މާލެއާ ކައިރީގައި އޮންނަ ގިރާވަރު ފަޅު ހިއްކައި އެތަނުން ގޯތި ދޫކުރުމުގެ މަޝްރޫއުއެއް ފެށުމަށް ނިންމަވާފައިވާކަން ރައީސް އިބްރާހިމް މުހައްމަދު ސޯލިހު މިއަދު އިއުލާން ކުރައްވައިފި އެވެ.
މާލޭ ކައިރިން އިތުރު ފަޅެއް ހިއްކައި އެތަނުން ގޯއްޗާއި ފްލެޓް ދިނުމުގެ ވިސްނުން ގެންގުޅުއްވާކަން މީގެ ކުރިން ވެސް އެކި ފަހަރު މަތިން ރައީސް ހާމަ ކުރައްވާފައިވެ އެވެ. ނަމަވެސް, ހިއްކަން ނިންމާފައިވަނީ ވަކި ކޮން ފަޅެއް ކަމެއް ކުރިއަކުން ވިދާޅެއް ނުވެ އެވެ.
މި އަހަރު ރައްޔިތުންގެ މަޖިލިސް ހުޅުވަން ބޭއްވި ޖަލްސާގައި ރިޔާސީ ބަޔާން އިއްވަމުން ރައީސް ސޯލިހު ވިދާޅުވި ގޮތުގައި, ގިރާވަރު ފަޅު ހިއްކާ އެ ބިމުން މަދުވެގެން 2,000 ގޯތި މާލޭ ރަށްވެހިންނަށް ދޭނެ އެވެ. އަދި, ގިރާވަރު ފަޅަކީ މި ސަރުކާރުން ހިންގާ އެންމެ ބޮޑު މަޝްރޫއު ކަމަށްވާ ތިލަމާލެ ބްރިޖް އެދާ ގޮތަށް ގޮސް ގުޅާލެވޭ ތަނަކަށް ވާނެ ކަމަށް ރައީސް ވިދާޅުވި އެވެ.
ގިރާވަރު ފަޅު: އެ ތަން ހިއްކައި ގޯތި ދޫކުރަން ވަނީ ނިންމާފައި
ރައީސް ސޯލިހު ވިދާޅުވި ގޮތުގައި, މާލޭގެ ރައްޔިތުންނަށް ހުޅުމާލެއިން 1,000 ގޯތި އަދި ގުޅީފަޅުން މަދުވެގެން 2,000 ގޯތި ދިނުމަށް ވެސް ނިންމާފައިވެ އެވެ.
"ބޯހިޔާވަހިކަމުގާ މާލޭގެ ރަށްޔިތުންނަށް އޮތް ދައްޗާ ތަކުލީފު ވަނީ އޭގެ ލާ ނިހާޔަތުގައި, މާލެ ސަރަހައްދުގެ ބޯހިޔާވަހިކަމާ ގުޅޭ ގޮތުން ކުރެވުނު ކަންތަކަށް ވުރެ ގިނަ ވާހަކަ ދެއްކޭކަމުގެ އިހްސާސް އަބަދުވެސް އަޅުގަނޑަށްވޭ," ރައީސް ވިދާޅުވި އެވެ.
ގާނޫނު އަސާސީން ރައީސްގެ މައްޗަށް ކޮންމެ އަހަރަކު އެއް ފަހަރު އިއްވުމަށް ލާޒިމް ކޮށްފައިވާ ރިޔާސީ ބަޔާން މި އަހަރު އިއްވަމުން ރައީސް ސޯލިހު ވަނީ މާލޭގެ ރައްޔިތުންނަށް ބޮޑު ވައުދެއްވެވަޑައިގެންފަ އެވެ.
އެގޮތުން, ރައީސް ވިދާޅުވި ގޮތުގައި އެމަނިކުފާނުގެ ރިޔާސީ މި ދައުރު ނިންމާނީ އެންމެ ބޭނުން ޖެހިފައިވާ މާލޭގެ ރައްޔިތުންނަށް އިންވަކިކޮށް ރޯނުދަމާ، ބިންކަނޑާ، ގޯތީގެފަތް ދިނުމަށްފަހު އެވެ.
