މާލޭގެ މަގުތަކުން ޕާކިން ސްލޮޓް ދޫކުރުމަށްޓަކައި އެކުލަވާލަންޖެހޭ އުސޫލާއި ޕާކިން ސްލޮޓްތައް ހަދާ ތަނުގެ ލޭންޑް ޔޫޒް ޕްލޭން މިނިސްޓްރީ އޮފް ޓްރާންސްޕޯޓަށް ހުށަނާޅާނަމަ 1000 ސްލޮޓް އަމިއްލަ ފަރާތްތަކަށް އުމުރު ދުވަހަށް ނުވިއްކޭނެ ކަމަށް އެ މިނިސްޓްރީން މާލެ ސިޓީ ކައުންސިލަށް އަންގައިފި އެވެ.
ޓްރާންސްޕޯޓް މިނިސްޓްރީގް ސްޓޭޓް މިނިސްޓަރު އަހްމަދު ޒުހައިރު ސޮއިކުރައްވައި ވަނީ މާލޭގެ މޭޔަރު ޑރ. މުހައްމަދު މުއިއްޒު އަށް ވަކި ކަންތައްތަކެއް ފުރިހަމަކުރުމަށްފަހު މެނުވީ ޕާކިން ސްލޮޓްތައް ނުވިއްކޭނެ ކަމަށް ވިދާޅުވެ ސިޓީއެއް ފޮނުވާފަ އެވެ.
އެއްގަމު އުޅަނދު ޕާކު ކުރުމުގެ ގަވާއިދުގެ ދަށުން ބަންޑާރަ މަގުތަކުގައި ޕާކިން ޒޯނު އޮންނަ ތަން، އެކަމަށް އެކުލަވާލާ އުސޫލެއްގެ ދަށުން ހިލޭ ޕާކު ކުރެވޭނެ ސަރަހައްދުތަކާއި، ވަކި ވަގުތުތަކަކަށް ވަކި ފީއެއް ދައްކައިގެން ޕާކު ކުރެވޭނެ ސަރަހައްދުތައް ކަނޑައަޅައި، ޕާކިންގ ޒޯނުތަކެއް ހާއްސަ ކުރުމުގެ އިހުތިޔާރު ސިޓީ ކައުންސިލަށް ލިބެއެވެ.
"...ނަމަވެސް މި ކަންކުރުމުގެ ކުރިން، އެއްގަމު އުޅަނދު ޕާކު ކުރުމުގެ ގަވާއިދުގެ 4 ވަނަ މާއްދާ - ޕާކިން ޒޯނު ކަނޑައެޅުމާއި ޕާކު ކުރުމުގެ (މ) އާއި (ށ) ގައި ބަޔާން ކޮށްފައިވާ މިންގަނޑުތަކާއި އެއްގޮތަށް، އެކަމަށް އުޞޫލަކާއި، ޕާކިންގ ޒޯނުތައް ހެދުމަށްޓަކައި ސިޓީގެ ނުވަތަ ރަށުގެ ޔޫޒް ޕްލޭނާއި، ހިލޭ ޕާކު ކުރެވޭނެ ޒޯންތަކާއި، ފީ ދައްކައިގެން ޕާކު ކުރެވޭނެ ޒޯނުތައް އަންގައިދޭ އެ ރަށެއްގެ ނުވަތަ ސިޓީއެއްގެ ޗާޓު ފާސް ކުރުމަށް މި މިނިސްޓްރީ އަށް ހުށަހަޅަން ޖެހޭ،" ޓްރާންސްޕޯޓުން ސިޓީ ކައުންސިލަށް ފޮނުވި ސިޓީގައި ވެ އެވެ.
