ގައުމީ ޓީމުގެ ޖާގަ ލިބެން ޖެހޭނީ އެ އިރެއްގައި އެންމެ ރަނގަޅަށް ކުޅޭ ކުޅުންތެރިންނަށް ކަމަށާއި އެގޮތަށް ވިސްނާއިރު އޭނާ މި ވަގުތު ގައުމީ ޓީމުގައި ހުރުން އެންމެ ރަނގަޅު ނުވާނެ ކަމަށް މާޒިޔާގެ ހުނަރުވެރި މިޑްފީލްޑަރު އިބްރާހިމް ވަހީދު ހަސަން (އިއްބެ) ބުނެފި އެވެ.

ވޯލްޑް ކަޕް/ އޭޝިއަން ކަޕް ޖޮއިންޓް ކޮލިފައިންގައި މި މަހު 30 އިން އަންނަ މަހު 15 އަށް ސެންޓްރަލައިޒްކޮށް ޗައިނާގައި ކުޅޭ މެޗުތަކަށް ނެގި ގައުމީ ޓީމުގެ 33 ކުޅުންތެރިން ހިމެނޭ ޕްރިލިމިނަރީ ސްކޮޑުގައި އިއްބެގެ ނަން އޮތެވެ. އެކަމަކު އިއްބެ ނިންމީ ލީގުގައި ރަނގަޅަށް ނުކުޅެވޭތީ މި ވަގުތު ޓީމާ ނުގުޅޭށެވެ. އޭނާ ވަނީ އެކަން ގައުމީ ޓީމުގެ ކޯޗު މާޓިން ކޫޕްމަންއާ ވެސް ހިއްސާކޮށްފަ އެވެ.

ހދ. ނޮޅިވަރަންފަރަށް އުފަން އިއްބެ "އަދަދު" އަށް ބުނީ ޓީމަށް ނަގަން ނިންމުމަކީ ކޯޗުގެ ނިންމުމެއް ކަމަށާއި އެ އަށް އިހުތިރާމްކުރާ ކަމަށެވެ. އެކަމަކު މި ސީޒަނުގައި ކްލަބްގައި މާ ރަނގަޅަށް ނުކުޅެ ގައުމީ ޓީމަށް ދިއުމަކީ އެންމެ ރަނގަޅު ގޮތް ކަމަށް އޭނާ އަށް ގަބޫލުނުކުރެވޭ ކަމަށް އިއްބެ ބުންޏެވެ.

"ލީގުގައި ނުކުޅެ ގައުމީ ޓީމަށް ދާކަށް ބޭނުމެއް ނޫން. ލީގުގައި ރަނގަޅަށް ކުޅެގެން އެ ޖާގަ ހައްގުވާ އެހެން ކުޅުންތެރިން އެބަހުރި. އެ ކުޅުންތެރިންނަށް ޖާގަ ދޭން ޖެހޭނީ ވެސް. އެހެންވެ މި ވަގުތު އެންމެ ރަނގަޅު ގޮތަކީ ޓީމުން ޖާގަ ހައްގުވާ ކުޅުންތެރިންނަށް ފުރުސަތު ދިނުން ކަމަށް ދެކެނީ،" އިއްބެ ބުންޏެވެ.

ގައުމީ ޓީމުގެ ޕްރެކްޓިހެއްގެ ތެރެއިން އިއްބެ (ކ) ބޯޅަ ހިފައިގެން.-- ފޮޓޯ: އިބްރާހިމް ފާއިދު/ އެފްއޭއެމް

އުމުރުން 25 އަހަރުގެ އިއްބެ 2019 ވަނަ އަހަރު މިދިޔަ ސީޒަން ފެށުމުގެ ކުރިން މާޒިޔާ އަށް ބަދަލުވެ ސީޒަންގެ ކުރީކޮޅުގައި ތަފާތު މޮޅު ކުޅުމެއް ދެއްކި އެވެ. އެކަަމަކު ސީޒަންގެ ވަކި ހިސާބަކުން އަނިޔާގެ މައްސަލަތައް ދިމާވެ މެޗުތަކެއް ގެއްލުނެވެ.

އެ ފަހަރު އެނބުރި އައިސް ރަނގަޅު ކުޅުމެއް ދެއްކި އިއްބެ އަށް މި ސީޒަނުގައި މިހާތަނަށް އެންމެ އެދެވޭ ކުޅުމެއް ނުދެއްކެ އެވެ. ލީގުގައި މިހާތަނަށް އިއްބެ ކުޅުނީ ހަތަރު މެޗުގަ އެވެ. އޭގެއިން ގިނައީ ބަދަލު ކުޅުންތެރިއެއްގެ ގޮތުގައި ކުޅުނު މެޗުތަކެވެ.

