އަމްސްޓެޑަމް (ޖޫން 8) - މެންޗެސްޓާ ޔުނައިޓެޑްގެ ނެދަލެންޑްސް މިޑްފީލްޑަރު ޑޯނީ ވެން ޑަ ބީކަށް މި ފަހަރު ޔޫރޯގައި އަނިޔާގެ ސަބަބުން ނުކުޅެވޭނެ ކަމަށް އެ ގައުމުގެ ފުޓްބޯޅަ ފެޑެރޭޝަނުން ބުނެފި އެވެ.
ނެދަލެންޑްސް ފުޓްބޯޅަ ފެޑެރޭޝަނުން މިއަދު ނެރުނު ބަޔާނެއްގައި ބުނެފައިވަނީ އުމުރުން 24 އަހަރުގެ ވެން ޑަ ބީކް އަށް ދިމާވެފައިވާ އަނިޔާގެ މައްސަލަތަކުން ޔޫރޯ ފެށެންވާއިރަށް އެއްކޮށް ރަނގަޅުވާނެ ކަމަށް ނުފެންނާތީ އޭނާ މު ފަހަރުގެ ޔޫރޯ ސްކޮޑުން ބާކީކޮށްފައިވާ ކަމަށެވެ. ވެން ޑަ ބީކަށް ދިމާވެފައިވަނީ ކުޑަ ހުޅާއި މަސްގަނޑުގެ އަނިޔާގެ މައްސަލަތަކެއް ކަމަށް ނެދަލެންޑްސްގެ ބައެއް މީޑިއާތަކުން ވަނީ ރިޕޯޓްކޮށްފަ އެވެ.
ނެދަލެންޑްސްގެ ކޯޗު ފްރޭންކް ޑި ބޮއާ ވަނީ ވެން ޑަ ބީކް ބާކީކުރި ނަމަވެސް އެ ތަނަށް އިތުރު ކުޅުންތެރިއަކު ނުނަގަން ނިންމައިފަ އެވެ.
ވެން ޑަ ބީކް އެންމެ ފަހުން ގައުމީ ޓީމަށް މެޗެއް ކުޅުނީ މިދިޔަ މާޗް މަހު އެވެ. މި ފަހަރުގެ ޔޫރޯ އަށް ތައްޔާރުވާން ނެދަލެންޑްސް އިން ސްކޮޓްލެންޑާއި ޖިއޯޖިއާއާ ދެކޮޅަށް ކުޅުނު ދެ މެޗުގައި ވެން ޑަ ބީކް ނުކުޅެ އެވެ.
ގައުމީ ޓީމަށް މިހާތަނަށް ވެން ޑަ ބީކް ވަނީ 19 މެޗު ކުޅެފަ އެވެ. މި ސީޒަނުގައި އަޔަކްސް ދޫކޮށް 35 މިލިއަން ޕައުންޑަށް ޔުނައިޓެޑަށް ބަދަލުވި ނަމަވެސް އިނގިރޭސި ޕްރިމިއާ ލީގުގައި އޭނާ ފުރަތަމަ އެގާރައިގައި ހިމެނިގެން ކުޅުނީ އެންމެ ހަތަރު މެޗެވެ.
ވެން ޑަ ބީކަށް އަނިޔާވުމަކީ ނެދަލެންޑްސް އަށް ކުރިމަތިވާނެ އިތުރު އުނިކަމެކެވެ. ކަކުލުގެ ސީރިއަސް އަނިޔާއަކުން ފަރުވާ ހޯދަމުން އަންނަ ނެދަލެންޑްސްގެ ކެޕްޓަން ވާޖިލް ވެން ޑައިކް ވެސް މި ފަހަރު ޔޫރޯގައި ނުކުޅޭނެ އެވެ. އެކަމަކު ނެދަލެންޑްސްގެ ފުޓްބޯޅަ ފެޑެރޭޝަނުން ވަނީ ޓީމު އޮފިޝަލެއްގެ ގޮތުގައި ޔޫރޯގައި ބައިވެރިވުމުގެ ފުރުސަތު ވެން ޑައިކަސް ދީފަ އެވެ.
މި ފަހަރުގެ ޔޫރޯގައި ނެދަލެންޑްސް ކުޅޭ ފުރަތަމަ މެޗުގައި ހޮނިހިރު ދުވަހުގެރޭ ކުޅޭނީ ޔޫކްރެއިނާ އެވެ. ދެން އެ ގްރޫޕްގައި އޮތީ އޮސްޓްރިއާ އާއި ނޯތު މެސެޑޯނިއާ އެވެ.