ސިޓީ ކައުންސިލުން މިފަދަ އެއްވެސް ލިޔެކިޔުމެއް ޓްރާންސްޕޯޓަށް ހުށަހަޅާފައި ނުވާއިރު އެ ކަންކަން ފުރިހަމަ ނުކޮށް މާލޭގެ މަގުތަކުން ދިގު މުއްދަތަށް ޕާކިންގ ސްލޮޓްތައް ވިއްކުމަކީ ކުރެވޭނެ ކަމެއް ނޫން ކަމަށް ޓްރާންސްޕޯޓްގެ ސިޓީގައި ވަނީ ބުނެފަ އެވެ.
"ވީމާ، މާލޭގެ މަގުތަކުން ޕާކިން ސްލޮޓް ދޫކުރުމަށްޓަކައި އެކުލަވާލަންޖެހޭ އުސޫލާއި، ޕާކިން ސްލޮޓްތައް ހަދާ ތަނުގެ ލޭންޑް ޔޫޒް ޕްލޭން މި މިނިސްޓްރީ އަށް ހުށަހަޅުއްވައިގެން ގަވާއިދާ އެއްގޮތަށް ކުރިޔަށް ގެންދިއުމަށް ދެންނެވިން،" އިއްޔެ ފޮނުވާފައިވާ އެ ސިޓީގައި ބުނެފައިވެ އެވެ.
ޕާކިން ޖާގަ ވިއްކުން މަޑުޖައްސާލަން އެލްޖީއޭގެ ސީއީއޯ އަފްޝަން ލަތީފް ވެސް ވަނީ މިއަދު މާލެ ސިޓީގެ މޭޔަރު ޑރ. މުހައްމަދު މުއިއްޒު އަށް އަންގާފަ އެވެ.
އެ ސިޓީގައި އަފްޝަން ވިދާޅުވެފައި ވަނީ މާލެ ސިޓީ ކައުންސިލު އިދާރާއިން އަމިއްލަ ފަރާތްތަކަށް ބިން ވިއްކުމަށް ނިންމާ އެކަމުގެ އަމަލީ މަސައްކަތް ކައުންސިލުން ކުރިއަށް ގެންދާކަމުގެ ޝަކުވާ އެކި ފަރާތްތަކުން އެ އޮތޯރިޓީއާ ހިއްސާކުރަމުން އަންނަ ކަމަށެވެ.
މާލެއިން 1000 ޕާކިން ސްލޮޓު ވިއްކުމަށް މަސައްކަތް ކުރަނީ ޕާކިން ސްލޮޓުތަކެއް ގުރުއަތު ނަގައިގެން ދޫކުރުމަށް ނިންމި ނިންމުން ބަދަލު ކުރުމަށްފަހު އެވެ. ގާތްގަނޑަކަށް 211 ޕާކިން ޖާގަ ދޫކުރުމަށް ނިންމާފައި އޮއްވާ އެ މަސައްކަތް ހުއްޓާލީ އޭގައި މައްސަލަތަކެއް ހުރުމުން އެންޓި ކޮރަޕްޝަން ކޮމިޝަނުން އަންގައިގެނެވެ.
ޕާކިން ސްލޮޓުތައް ވިއްކުމަށް މަސައްކަތް ކުރާއިރު ޕާކު ކުރާނެ ޖާގަ ނެތުމަކީ ގާތްގަނޑަކަށް 150،000 މީހުން ދިރިއުޅޭ މާލެއަށް ދިމާވެފައިވާ އިޖްތިމާއީ އެންމެ ބޮޑު އެއް މައްސަލަ އެވެ. އދ. ގެ އޮފީހަކުން ރާއްޖޭގައި ހެދި ދިރާސާއަކުން ދައްކާ ގޮތުގައި ހައެއްކަ އަކަ ކިލޯމީޓަރުގެ ކުޑަ މާލޭގައި އެކަނި ވެސް 72،000 ވެހިކަލް ދުއްވަ އެވެ. ރަސްމީ ތަފާސްހިސާބުތަކުން ދައްކާ ގޮތުގައި 2018 ވަނަ އަހަރުގެ ނިޔަލަށް މާލެއަށް އެކަނި 82،000 ސައިކަލު ރަޖިސްޓްރީކޮށްފައިވެ އެވެ.
