އަސުންސިއޯން، ޕެރަގުއޭ (މެއި 31) - ކޮޕަ އެމެރިކާ މި ފަހަރު ބާއްވަން ނިންމި އާޖެންޓީނާ އާއި ކޮލަމްބިއާގައި ބޭއްވޭގޮތް ނުވުމުން އެންމެ ފަހުން ވެސް މުބާރާތް ހޯސްޓްކުރި ބްރެޒިލްގައި އެ މުބާރާތް ކުރިއަށް ގެންދަން ދެކުނު އެމެރިކާގެ މައި ފުޓްބޯޅަ އިދާރާ ކޮންމެބޯލް އިން ނިންމައިފި އެވެ.
ޖޫން މަހުގެ 13 ވަނަ ދުވަހު ފަށަން ތާވަލުކޮށްފައިވާ ކޮޕަ އެމެރިކާ ކުޅެން އެންމެ ފުރަތަަމަ ބެލީ މިދިޔަ އަހަރު އެވެ. ކޮވިޑްގެ ހާލަތު އޭރު ވަރަށް ގޯސްކޮށް އޮތުމުގެ ސަބަބުން މި އަހަރަށް ޖެހުނީ މުބާރާތް ފަސްކުރާށެވެ.
މި ފަހަރު ފުރަތަމަ ހޯސްޓްކުރަން ބެލި ދެ ގައުމުގެ ތެރެއިން ކޮލަމްބިއާގައި އެކަން ކުރެވެން ނެތްކަަމަށް ނިންމައި އާޖެންޓީނާގައި އެކަނި މެޗުތައް ކުޅެން ނިންމީ މި މަހުގެ 20 ވަނަ ދުވަހު އެވެ. ކޮލަމްބިއާގައި ކުޅެވެން ނެތީ އެ ގައުމުގައި ސިޔާސީ މަސްރަހު ގޯސްވެ ގިނަ ހަޅުތާލުތަކެއް ކުރިއަށްދާތީ އެވެ.
އާޖެންޓީނާގައި ކޮވިޑް-19ގެ ކޭސްތައް ވަރަށް ބޮޑަށް އިތުރުވެފައިވާއިރު، މި މަހު 21 ވަނަ ދުވަހު ވަނީ އެ ގައުމު ލޮކްޑައުން ކޮށްފަ އެވެ. މި މަހުގެ ނިޔަލަށް ލޮކްޑައުން ކުރުމާ އެކު އާުޖެންޓީނާގެ ހުރިހާ ފުޓްބޯޅަ ހަރަކާތެއް ވެސް އޮތީ ސަސްޕެންޑްކޮށްފަ އެވެ. ލޮކްޑައުންގެ ނަތީޖާ ފެންނަން ނަގާ މުއްދަތަށް ބަލާއިރު، ކޮޕަ އެމެރިކާ ކުޅެވޭނެ ހާލަތަށް އެ ގައުމުގައި ކަންކަން ރޭވިގެންދާނީ އަދި މަހެއް ފަހުން ކަމަށް އާޖެންޓީނާ ސަރުކާރުން ކަނޑައެޅުމާ އެކު ކޮޕަ އެމެރިކާ ހޯސްޓް ކުރުމުގެ ފުރުސަތު އެ ގައުމަށް ގެއްލުނީ އެވެ.
އާޖެންޓީނާގައި ކޮޕަ އެމެރިކާ ކުޅެވޭނެ ގޮތެއް ނުވުމުން މިއަދު މުބާރާތް ހޯސްޓްކުރާނެ ގައުމެއް ޕްރޮޕޯސަލް ހުށަހަޅަން ކޮންމެބޯލް އިން ފުރުސަތު ހުޅުވާލުމުން ބްރެޒިލުން ރަނގަޅު ހުށަހެޅުމަކާ އެކު އެ ބިޑް ކާމިޔާބު ކުރީ އެވެ.
އެންމެ ފަހުން 2019 ވަނަ އަހަރު ކޮޕަ އެމެރިކާ ބޭއްވީ ބްރެޒިލްގަ އެވެ. އެ ފަހަރު ޗެމްޕިއަންކަން ހޯދީ ވެސް އެ ޓީމުންނެވެ. ކޮޕަ އެމެރިކާ މި ފަހަރު ކުރިއަށްދާނީ އަންނަ މަހުގެ 13 އިން ޖުލައި 10 އަށެވެ.
ކޮޕަ އެމެރިކާ އަކީ އެންމެ ގިނަ ދުވަސްވީ ގައުމީ ޓީމުގެ ފުޓްބޯޅަ މުބާރާތެވެ. އެ މުބާރާތް އެންމެ ފުރަތަަމަ ކުޅުނީ 1916 ވަނަ އަހަރު އެވެ.
