ކޮވިޑްގެ ގޯސް ހާލަތަށް ތައްޔާރުވުމުގެ ގޮތުން ސަރުކާރުން ގެންނަން ހަވާލުކުރި ވެންޓިލޭޓަރުތައް ނުލިބުނު މައްސަލާގައި އިހުމާލުވާ މީހުންނަށް ދައުވާ ނުކުރުމަށް ނިންމުމަށްފަހު އަނެއްކާވެސް މައްސަލަ ރިވިއު ކުރަން ޕްރޮސިކިއުޓާ ޖެނަރަލް (ޕީޖީ)ގެ އޮފީހުން ނިންމައިފި އެވެ.

މައްސަލާގައި އެންޓި ކޮރަޕްޝަން ކޮމިޝަން (އޭސީސީ)ން އެދުނީ، އޭރުގެ ހެލްތު މިނިސްޓަރު އަބްދުﷲ އަމީނާއި އެ މިނިސްޓްރީގެ 11 މުވައްޒަފެއްގެ މައްޗަށް ދައުވާ އުފުލުމަށެވެ. އެ މީހުންގެ ދައުވާ ކުރެވޭ މިންވަރަށް ހެކި ނެތް ކަމަށް ބުނެ އެންމެ ފުރަތަމަ ވެސް ޕީޖީއިން މައްސަލަ އަނބުރާ ފޮނުވާލިއިރު މައްސަލަ ރިވިއުކޮށް ދިނުމަށް އޭސީސީއިން އެދުނު ނަމަވެސް ދައުވާއެއް ސާބިތު ކުރެވޭ މިންވަރަށް އުންސުރުތައް ނެތް ކަމަށް ބުނެ މައްސަލަ އަނެއްކާވެސް ވަނީ އޭސީސީއަށް އަނބުރާ ފޮނުވާފަ އެވެ.

އެކަމާ ގުޅިގެން މަޝްރަހު ވަނީ ވަރަށް ބޮޑަށް ގޯސްވެފަ އެވެ. ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް ވަނީ ސަރުކާރާއެކު އެމްޑީޕީ ނޯންނާނެ ކަމުގެ އިންޒާރު ދެއްވާފަ އެވެ. އަދި ޕްރޮސިކިއުޓާ ޖެނަރަލް ހުސެއިން ޝަމީމާއި އޭސީސީގެ މެންބަރުންގެ އިތުބާރު ނެތް ކަމުގެ މައްސަލަ ވައްދަން ފެންނަ ކަމަށް ވިދާޅުވެފައެވެ.

އިއްޔެ އޭސީސީއިން ނޫސްވެރިންގެ ބައްދަލުވުމެއް ބާއްވައި މައްސަލައާ ގުޅޭ ގޮތުން ތަފްސީލްކޮށް ވާހަކަ ދައްކާފައިވެ އެވެ. އެ ކޮމިޝަނުން ގަބޫލު ކުރާ ގޮތުގައި ދައުލަތުގެ މުވައްޒަފުންގެ މައްޗަށް ދައުވާ އުފުލައި ސާބިތު ކުރެވޭ މިންވަރަށް ކުށުގެ އުންސުރުތައް ފުރިހަމަވެ ހެކި ވަނީ ލިބިފަ އެވެ. އެހެންވެ، ޕީޖީއިން މައްސަލަ ބަލައިނުގަތުމަށް ނިންމި ގާނޫނީ ނުކުތާތަކަށް ޗެލެންޖުކޮށް އަލުން މައްސަލަ ރިވިއު ކުރުމަށް ހުށަހެޅިކަން ހާމަކުރި އެވެ.

އެކަމާ ގުޅިގެން މިއަދު ޕީޖީ އޮފީހުން ނެރުނު ބަޔާނެއްގައި ބުނީ މައްސަލަ އަލުން ރިވިއު ކުރަން އެ އޮފީހުން އޭސީސީގެ ހިތްހަމަނުޖެހުން އޮތުމާއި މައްސަލައަކީ ރައްޔިތުންގެ ކަންބޮޑުވުން އިންތިހާއަށް އޮތް މައްސަލައަކަށްވާތީ ކަމަށެވެ.

"އެ ނިންމުން ރިވިއު ކުރާއިރު، މައްސަލައިގައި ފުލުހުންނާ ގުޅިގެން ހޯދިފައިވާ ހެކިތައްވެސް ވަކިން ގެނެސް އިތުރަށް ތަހުގީގުކުރަންޖެހޭ ކަމެއް އޮތްނަމަ، އެކަމެއް، ފުލުހުންގެ އެހީތެރިކަމާއެކު ތަހުގީގު ކުރުމަށް އެންޓި ކޮރަޕްޝަން ކޮމިޝަނަށް އިރުޝާދު ދިނުމަށްވެސް ގަސްދު ކުރަން،" ޕީޖީގެ ބަޔާނުގައިވެ އެވެ.

