ވޮލީބޯލް އެސޯސިއޭޝަނުގެ ކޯޗާސް ކޮމިޝަނުގެ ޗެއާމަނަކަށް އަރަމުން އަންނަ ކޯޗު ޝުއައިބް އަހުމަދު އަދި ރެފްރީޒް ކޮމިޝަނުގެ ޗެއާމަނަކަށް އަހުމަދު ނަޝީދު (ތުއްތުކޯ) ރޭ އިންތިހާބުކޮށްފި އެވެ.
ދެ ކޮމިޝަނަށް ކުރިމަތިލެއްވީ ޝުއައިބް އާއި ތުއްތުކޯ ކަމަށްވާތީ ކުރިއަށްދިޔައީ ފެންނަ ނުފެންނަ ވޯޓެކެވެ. ކޯޗާސް ކޮމިޝަންގެ ވޯޓުގައި ބައިވެރިވި 20 ކޯޗުންގެ ފުރިހަމަ އަގުލަބިއްޔަތުން ކޯޗު ޝުއައިބް ވަނީ އެ ކޮމިޝަނުގެ ޗެއާ އަކަށް ހޮވިވަޑައިގެންފަ އެވެ. އަދި ތުއްތުކޯ އަށް ޖެހިޖެހިގެން ދެ ވަނަ ފަހަރަށް ރެފްރީސް ކޮމިޝަންގެ ޗެއާމަން ކަން ލިބުނީ ވޯޓުގައި ބައިވެރިވި 65 ރެފްރީންގެ ތެރެއިން 56 ވޯޓު ހޯދައިގެންނެވެ. ތުއްތުކޯ އަށް އެ މަގާމު ދޭން ނުފެންނަ ކަމަށް ފަސް ވޯޓު ލިބުނެވެ.
ކޯޗާސް ކޮމިޝަންގެ ހަ މެމްބަރުންގެ ގޮތުގައި ހޮވުނީ ގައުމީ އަންހެން ޓީމުގެ ހެޑް ކޯޗުގެ ގޮތުގައި ކާމިޔާބީތަކެއް ހޯދާފައިވާ އަހުމަދު އަދީލް (ބޭބެ)، ދިވެހި ސިފައިންގެ ކްލަބްގެ ކޯޗު މުމްތާޒް އަލީ (މުންތޭ)، ޕޮލިސް ކްލަބްގެ ކޯޗުކަމުން ދާދި ފަހުން ފެނުނު ފަތުހުﷲ ވަހީދު (ފައްލޯ)، ކުރީގެ މަޝްހޫރު ކުޅުންތެރިޔާ އަދި މިހާރުގެ ކޯޗު މުހައްމަދު ނަދީމް (ނަދީމްބެ)، މުހައްމަދު ހަމީދު އަދި ހުސެއިން ޝަރީފް އެވެ.
ރެފްރީސް ކޮމިޝަންގެ ހަ ޖާގަ އަށް 11 ރެފްރީން ކުރިމަތިލި އެވެ. ހޮވުނު ރެފްރީންނަކީ އާދަމް ސިޔާދު، މުހައްމަދު އުނެއިސް، އަބްދުﷲ ޒުހުރީ، މުހައްމަދު އަނީސް، އަހުމަދު ސަލީމް (ކުނޑި) އަދި މުހައްމަދު ޝާމިން އެވެ.
ރޭ ހެންވޭރު ބޯޅަ ގޭގައި ބޭއްވި އިންތިހާބުގައި ވޯޓުލާން ރެފްރީންނާއި ކޯޗުންގެ ގޮތުގައި ރާއްޖޭގައި ހަރަކާތްތެރިވާ މީހުން ވަނީ ރީ ރަޖިސްޓްރީކޮށްފަ އެވެ. މި މަހު 15 ގައި ރީ ރަޖިސްޓްރޭޝަނަށް ހުޅުވާލިއިރު މުއްދަތު ހަމަވިއިރު 71 ރެފްރީންނާއި 38 ކޯޗުން ވަނީ ރަޖިސްޓްރީވެފަ އެވެ. ވޯޓުގައި ބައިވެރިވީ 65 ރެފްރީންނާއި 20 ކޯޗުންނެވެ.
ވީއޭއެމްގެ ރައީސަކަށް މި މަހު އެއް ވަަނަ ދުވަހު ބޭއްވި އިންތިހާބު ކާމިޔާބު ކުރައްވާ އިންތިހާބުވެވަޑައިގަތީ ކުރީގެ މަޝްހޫރު ކުޅުންތެރިޔާ މުހައްމަދު ރަނޭޝް (ރަނޭ) އެވެ. ވީއޭއެމްގެ އިސް އޮފިޝަލަކު "އަދަދު" އަށް ވިދާޅުވީ ކުރިއަށް އޮތް ހަފްތާއެއްހާ ދުވަހުގެ ތެރޭގައި އެސޯސިއޭޝަންގެ އެކި މަގާމުތަކަށް މީހުން ކަނޑައެޅި އޭވީސީ އާއި އެފްއައިވީބީ އަށް ފޮނުވޭނެ ކަމަށެވެ.