ފާއިތުވި އަހަރުތަކުގައި އެންމެ ރަނގަޅު ފޯމެއްގައި ގިނަ މެޗުތަކެއްގައި ކުޅުނު އެއް އެޓޭކިން މިޑްފީލްޑަރަކީ އިއްބެ އެވެ. އިއްބެއާ ބެހޭގޮތުން މާޒިޔާގެ ކޯޗު ސާބިއާގެ ރިސްޓޯ ވިޑަކޮވިޗް މީގެ ކުރިން ނޫސްވެރިންގެ ބައްދަލުވުމެއްގެ ތެރެއިން ބުނެފައިވަނީ ޕްރެކްޓިހާއި މެޗުތަކުގައި ލިބޭ ފުރުސަތުތަކުގައި ރަނގަޅަށް މަސައްކަތް ކޮށްގެން ބޭނުން ހިފާނަމަ އިއްބެ އަކީ މުހިއްމު ކުޅުންތެރިއަކަށް ވާނެ ކަމަށެވެ.

އިއްބެ ކެރިއަރު ފެށީ ނިއު ރޭޑިއަންޓުންނެވެ. އޭނާ އަކީ 2013 ވަނަ އަހަރު ހުރިހާ މުބާރާތެއް ކާމިޔާބުކުރި ނިއުގެ ސްކޮޑުގައި ހިމެނޭ ކުޅުންތެރިއެކެވެ. އިއްބެ ޓީސީއާ ގުޅުނީ 2015 އަހަރު އެވެ. ޓީސީ ފުރަތަމަ ޑިވިޝަނުގައި އަލަށް ކުޅުނު އެ ފަހަރު އިއްބެ ފެނުނީ ބަދަލު ކުޅުންތެރިޔެއްގެ ގޮތުގަ އެވެ.

އޭގެ ފަހުން 2016 އިން ފެށިގެން އެ ޓީމުގެ ފުރަތަމަ އެގާރައިން ކޮންމެ ވެސް ވަރަކަށް ފުރުސަތު ހޯދަން ފެށި އެވެ. ބުރަ މަސައްކަތުން އޭގެ އެއް އަހަރު ފަހުން ގަވާއިދުން ޓީމުގައި ކުޅެން ފެށި އެވެ. އޭނަ އަކީ 2017 ވަނަ އަހަރު ބަންގްލަދޭޝްގައި ބޭއްވި ޝެއިހް ކަމާލް ކަޕް ކާމިޔާބުކުރި ޓީސީ ޓީމުގެ މެދުތެރޭގައި ތަފާތު ދެއްކި ކުޅުންތެރިއެކެވެ.

މާޒިޔާ މެޗެއްގެ ތެރެއިން އިއްބެ ބޯޅަ ހިފައިގެން.-- ފޮޓޯ: މާޒިޔާ

މީގެ އިތުރުން ރާއްޖޭން 2018 ވަނަ އަހަރުގެ ސާފް ސުޒުކީ ކަޕްގެ ތަށި އުފުލާލިއިރު، އިއްބެ އަކީ އެ ޓީމުގެ މުހިއްމު ކުޅުންތެރިއެކެވެ. ސެމީ ފައިނަލުގައި ނޭޕާލް އަތުން 3-0 އިން ރާއްޖެ މޮޅުވިއިރު، އިއްބެ ވަނީ އެ މެޗުގައި ދެ ގޯލު ޖަހައިފަ އެވެ. ބޯ ވިއްސާރައިގެ ތެރޭގައި އެ ދުވަހު ކުޅުނު މެޗުގެ ފަހު ވަގުތާ ހަމައަށް ރާއްޖެ ޓީމުން ހިތްވަރުގަދަ ކުޅުމެއް ދެއްކިއިރު، އިއްބެ ދެ ގޯލު ޖެހީ ވެސް މެޗުގެ ފަހު ކޮޅުގަ އެވެ. ރާއްޖޭން އެ އަހަރު ސަރަހައްދުގެ ޗެމްޕިއަންކަން ހޯދިއިރު، މިއީ 2008 ވަނަ އަހަރު ފުރަތަމަ ފަހަރަށް ސާފްގެ ޗެމްޕިއަންކަން ހޯދި ފަހުން ލިބުނު ފުރަތަމަ ކާމިޔާބެވެ.

ޒުވާން ގައުމީ ޓީމުގައި ވެސް މީގެ ކުރިން ހިމެނުނު އިއްބެގެ އަމާޒަކީ ކުޅުން ރަނގަޅު ކޮށްގެން އެނބުރި ގައުމީ ޓީމަށް ދިއުމެވެ.

ލީގުގައި ރަނގަޅަށް ނުކުޅެވޭތީ ގައުމީ ޓީމާ ގުޅެން ލިބުނު ފުރުސަތު މާޒިޔާގެ ފޯވާޑް ނާއިޒް ހަސަން (ދާދު) ވެސް ވަނީ ދޫކޮށްލައިފަ އެވެ. ދާދު ވެސް ބުނީ ގައުމީ ޓީމަށް އަރަން ބޭނުންވަނީ ރަނގަޅު ކުޅުމެއް ލީގުގައި ދެއްކުމަށް ފަހު ކަމަށާއި ރަނގަޅަށް ނުކުޅެ ގައުމީ ޓީމަށް ކުޅުންތެރިން އެރުމަކީ އަބަދުވެސް ފާޑުކިޔުން އަމާޒުވެފައިވާ ކަމެއް ކަމަށެވެ.