ތިންވަނަ ފަހަރަށް އޭސީސީއިން މައްސަލަ ރިވިއު ކުރަން ހުށަހެޅީ އާ ހެކިތަކެއް ނެތި އެވެ. ނަމަވެސް ޕީޖީއިން ބުނީ ފުލުހުންގެ އެހީތެރިކަން ހޯދުމަށް އޭސީސީއަށް އަންގައި ދެން ހިންގާ ތަހުގީގަށްފަހު، މައްސަލަ އަލުން ޕީޖީއިން ރިވިއު ކުރާނީ އަލަށް ހޯދޭ ހެކިތަކުގެ މައްޗަށް ކަމަށެވެ.

ވެންޓިލޭޓަރުގެ މައްސަލާގައި ހިނދިގެން ގޮސްގެންވާނެ މައްސަލައެއް ނޫންކަން ފާހަގަ ކުރައްވަމުން އޭސީސީގެ ރައީސް މަރިޔަމް ޝިއުނާ އިއްޔެ ވިދާޅުވި ގޮތުގައި ވެންޓިލޭޓަރު މައްސަލާގައި އޭސީސީއިން ދޫނުދޭނެ އެވެ. ޕީޖީއަށް މައްސަލަ ރިވިއު ކުރަން ހުށަހެޅުމުގެ އިތުރުން އެކަމާ ގުޅޭ ކަންކަން ރައްޔިތުންގެ މަޖިލީހުގެ ކަމާގުޅޭ ކޮމިޓީތަކާއެކު ކުރައްވާނެ ކަމަށް ވެސް ވިދާޅުވި އެވެ.

ޝިއުނާ ވިދާޅުވީ ބައެއް މައްސަލަތަކުގައި އޭސީސީ އާއި ޕީޖީއާ ދެމެދު ހިޔާލު ތަފާތުވުންތައް އޮންނާނެ ކަމަށާއި އެއީ މައްސަލައެއް ނޫން ކަމަށެވެ. ނަމަވެސް ދެ މުއައްސަސާގެ އަމާޒަކީ މައްސަލަތައް ކާމިޔާބު ކުރުން ކަމަށާއި އެހެންކަމުން އެ މަގުން މަސައްކަތް ކުރާނެ ކަމަށެވެ.

މި މައްސަލާގެ ތަހުގީގަށް އެއްވެސް ފަރާތެއް ނުފޫޒެއް ވަދެފައި ނޯންނާނެ ކަމާއި އެ ޖާގަ ވެސް ނުދެއްވާކަން ވެސް ފާހަގަ ކުރެއްވި އެވެ. އަދި ދައުވާ ކުރުމުގެ މަރުހަލާގައި ޕީޖީއަށް ވެސް އެފަދަ ނުފޫޒުތަކެއް އޮތް ކަމަށް ގަބޫލު ނުކުރެއްވޭ ކަމަށް ޝިއުނާ ވިދާޅުވި އެވެ.

ރާއްޖޭގައި ކޮވިޑްގެ ހާލަތު ގޯސްވެގެންދާނެ ކަމުގެ ބިރު އޮތް ވަގުތެއްގައި ދުބާއީގެ އެގްޒެކިއުޓާސް ކުންފުންޏާ ހަވާލުކުރީ 75 ވެންޓިލޭޓަރު ހޯދުމަށެވެ. އެކަމަށް އެދުނު މުއްދަތު ހަމަވިތާ އެތައް ދުވަހެއް ފަހުން އެ ކުންފުނިން ރާއްޖެއަށް ފޮނުވީ 15 ވެންޓިލޭޓަރެވެ. ބާކީ 60 ވެންޓިލޭޓަރު އަދިވެސް ނުލިބެ އެވެ.

އެ ކުންފުނިން ވެންޓިލޭޓަރުތައް ފޮނުވުމަށް 34 މިލިއަން ރުފިޔާގެ ބިޑެއް ހުށަހެޅުމުން މާލިއްޔަތު ގާވައިދާ ހިލާފަށް އެއްބަސްވުމުގައި ސޮއިނުކޮށް 30 މިލިއަން ރުފިޔާ، އެ ކުންފުންޏަށް ދޫކުރި އެވެ. އެ ކުންފުންޏަށް އެ މަސައްކަތް ހަވާލުކޮށްފައިވަނީ ޑަބްލިއުއެޗްއޯގެ ލަފާގެ މަތިން ކަމަށް ހެލްތު މިނިސްޓްރީއިން ބުނެފައިވާއިރު އެފަދަ ލަފާއެއް ދީފައިނުވާނެ ކަމަށް ޑަބްލިއުއެޗްއޯއިން ވަނީ ބުނެފަ އެވެ.