ލަންޑަން (ސެޕްޓެމްބަރު 25) - ސާޅީސް ހަތަރު އަހަރަށް ފަހު ގްރޭންޑް ސްލޭމް ޓެނިސް މުބާރާތެއްގެ ތަށި އުފުލާލި އިނގިރޭސި ފުރަތަމަ އަންހެން ކުޅުންތެރިޔާގެ ޝަރަފް ހޯދި އުމުރުން 18 އަހަރުގެ އެމާ ރަޑުކާނޫ އޭނާގެ ކޯޗު ބަދަލުކުރަން ނިންމައިފި އެވެ.
އެމާގެ ކޯޗު އެންޑްރޫ ރިޗާޑްސަން ނެގީ މި ފަހަރުގެ ޔޫއެސް އޯޕަންއާ ދިމާކޮށެވެ. ރިޗާޑްސަންގެ އިރުޝާދާ އެކު އެމާ ވަނީ ކޮލިފައިން ބުރުގައި ވާދަކުރަމުން ގޮސް ޔޫއެސް އޯޕަން ކާމިޔާބު ކޮށްފަ އެވެ. އެމާ އަކީ ޓެނިސްގެ އޯޕަން އިރާ ފެށުނު ފަހުން ކޮލިފައިން ބުރުން ފެށިގެން ގްރޭންޑް ސްލޭމް މުބާރާތެއް ކާމިޔާބުކުރި ފުރަތަމަ ކުޅުންތެރިޔާ އެވެ.
މި ތާރީހީ ކާމިޔާބީތަކަށް ފަހު ކޯޗު ބަދަލުކުރަން ނިންމި ސަބަބު އެމާ ވަނީ މީޑިއާ އަށް ކިޔައިދީފަ އެވެ.
"އަހަރެންގެ ކެރިއަރުގެ މިހާ ހިސާބުގައި އަހަރެން ބޭނުމީ ގްރޭންޑް ސްލޭމް މުބާރާތްތަކާއި ޑަބްލިއުޓީއޭގެ ތަޖުރިބާކޮށްފައި ހުރި ކޯޗެއްގެ ދަށުން ޓްރެއިން ވާން. ދެން ކުރިމަތިލާން ޖެހޭ ޗެލެންޖްތަކަށް ހޭނެން ފަސޭހަވާނީ އެ ގޮތަށް،" އެމާ ބުންޏެވެ.
"ކޯޗު އެންޑްރޫ (ރިޗާޑްސަން) އާ އެކު އެ ވަރުގެ ބޮޑު ކާމިޔާބެއް ހޯދުމަށް ފަހު އޭނަ ދޫކޮށްލަން ޖެހޭތީ ވެސް އެހާ ފަސޭހަނޫން އިހުސާސްތަކެއް ކުރެވެނީ. އެކަމަކު ކެރިއަރަށްޓަކައި މިކަހަލަ ނިންމުން އަންނަން ޖެހޭ ފަހަރު އަންނާނެ،"
އެމާގެ ކޯޗު ރިޗާޑްސަން: ޔޫއެސް އޯޕަންގެ މެޗެއްގެ ތެރެއިން.-- ފޮޓޯ: އޭއެފްޕީ
ރިޗާޑްސަންގެ އިރުޝާދުގެ ދަށުން ވާދަކޮށް އެމާ ވަނީ ދުނިޔޭގެ ރޭންކިންގެ އެތައް ދަރަޖައެއް ކުރިއަށް ޖެހިލައިފަ އެވެ. ޔޫއެސް އޯޕަން އަށް ނުކުތްއިރު އެމާ އޮތީ ދުނިޔޭގެ 150 ވަނައިގަ އެވެ. ޔޫއެސް އޯޕަންގެ ކާމިޔާބީ އަށް ފަހު އެމާ ވަނީ ދުނިޔޭގެ ރޭންކިންގައި ހީވެސް ނުކުރާފަދަ ބޮޑު ކުރިއެރުމެއް ހޯދައިފަ އެވެ.
"އަހަރެން ދުވަަަހަކު ވެސް ހިއެއް ނުކުރަން އަހަންނަށް މިހާ އަވަހަށް ޔޫއެސް އޯޕަން ފަދަ ބޮޑު ގްރޭންޑް ސްލޭމް މުބާރާތެއް ކާމިޔާބު ކުރެވޭނެ ކަމަށް. އަދި އަހަރެން މި ވަގުތު މި އޮތީ ދުނިޔޭގެ 22 ވަނައިގައި. މިއީ އަދިވެސް އަހަންނަށް ގަބޫލުކުރަން އުނދަގޫވެފައި ހުރި ކަމެއް،" އެމާ ބުންޏެވެ.
ރަސްމީކޮށް ވަކި ކޯޗަކާ އެކު މަސައްކަތް ކުރުމުގެ ކުރިން ގިނަ ކަންތައްތަކަކަށް ބަލާނެ ކަމަށް އެމާ ވަނީ ބުނެފަ އެވެ. އެމާއާ އެކު މަސައްކަތް ކުރަން އަންހެން ޓެނިހުގެ މަޝްހޫރު ކޯޗުން ވަނީ ހުށަހަޅައިފަ އެވެ.
ކުރިއަށް އޮތް އިންޑިއަން ވެލްސް މުބާރާތުގައި ވާދަކުރުމާ މެދު ވަރަށް އަވަހަށް އެމާ ގޮތެއް ނިންމާނެ އެވެ. އެމާ ވަނީ މޮސްކޯގައި ކުރިއަށްދާ ކްރެމްލިން ކަޕްގައި ކުޅެން ނިންމައިފަ އެވެ.
އެމާގެ ޓާގެޓަކީ ނޮވެމްބަރު މަހު އޮންނަ ޑަބްލިއުޓީއޭ ފައިނަލްސްގައި ކުޅުމެވެ. ޑަބްލިއުޓީއޭ ފައިނަލްސްގެ މި ވަގުތު ރޭންކިން އަށް ބަލާއިރު އެމާ އޮތީ 14 ވަނައިގަ އެވެ. ޑަބްލިއުޓީއޭ ފައިނަލްސްގައި ވާދަކުރެވޭނީ ގަދަ އަށެއްގައި ހިމެނޭ ކުޅުންތެރިންނަށެވެ. ސީޒަނުގައި ބާކީ ހުރި މުބާރާތްތަކުގައި ރަނގަޅު ނަތީޖާތަކެއް ނެރެގެން އެމާ އަށް ގަދަ އަށެއްގެ ތެރެއަށް ވަދެވޭނެ އެވެ.
