ރިއޯ ޑި ޖަނެއިރޯ (ޖޫން 2) - ކޮވިޑް-19ގެ ހާލަތުގެ ތެެރޭގައި ވެސް ދިރިއުޅެން ޖެހޭ ކަމަށާއި ކޮޕަ އެމެރިކާ ބާއްވަން ބްރެޒިލް ސަރުކާރުން ނިންމި ނިންމުން ރަނގަޅުކަމަށް އެ ގައުމުގެ ރައީސް ޖައިރް ބޮލްސޮނާރޯ ވިދާޅުވެއްޖެ އެވެ.

ކޮޕަ އެމެރިކާ ކުރިއަށްގެންދަން ނިންމާފައިވަނީ މި މަހުގެ 13 އިން އަންނަ މަހުގެ 10 އަށެވެ.

ކޮޕަ އެމެރިކާ މި ފަހަރު ބާއްވަން ނިންމި އާޖެންޓީނާ އާއި ކޮލަމްބިއާގައި ބޭއްވޭގޮތް ނުވުމުން އެންމެ ފަހުން ވެސް މުބާރާތް ހޯސްޓްކުރި ބްރެޒިލްގައި އެ މުބާރާތް ކުރިއަށް ގެންދަން ދެކުނު އެމެރިކާގެ މައި ފުޓްބޯޅަ އިދާރާ ކޮންމެބޯލް އިން ނިންމީ ބްރެޒިލް އިން ހުށަހެޅި ޕްރޮޕޯސަލް ރަނގަޅުވުމުންނެވެ.

ކޮވިޑް-19ގެ ހާލަތު ގޯސް ދަނޑިވަޅެއްގައި ކޮޕަ އެމެރިކާ ހޯސްޓްކުރާތީ ބްރެޒިލްގެ ސުޕްރީމް ކޯޓުން ވަނީ ކޮޕަ އެމެރިކާ ބާއްވަން އެ ގައުމުގެ ސަރުކާރުން ނިންމީ ކޮން ކަންތައްތަކަށް ބަލާފައިތޯ އޮޅުން ފިލުވަން ނިންމައިފަ އެވެ. އެއީ އާންމުންގެ ގިނަ ބަޔަކު އެ ކަމާ ގުޅިގެން ކަންބޮޑުވުން ފާޅުކުރާއިރު، ޕްރޮސެކިއުޓަރުންތަކެއް އެ މައްސަލަ ކޯޓަށް ހުށަހަޅަން ތައްޔާރުވަމުން ދާތީ އެވެ.

"މިއީ އަހަރެމެންނާ ހަމައިން ނިމޭ ކަމަކަށް ވާނަމަ އަހަރެން އަދި ހުރިހާ މިނިސްޓަރުން ހެލްތު މިނިސްޓަރު ވެސް ހިމެނޭ ގޮތަށް ބޭނުންވަނީ ކޮޕަ އެމެރިކާ ހޯސްޓްކުރަން. އެއީ ފައިނަލް ނިންމުން،" ބްރެޒިލިއާ އަށް ދެއްވި އިންޓަވިއުއެއްގައި ބޮލްސޮނާރޯ ވިދާޅުވި އެވެ.

"އެންމެ ފުރަތަމަ ވެސް އަހަރެން ބުނަމުން އައީ މި ޕެންޑަމިކާ ހެދި އަހަރެން ވަރަށް ހިތާމަކުރަމޭ. މީހުން މަރުވުމަކީ ވެސް އަހަންނަށް ވަރަށް އަސަރުކުރާ ކަމެއް. އެކަމަކު އަހަރެމެން ދިރިއުޅެން ޖެހޭ. ފުޓްބޯޅަ އަކީ ގިނަ ބަޔަކު އާމްދަނީ އަށް ކުރާ މަސައްކަތެއް،"

ކޮވިޑް ޖެހިގެން މިހާތަނަށް ބްރެޒިލް އިން 463،000 މީހުން ވަނީ މަރުވެފަ އެވެ.

މި ފަހަރު ކޮޕަ އެމެރިކާ ފުރަތަމަ ހޯސްޓްކުރަން ބެލި ދެ ގައުމުގެ ތެރެއިން ކޮލަމްބިއާގައި އެކަން ކުރެވެން ނެތްކަަމަށް ނިންމައި އާޖެންޓީނާގައި އެކަނި މެޗުތައް ކުޅެން ނިންމީ މި މަހުގެ 20 ވަނަ ދުވަހު އެވެ. ކޮލަމްބިއާގައި ކުޅެވެން ނެތީ އެ ގައުމުގައި ސިޔާސީ މަސްރަހު ގޯސްވެ ގިނަ ހަޅުތާލުތަކެއް ކުރިއަށްދާތީ އެވެ.

އާޖެންޓީނާގައި ކޮވިޑް-19ގެ ކޭސްތައް ވަރަށް ބޮޑަށް އިތުރުވެފައިވާއިރު، މިދިޔަ މަހު 21 ވަނަ ދުވަހު ވަނީ އެ ގައުމު ލޮކްޑައުން ކޮށްފަ އެވެ. ލޮކްޑައުން ކުރުމާ އެކު އާުޖެންޓީނާގެ ހުރިހާ ފުޓްބޯޅަ ހަރަކާތެއް ވެސް އޮތީ ސަސްޕެންޑްކޮށްފަ އެވެ. ލޮކްޑައުންގެ ނަތީޖާ ފެންނަން ނަގާ މުއްދަތަށް ބަލާއިރު، ކޮޕަ އެމެރިކާ ކުޅެވޭނެ ހާލަތަށް އެ ގައުމުގައި ކަންކަން ރޭވިގެންދާނީ އަދި މަހެއް ފަހުން ކަމަށް އާޖެންޓީނާ ސަރުކާރުން ކަނޑައެޅުމާ އެކު ކޮޕަ އެމެރިކާ ހޯސްޓް ކުރުމުގެ ފުރުސަތު އެ ގައުމަށް ގެއްލުނީ އެވެ.