ހުޅުމާލޭ ބީޗު ފްރަންޓުން 26 ބިން ވިއްކަައިގެން އެޗްޑީސީއަށް މަދުވެގެން 377 މިލިއަން ރުފިޔާގެ އާމްދަނީއެއް ލިބޭނެ ކަމަށް ހިސާބުތަކުން ދައްކައިފި އެވެ.

އިއްޔެ ކުރިޔަށް ގެންދިޔަ ބީލަން ކާމިޔާބު ކުރި ފަރާތްތަކުގެ ލިސްޓު އެޗްޑީސީން އާންމުކޮށްފައިވާއިރު، ޖުމްލަ 211 މީހަކު މި ބިންތަކަށް އަގު ހުށަހެޅި އެވެ.

އޭގެ ތެރެއިން އަށް މީހަކު ހުށަހެޅި ބިޑުތައް، އެކި ސަބަބުތަކާ ހުރެ ބާތިލުކުރުމަށް ފަހު އެޗްޑީސީން ބަލައިގަތީ 203 ބިޑެވެ. ބީލަން ކާމިޔާބުކުރީ އަކަފޫޓަކަށް އެންމެ މަތިން އަގު ހުށަހެޅި 26 މީހުންނެވެ.

ދެން އެންމެ މަތިން އަގު ހުށަހެޅި ފަސް މީހުން ވަނީ ވެއިޓުލިސްޓު ކުރެވިފަ އެވެ.

ބިޑު ކާމިޔާބުކުރަން އެންމެ މަތިން އަގު ހުށަހެޅި މީހާ ޖެހީ އަކަފޫޓަކަށް 10 މިލިއަން ރުފިޔާ އެވެ. މިއީ އޮޅިގެން ޖެހުނު އަދަދެއް ކަމަށް ގަބޫލު ކުރެވުނު ނަމަވެސް، ހުރިހާ ލިޔެކިޔުންތަކެއް ހަަމަވުމުން އެޗްޑީސީން ވަނީ ބިޑު ބަލައިގެންފަ އެވެ.

ދެވަނައަށް ހުށަހެޅި އެންމެ މަތީ އަގަކީ އަކަފޫޓަކަށް 10،220ރ. އެވެ. ބިޑު ކާމިޔާބު ކުރި އެންމެ ދަށް އަގަކީ އަކަފޫޓަކަށް 6759.11ރ. އެވެ.

އެންމެ މަތިން ހުށަހެޅި އަކަފޫޓަކަށް 10 މިލިއަން ރުފިޔާގެ ބިޑު ނުހިމަނާ، ކާމިޔާބު ކުރި ބިޑުތަކުގެ އެވަރެޖު އަގަކީ އަކަފޫޓަކަށް 7،779.42 އެވެ. ވެއިޓް ލިސްޓުގެ އެއްވަނައިގައިވާ މީހާގެ ބިޑު ހިމެނުމުން އަކަފޫޓަކަށް ޖެހޭ އެވަރެޖަކީ 7،737.91ރ. އެވެ.

މިއީ ބީލަން ފެށި އަގު ކަމުގައިވާ އަކަފޫޓަކަށް 3،900ރ. ރޭޓަށް ވުރެ ގާތްގަނޑަކަށް ދެ ގުނަ ބޮޑު އަދަދެކެވެ. އަދި ޕަސެންޓުން ނަމަ 98.4 ޕަސެންޓު އިތުރުވުމެކެވެ.

އެންމެ ކުޑަ ރޭޓުން ވިކުނަސް 377.4 މިލިއަން

އެޗްޑީސީން ކަނޑައެޅި އެންމެ ކުޑަ ރޭޓުގައި ބީޗު ފްރަންޓު ބިންތައް ވިކުނު ނަމަ އެ ކުންފުންޏަށް ލިބޭނީ 217.7 މިލިއަން ރުފިޔާ އެވެ.

ބީލަން ކާމިޔާބުކުރި ބިޑުތަކުގެ ތެރެއިން އެންމެ ކުޑަ ރޭޓަށް ބެލި ނަމަވެސް މި ބިންތަކުން އެކަނި 377.4 މިލިއަން ރުފިޔާ އެޗްޑީސީއަށް ލިބޭނެ އެވެ. މިއީ ބީލަން ފެށި އަގުގައި ވިކުނު ނަމަ ލިބޭނެ ކަމަށް ލަފާކުރި އާމްދަނީއަށް ވުރެ ވުރެ 159.6 މިލިއަން ރުފިޔާ ނުވަތަ 73.31 ޕަސެންޓު އިތުރު އަދަދެކެވެ.

