މިއުނިކް (އޮގަސްޓް 15) - ޖަރުމަނުގެ މަޝްހޫރު ފުޓްބޯޅަ ލެޖެންޑް އަދި ބަޔާން މިއުނިކްގެ ތާރީހީ ފޯވާޑް ގާޑް މުލާ މަރުވެއްޖެ އެވެ.

އުމުރުން 75 އަހަރުގައި މުލާ މިއަދު މަރުވީ ބަލިވެ އުޅުމަށް ފަހު އެވެ. އޭނާ އަށް ވަނީ އަލްޒައިމާ ބަލިޖެހިގެން 2015 ވަނަ އަހަރު ފަރުވާ ދީފަ އެވެ. އަލްޒައިމާ އަކީ އަކީ ސިކުނޑީގެ ހަނދާނާއި ބެހޭ ބަޔަށް ޖެހޭ ބައްޔެކެވެ. ފަރުވާ އަށް ފަހު ކޮންމެ ވެސް ވަރަކަށް ރަނގަޅުވި ނަމަވެސް ބަލި ހާލަތު ގޯސްވާ ފަހަރުތަކުގައި ވަނީ ހޮސްޕިޓަލަށް ގެންގޮސްގެން ފަރުވާދީފަ އެވެ.

މުލާ މަރުވިކަން ބަޔާނާއި އޭނާގެ އާއިލާ އިން ވެސް ވަނީ މީޑިއާގައި ހާމަކޮށްފަ އެވެ.

ދުނިޔޭގެ މޮޅު ކުޅުންތެރިޔާ އަށް ދޭ ބެލޮންޑިއޯ އެވޯޑް 1970 ވަނަ އަހަރު ހޯދި މުލާ ވަނީ 1974 ވަނަ އަހަރު ޖަރުމަނާ އެކު ފީފާ ވޯލްޑް ކަޕް ވެސް ކާމިޔާބުކޮށްފަ އެވެ. އަދި 1972 ވަނަ އަހަރުގެ ޔޫރޯ ވެސް ތަށި ވެސް އުފުލާލި އެވެ. ޖަރުމަނު ގައުމީ ޓީމަށް މުލާ ވަނީ 62 މެޗުން 68 ގޯލު ޖަހައިފަ އެވެ.

މުލާ ބަޔާންގެ ކޯޗިން ސްޓާފުންގެ ކިޓްގައި.-- ފޮޓޯ: ބަޔާން މިއުނިކް

ޓީއެސްވީ ނޯޑްލިންގަން އިން ކްލަބް ކެރިއަރު ފެށި މުލާ ބޮޑަށް ވިދާލީ ބަޔާންގެ ޖޯޒީގަ އެވެ. ބަޔާނަށް 1964 އިން 1979 އާ ދެމެދު ކުޅުނުއިރު، އެ ޓީމަށް 607 މެޗުން 566 ގޯލު ވަނީ ކާމިޔާބުކޮށްދީފަ އެވެ. އަދި އެ ޓީމާ އެކު ޖަރުމަނު ލީގު ހަތަރު ފަހަރާއި ޗެމްޕިއަންސް ލީގު ތިން ފަހަރު ކާމިޔާބުކުރި އެވެ.

މުލާ އޭނާގެ ފުޓްބޯޅަ ކެރިއަރު ނިންމާލީ އެމެރިކާގެ ކްލަބެއްގައި ހުރެ އެވެ. އެ ގޮތުން 1981 ވަނަ އަހަރު ފުޓްބޯޅަ އިން ރިޓަޔާކުރުމަށް ފަހު ރާބުއިމާއި އެ ފަދަ ކަންކަމުގެ ތެރޭގައި އުޅުމުގެ ސަބަބުން މުލާގެ ސިއްހަތު ދިޔައީ ޒުވާން އުމުރުގައި ވެސް ގޯސްވަމުންނެވެ. އޭނާ އަށް ވަނީ ޑްރަގް ރިހެބިލިޓޭޝަން ސެންޓަރެއްގައި ވެސް ފަރުވާދީފަ އެވެ.

ފުޓްބޯޅައިގެ މުލާގެ ބޮޑެތި ރެކޯޑްތަކެއް މުގުރާލެވުނީ ދާދި ފަހުންނެވެ. އެ ގޮތުން ކަލަންޑަރު އަހަރެއްގައި 85 ގޯލު ޖަހައިގެން 1972 ވަނަ އަހަރު މުލާ ހެދި ރެކޯޑް މުގުރާލީ 2012 ވަނަ އަހަރު މެސީ އެވެ. މެސީ ރެކޯޑް ހެދީ ބާސެލޯނާ އަށް އެ އަހަރު 89 ގޯލު ޖަހައިގެންނެވެ. މީގެ އިތުރުން ދާދި ފަހުން ވެސް މުލާގެ ބޮޑު ރެކޯޑެއް ލެވަންޑޯސްކީ ވަނީ މިދިޔަ ސީޒަނުގައި މުގުރާލައިފަ އެވެ.

އެއީ ޖަރުމަނު ލީގުގެ އެއް ސީޒަނެއްގައި 40 ގޯލު ޖަަހައިގެން 1972 ވަނަ އަހަރު މުލާ ހެދި ރެކޯޑެވެ. މިދިޔަ ސީޒަނުގައި ލެވަންޑޯސްކީ އެ ރެކޯޑް މުގުރާލީ މިދިޔަ އަހަރު ލީގުގައި 41 ގޯލު ޖަހައިގެންނެވެ.