"ދިވެހި ދައުލަތުގެ ހިޔާވަހި ކަމުގެ ދަށުގައިވާ ހުރިހާ ވަސީލަތެއްގެ ހިޔާވަހިކަން ރައްޔިތުންނަށް ލިބެންޖެހޭ, ބޭނުންވަނީ އެކުގާ އެއް އަމާޒެއްގާ ތިބެ އެ މަންޒިލަށް ވާސިލްވުން," ރައީސް ވިދާޅުވި އެވެ.
ރައީސް ފާހަަގަ ކުރެއްވި ގޮތުގައި 5,000 ހައުސިން ޔުނިޓްގެ މަސައްކަތް މިހާރު ހުޅުމާލޭގައި ދަނީ ކުރިއަށެވެ. އަދި ކުރިއަށް އޮތް ތަނުގައި އިތުރު 2,000 ހައުސިން ޔުނިޓްގެ މަސައްކަތް ފެށޭނެ ކަމަށް ރައީސް ވިދާޅުވި އެވެ.
އަތޮޅުތެރޭގެ ބޯހިޔާވަހިކަމަށް ހިންގާ މަޝްރޫއުގެ ދަށުން ޖުމްލަ 2,180 ގެދޮރުގެ މަސައްކަތް އެކި މަރުހަލާގައި ކުރިއަށްދާ ކަމަށާއި ގެދޮރުވެރިޔާ ލޯންގެ ގޮތުގާ 82 މީހަކަށް 42 މިލިއަނަށްވުރެ ގިނަ ރުފިޔާ ދޫކުރުމުގެ މަސައްކަތް ހިނގަމުންދާކަން ވެސް ރައީސް ފާހަގަ ކުރެއްވި އެވެ.
ރައީސް ނަޝީދުގެ ވެރިކަމުގައި ހިއްކި ގުޅީފަޅާއި ވިލިމާލެ އާއި ތިލަފުށި އަދި މާލެ ގުޅާލުމަށް ބްރިޖް އެޅުމުގެ އަމަލީ މަސައްކަތް ފެށިފައިވާކަން ވެސް ރައީސް ފާހަަގަ ކުރެއްވި އެވެ. އެ މަޝްރޫއުގެ ދަށުން ގިރާވަރު ފަޅު ވެސް އެ ބްރިޖާއެކު ގުޅިގެންދާނެކަން ރައީސް ފާހަަގަ ކުރެއްވި އެވެ. އެހެންވެއްޖެނަމަ, މާލޭ ސަރަހައްދުގެ ތޮއްޖެހުމަށް ބޮޑު ލުޔެއް އަންނާނެ ކަމަށް ގަބޫލު ކުރެއްވޭ ކަމަށް ވިދާޅުވި އެވެ.
"މި ބްރިޖްގެ ސަބަބުން މާލެ ސަރަހައްދުގެ ދިރިއުޅުމާ ވިޔަފާރިއާ އިޖްތިމާއީ ހުރިހާ ދާއިރާއަކުން ރައްޔިތުންނަށް ފަސޭހަކަމާ ކުރިއެރުމާ ދުވެލި ލިބިގެންދާނެ," ރައީސް މިއަދު ވިދާޅުވި އެވެ.
ކުރީގެ ރައީސް އަބްދުالله ޔާމީންގެ ވެރިކަމުގައި މާލޭ ކައިރީގެ އިތުރު ފަޅެއް ހިއްކައިގެން އެތަނުން ގޯތި ދޫކުރުމުގެ މަޝްރޫއުއެއް އިއުލާންކުރި އެވެ. ނަމަވެސް, ވެރިކަން ނިމުމުން އެ މަޝްރޫއު ހުއްޓުނީ އެވެ. އެއީ, ފުށިދިއްގަރު ފަޅުގައި ހިންގަން ނިންމި "ހިޔާ އެކޮންޕްލިޝްޑް" މަޝްރޫއު އެވެ. މިފަހުން ވެސް ޔާމީން ވަނީ ދެން ވެރިކަމަށް ވަޑައިގެންފިނަމަވެސް އެ މަޝްރޫއު ހިންގަވާނެ ކަމަށް ވިދާޅުވެފަ އެވެ. ޔާމީންގެ ތަސައްވަރަކީ ވެސް އެ ބިން މާލެއާ ބްރިޖުން ގުޅާލުމެވެ.
