ދައުލަތުގެ އިދާރާތަކުން މުވައްޒަފުން ބޭނުންވާ މިންވަރު ދެނެގަނެ، މުވައްޒަފުން ގިނަ ތަންތަނުން މަދު ތަންތަނަށް ބަދަލުކުރުމަށްޓަކައި (ރީ-އެލޮކޭޓް ކުރުމަށްޓަކައި) އަންނަ އަހަރު ސަރުކާރުން އެޗްއާރު އޮޑިޓެއް ހަދަން ނިންމާފައިވާ ކަމަށް ފިނޭންސް މިނިސްޓަރު ހަސަން ޒަރީރު ހާމަކުރައްވައިފި އެވެ.
ރައްޔިތުންގެ މަޖިލީހުގެ ބަޖެޓު ކޮމިޓީގައި ވާހަކަދައްކަވަމުން ޒަރީރު ވިދާޅުވީ، ދައުލަތުގެ މުއައްސަސާތަކުން ކޮންމެ އަހަރަކު ވެސް އިތުރަށް މުވައްޒަފުން ނެގުމަށް 2،000 އެއްހާ ރިކުއެސްޓް ހުށަހަޅާ ކަމަށެވެ. ނަމަވެސް އެ ހުރިހާ ކަމަކަށް ބަލައިގެން މީހުން ނަގަން ފަށައިފިނަމަ، ކިތަންމެ ބޮޑު ބަޖެޓެއް ހެދިޔަސް ދެކޮޅު ނުޖެއްސޭނެ ކަމަށް އޭނާ ފާހަގަކުރެއްވި އެވެ.
އެ ގޮތުން މުވައްޒަފުން އިތުރުކުރުމުގެ ބަދަލުގައި ސަރުކާރުން ގެންގުޅޭ ވިސްނުމަކީ އިދާރާތައް އޮޑިޓްކޮށް، ވަސީލަތްތައް ބަދަލުކުރުން ކަމަށް ވިދާޅުވެ، ޒަރީރު ވަނީ އެޗްއާރު އޮޑިޓާ ގުޅޭގޮތުން ސަރުކާރުގެ ޕްލޭން ތަފްސީލުކޮށްދެއްވާފަ އެވެ.
"އަޅުގަނޑުމެން މި އަންނަ އަހަރު އެޗްއާރު އޮޑިޓުތަކެއް ގެންދާނަމޭ. އެޗްއާރު އޮޑިޓުތަކެއް ގެންގޮސްފައި އެ ބޭފުޅުންނަށް ބޭނުންވަންޏާ އެ ފުރުސަތު ދޭން. ހަމަ އެ ގޮތަށް ގިނަ ތަންތަނުން މަދުވެސް ކުރެވޭނޭ. މަދު ތަންތަނަށް ރިސޯސް ރީއެލޮކޭޓް ވެސް ކުރެވޭނެ ގޮތަށޭ މި އަންނަ އަހަރު އަޅުގަނޑުމެން ޕްލޭންކޮށްފައި މި އޮތީ،" އޭނާ ވިދާޅުވި އެވެ.
ޒަރީރު ވިދާޅުވީ، ޕޭ ހާމޮނައިޒޭޝަންގެ ތެރެއިން މި އަހަރު ނިމޭއިރު ހުރިހާ މުއައްސަސާތައް ހިމެނިގެން ދާއިރު، ދައުލަތުގެ މުޅި މުސާރައިގެ ބިލް 17 ބިލިއަން ރުފިޔާއަށް އަރާފައިވާ ކަމަށެވެ. އަދި ދުނިޔޭގެ ކުރިއަރާފައިވާ ގައުމުތަކުގައި ހިދުމަތްތަކުގެ ފެންވަރު ރަނގަޅުކޮށް ހަލުވިކުރަނީ މީހުން އިތުރުކޮށްގެން ނޫން ކަމަށާއި، ޕްރޮސެސްތައް އޮޓޮމޭޓްކޮށްގެން ކަމަށް ވިދާޅުވި އެވެ. އެ ގޮތުން މީރާ ފަދައިން އެހެން އިދާރާތައް ވެސް އޮޓޮމޭޝަންގެ ތެރެއަށް ގެންނަން ޖެހޭ ކަމަށް ފާހަގަކުރެއްވި އެވެ.
