވެސް އެކަމުގައި އަދި ގޮތެއް ނިމިފައި ނުވާ ކަމަށް ވެސް އޭނާ ވިދާޅުވި އެވެ.
