ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރު މުހައްމަދު ރާޝިދުގެ ރައްޔިތުންގެ މަޖިލީހުގެ މެމްބަރުކަމުގެ ހުވާ މިއަދު ކުރައްވައިފި އެވެ.
މަޖިލީހުގެ ރައީސް މުހައްމަދު ނަޝީދުގެ ކުރިފުޅުމަތީގައި އެ މަޖިލީހުގައި މިއަދު 8:30 ގައި ބޭއްވި ހަފްލާއެއްގައި ރަޝީދަށް ހުވައިލައްވައިދިނީ ސުޕްރީމް ކޯޓުގެ ފަނޑިޔާރު ހުސްނުއް ސުއޫދެވެ.
ޕީޕީއެމްގެ ކެންޑިޑޭޓް މޫސާ ފަތުހީ އާއި އެމްއެންޕީގެ ކެންޑިޑޭޓް އަބްދުލްހަންނާނު އިދުރީސްއާ ވާދަ ކުރައްވައި ކޮމަންޑޫ ދާއިރާގެ އިންތިހާބު މިދިޔަ ހޮނިހިރު ދުވަހު ރާޝިދު ކާމިޔާބު ކުރެއްވީ 1401 ވޯޓު ހޯއްދަވައިގެނެވެ. އެއީ ވޯޓުދިން މީހުންގެ ތެރެއިން 48.5 ޕަސެންޓު މީހުންގެ ވޯޓެވެ.
ރާޝިދު ހުވާ ކުރެއްވުމަށްފަހު މަޖިލީހުގެ ގޯތި ތެރޭގައި މެމްބަރުން ތިއްބަވާ ކުޑަ ކައިރީގައި: މިއީ ރާޝިދު މަޖިލީހަށް ނިކުމެވަޑައިގަންނަވާ ފުރަތަމަ ދުވަސް -- ފޮޓޯ:
އެ އިންތިހާބުގައި ޕީޕީއެމްގެ ކެންޑިޑޭޓް ފަތުހީއަށް ލިބިވަޑައިގަތީ 1161 ވޯޓެވެ. އެއީ ވޯޓު ދިން މީހުންގެ 40 ޕަސެންޓު ވޯޓެވެ. އަލަށް ސިޔާސީ މައިދާނަށް އުފަންވި އެމްއެންޕީގެ ހަންނާނަށް ލިބިވަޑައިގަތީ އެންމެ 323 ވޯޓެވެ. އެއީ ވޯޓުދިން މީހުން ތެރެއިން 11 ޕަސެންޓެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަނެއް ބާއްވަންޖެހުނީ އެ ދާއިރާގެ ކުރީގެ މެމްބަރު ހުސެއިން ވަހީދު ޑިސެމްބަރު 14، 2021 ގައި އަވަހާރަވުމުންނެވެ. ހުސެއިން އަވަހާރަވީ ކެންސަރުގެ ބަލީގައި ފަރުވޯ ހޯއްދަމުން ގެންދަވަނިކޮށް މާލޭގެ އޭޑީކޭ ހޮސްޕިޓަލުގަ އެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ އިންތިހާބު ވެރިކަން ހިންގާ އެމްޑީޕީން ކާމިޔާބު ކުރެއްވީ އެ އިންތިހާބަށް ނުފޫޒު ފޯރުވައިގެން ކަމަށް އިދިކޮޅު ފަރާތްތަކުން އަންނަނީ ނުފޫޒު ފޯރުވަމުންނެވެ. އެ އިންތިހާބާ ދިމާކޮށް، މި އަހަރުގެ ބަޖެޓުގައި ހިމެނުމަކާ ނުލައި، ސަރުކާރުން 250 މިލިއަނަށްވުރެ ގިނަ ރުފިޔާގެ ޕްރޮޖެކްޓުތައް އެ ދާއިރާއަށް އިއުލާން ކުރި އެވެ.