އަންނަ އަހަރުގެ ބަޖެޓު ރާވާފައި ވަނީ އާ މުވައްޒަފުން ނުނަގާ ދައުލަތް ހިންގޭ ގޮތަށް: ފިނޭންސް
މަޖިލީހަށް މައުލޫމާތު ދެމުން ފިނޭންސުން ބުނީ އަންނަ އަހަރުގެ ބަޖެޓު ރާވާފައި ވަނީ އާ މުވައްޒަފުން ނުނަގާ ދައުލަތް ހިންގޭ ގޮތަށް ކަމަށް. އަދި މުސާރަ ކަނޑައެޅުމުގައި ބަލަނީ ދައުލަތުގެ ފޯރުންތެރިކަން ހުރި މިންވަރަށް ކަމަށް.
ކޮމިޓީ ބައްދަލުވުމުގައި ބައެއް މެންބަރުން ވަނީ ސަރުކާރުން ވަޒީފާތައް މަދުކުރާ ވާހަކަ ދައްކާއިރު، ގެޒެޓްކޮށްގެން ސިވިލް ވަޒީފާތަކަށާއި އަދި ސިޔާސީ މަގާމުތަކަށް މީހުން ނަގަމުންދާ ކަމަށް ބުނެ ކަންބޮޑުވުން ފާޅުކުރައްވާފަ އެވެ. އެގޮތުން މި ހިނގާ މަހުގެ ތެރޭގައި އެކަނިވެސް ސިޔާސީ މަގާމުތަކަށް 18 މީހުން އައްޔަންކޮށްފައިވާ ކަމަށް މެންބަރަކު ފާހަގަކުރެއްވި އެވެ.
މެންބަރުންގެ މި ފާޑުކިޔުންތަކަށް ރައްދު ދެއްވަމުން ޒަރީރު ވިދާޅުވީ، ސަރުކާރުން އެއްވެސް މުވައްޒަފަކު ވަކިކުރުމުގެ ވިސްނުމެއް ނުގެންގުޅޭ ކަމަށެވެ. އަދި ވަޒީފާގައި ތިބޭ ކޮންމެ މީހަކީ އާއިލާއެއް ބަލަހައްޓާ ފަރާތެއް ކަމުން، އެ މީހުންގެ ހައްގުތައް ހިމާޔަތްކުރައްވާނެ ކަމަށާއި، މިހާރު ވެސް ވަޒީފާތަކަށް މީހުން ނަގަނީ ކޮންމެހެން ބޭނުންވާ މަގާމުތަކެއްތޯ ވަކިވަކިން ބަލައި ޔަގީންކުރުމަށްފަހު ކަމަށް ވިދާޅުވި އެވެ.
ކޮމިޓީ ނިންމަވާލައްވަމުން ކޮމިޓީގެ މުގައްރިރު، އޭދަފުށީ ދާއިރާގެ މެންބަރު އަހުމަދު ސަލީމް (ރެޑްވޭވް ސަލީމް) ވިދާޅުވީ، ސަރުކާރުގެ އޮފީސްތަކާއި މިނިވަން މުއައްސަސާތަކުން އެދޭ ހުރިހާ އަދަދެއް ދީފިނަމަ ބަޖެޓު 100 ބިލިއަން ރުފިޔާއަށް ވުރެ މައްޗަށް އަރައިގެންދާނެ ކަމަށެވެ. އަދި ގައުމަށް ލިބޭ އާމްދަނީއަށް ބަލާއިރު، ހަރަދުތައް ކުޑަކޮށްގެން މެނުވީ ދައުލަތުގެ ބަޖެޓު ދެކޮޅު ނުޖެއްސޭނެ ކަމަށް އޭނާ ވިދާޅުވި އެވެ.
ފިނޭންސް މިނިސްޓްރީން ބުނާ ގޮތުގައި އަންނަ އަހަރުގެ ބަޖެޓު ރާވާފައިވަނީ އިތުރު މުވައްޒަފެއް ނުނަގާ މަސައްކަތްތައް ހަމަޖެއްސޭ ގޮތަށެވެ. އަންނަ އަހަރު މުސާރައިގެ ހަރަދަށް ބަޖެޓުކޮށްފައި ވަނީ 14.4 ބިލިއަން ރުފިޔާ އެވެ. މިއީ މި އަހަރަށް ވުރެ 500 މިލިއަން ރުފިޔާ އިތުރު އަދަދެކެވެ. މީގެ ތެރެއިން މުސާރައަށް 7.9 ބިލިއަން ރުފިޔާ ހޭދަވާއިރު، އިނާޔަތްތަކަށް 6.5 ބިލިއަން ރުފިޔާ ހޭދަވާނެ އެވެ. ޕެންޝަން ހިމެނުމުން މި އަދަދު 17 ބިލިއަނަށް އަރަ އެވެ.