ކާމިޔާބުކުރި ބިޑުތަކުގެ އެވެރެޖު ރޭޓުން ހުރިހާ ބިމެއް ހިސާބު ކުރާ އިރު އެޗްޑީސީއަށް 432 މިލިއަން ރުފިޔާ ވަންނާނެ އެވެ.

މިހެން ހިސާބުތަކުން ދެއްކި ނަމަވެސް ބިންތައް ވިއްކައިގެން ލިބޭ ސީދާ އަދަދު އެނގޭނީ ބިޑު ކާމިޔާބުކުރި މީހުން ހިޔާރު ކުރާ ޕްލޮޓުތައް އެނގުނީމަ އެވެ. ސަބަބަކީ ވިއްކާލާ ޕްލޮޓުތަކުގެ ސައިޒު ތަފާތު ވީމަ އެވެ.

ބީލަން ކަރުދާހުގައި ބުނާ ގޮތުން ބިޑު ކާމިޔާބުކުރި މީހުން ބޭނުންވާ ބިން ހިޔާރު ކުރުން އޮންނާނީ މި މަހު 21 ގަ އެވެ. މިކަން ކުރިޔަށް ދާނީ އެންމެ ބޮޑު އަގު ހުށަހެޅި މީހާއަށް އިސްކަންދޭ ތަރުތީބުންނެވެ.

މި ހުރިހާ އަދަދުތަަކެއް ވެސް ހިސާބުކުރީ އެންމެ މަތިން ބިޑު ކާމިޔާބުކުރި މީހާ ބިން ނުގަންނާނެ ކަމަށް ބަލާފަ އެވެ. އެ އަގުގައި އެންމެ ކުޑަ ޕްލޮޓު ވިކުނަސް 16.7 ބިލިއަން ރުފިޔާ ލިބޭނެ އެވެ. މިއީ މި އަހަރު ދައުލަތަށް ލިބޭނެ ކަމަށް ލަފާކުރާ 24.4 ބިލިއަން ރުފިޔާގެ 70 ޕަސެންޓާ ގާތްކުރާ އަދަދެކެވެ.

އަކަފޫޓަކަށް 10 މިލިއަނުގެ ބިޑަށް ވާނީ ކިހިނެއް؟

ބީލަން ކަރުދާސް ބުނާ ގޮތުން ބިޑު ކާމިޔާބުކުރި އެއްވެސް މީހަކު ބީލަމުގެ އެއްވެސް މަރުހަލާއެއްގައި ބިޑު އަނބުރާ ގެންދާނަަމަ އެކަން އެޗްޑީސީއަށް ލިޔުމުން ނޫނީ އީމެއިލްގެ ޒަރިއްޔާއިން އަންގަން ޖެހެ އެވެ. އެއަށް ފަހު އެ މީހާގެ ބިޑު ބާތިލުކުުރުމަށް ފަހު ބިޑް ސެކިޔުރިޓީ އެޗްޑީސީއަށް ނަގާނެ އެވެ.

ބީޗު ފްރަންޓު ބިންތަކަށް އެޗްޑީސީން ބީލަން ބަލައިގަތީ 320،000ރ. ބިޑު ސެކިޔުރިޓީއަށް ބަހައްޓާ ގޮތަށެވެ. ބިޑު ކާމިޔާބު ނުވާ ހުރިހާ އެންމެނަށް މި ފައިސާ އަނބުރާ ލިބޭނެ އެވެ. އަދި ބިޑު ކާމިޔާބުކުރި މީހުންނަށް ބިމަށް ދައްކާ ފައިސާގެ ތެރޭގައި ބިޑު ސެކިޔުރިޓީ ހިމެނޭނެ އެވެ.

އެހެންކަމުން އަކަފޫޓަކަށް 10 މިލިއަން ރުފިޔާ ހުށަހެޅި މީހާ އެ ބިން ނުގަންނަ ނަމަ، އެ ބިޑް ސެކިޔުރިޓީ ފައިސާ ލިބޭނީ އެޗްޑީސީއަށެވެ. އޭނާގެ ބަދަލުގައި އެ ބިން ގަންނަން ފުރުސަތު ލިބޭނީ ވެއިޓް ލިސްޓުގެ އެއްވަނައިގައިވާ މީހާއަށެވެ.