ފިނޭންސް މިނިސްޓްރީން ރައްޔިތުންގެ މަޖިލީހަށް ހުށަހަޅާފައިވާ އެންޓި ކޮރަޕްޝަން ކޮމިޝަން (އޭސީސީ) ގެ ބަޖެޓް ކުޑަވުމުގެ ޝަކުވާކޮށް، ކޮމިޝަނުން ކުރާ ހަރަދަށްވުރެ އިތުރަށް ދައުލަތަށް ފައިސާ ހޯދޭ ކަމަށް ބުނެފި އެވެ.
މަޖިލީހުގެ ބަޖެޓް ދިރާސާކުރާ ކޮމިޓީއަށް އޭސީސީން ހުށަހެޅި ޕްރެޒެންޓޭޝަންގައި ބުނީ ބޭސްލައިން ބަޖެޓެއް ގޮތަށް އޭސީސީން ފިނޭންސް މިނިސްޓްރީއަށް ހުށަހެޅީ 53.9 މިލިއަން ރުފިޔާ ކަމަށެވެ. ނަމަވެސް ފިނޭންސުން މަޖިލީހަށް ބަޖެޓް ހުށަހެޅިއިރު ވަނީ އޭގެ ތެރެއިން 6.4 މިލިއަން ރުފިޔާ ކަނޑާލާފައި ކަމަށެވެ.
ފިނޭންސުން މިހާރު ކަނޑައަޅާފައިވާ ބޭސްލައިން ބަޖެޓުން މުވައްޒަފުންގެ މުސާރަ އާއި އިނާޔަތްތަކާއި ޔޫޓިލިޓީ އަދި ސާވިސް ހަރަދަށް ކަނޑާފައި މަސްއޫލިއްޔަތުތައް އަދާކުރުމަށް އޭސިސީއަށް ލިބުނީ 1.2 މިލިއަން ރުފިޔާ ކަމަށް ކޮމިޝަނުން ބުންޏެވެ.
1.2 މިލިއަން ރުފިޔާ ހަރަދުކުރުމަށް ރޭވިފައިވާގޮތް:
- ތަހުގީގު ދަތުރުތަކަށް ދެ ލައްކަ ރުފިޔާ
- ހޭލުންތެރިކަން އިތުރުކުރަން އެއްލައްކަ ރުފިޔާ
- ޕްރިވެންޝަނަށް އެއްލައްކަ ރުފިޔާ
- މުވައްޒަފުން ތަމްރީނު ކުރުމަށް 391،000ރ.
- ބޭރުގެ ފަރާތްތަކާ ގުޅުން ބަދަހިކުރުމަށް 371،000ރ.
ބަޖެޓް ދިރާސާ ކުރާ ކޮމިޓީގައި އޭސީސީގެ ރައީސް އާދަމް ޝާމިލް ވިދާޅުވީ 2022 އިން ފެށިގެން 2025 ގެ ނިޔަލަށް އޭސީސީން ކުރި ތަހުގީގުތަކަށް 70 މިލިއަން ރުފިޔާ ހަރަދުވިއިރު، އެ ތަހުގީގުތަކުގެ އަލީގައި 206 މިލިއަން ރުފިޔާ ދައުލަތަށް ހޯދުމަށް އެދުނު ކަމަށެވެ.
"2022 އިން 2025 އަށް ކޮމިޝަނުގެ ތަހުގީގުތަކަށް ހުރިހާ ގޮތަކަށް ހަރަދުވީ 70 މިލިއަން ރުފިޔާ. އެއީ މުސާރަ އާއި އިނާޔަތްތަކާއި ދަތުރުތަކާއި މިބާވަތުގެ ހުރިހާ ކަމެއް އަޅުގަނޑުމެން ހިސާބުކުރިއިރު އޮތްގޮތް. އެކަމަކު ހަމަ އެ މުއްދަތުގެ ތެރޭގައި އަޅުގަނޑުމެން ދައުލަތަށް އަނބުރާ ހޯދަންޖެހޭނެ ކަމަށް އޭސީސީގެ ގާނޫނުން އޭސީސީގެ މައްޗަށް ލާޒިމުކުރައްވާފައި މިއޮތް އަދަދު 206 މިލިއަން ރުފިޔާ ހޯދަން އަޅުގަނޑުމެން ވާނީ އެދިފައި،" ޝާމިލް ވިދާޅުވި އެވެ.
"އަޅުގަނޑުމެންނަކަށް އަދަދުތައް ރިކަވާކޮށްދޭކަށް ނެތް ކޯޓަށް ދެވޭކަށް، އަޅުގަނޑުމެންގެ މަސްއޫލިއްޔަތުތަކުގެ ތެރޭގައި އަޅުގަނޑުމެންގެ ބާރު ތެރޭގައި ހިމެނޭ ކަމެއް ނޫން އެއީ. އެހެންވީމަ އަޅުގަނޑުމެންނަށް ދައުލަތުން އިއްޒަތެރި މަޖިލީހުން ހަވާލުކޮށްފައި މިއޮތް މަސްއޫލިއްޔަތު ތެރޭގައި ތަހުގީގުކޮށް އަދަދުތައް ކަނޑައަޅައި، އަންގަންޖެހޭ ފަރާތްތަކަށް އެންގުމުގެ މަސްއޫލިއްޔަތު މިއޮތީ. ބާރުވެސް އޮތީ އެގޮތަށް."
ޝާމިލް ވިދާޅުވީ ޕޭ ފްރޭމްވޯކްގެ ތެރެއިން އޭސީސީގެ މުސާރަ ސްޓްރަކްޗާއަށް ހެޔޮ ބަދަލެއް ނައުމުގެ ސަބަބުން ކޮމިޝަނުގައި ރަނގަޅަށް މަސައްކަތް ކުރަމުންދިޔަ ބައެއް މުވައްޒަފުން ވަކިވެފައިވާ ކަމަށާއި މުސާރައާ ގުޅިގެން މުވައްޒަފުންގެ ކަންބޮޑުވުން އެބަހުރި ކަމަށެވެ.
މިގޮތުން އޭސީސީގެ އިންވެސްޓިގޭޝަންގެ އެންމެ ދަށް ރޭންކުގެ މުވައްޒަފަކަށް 2015 ވަނަ އަހަރު 19،000ރ. ލިބުނުއިރު، ޕޭ ފްރޭމްވޯކާއެކު އެ އަދަދަށް ވުރެ 400ރ. ވަރު މަދުން އެ ރޭންކުގެ އޮފިސަރުންނަށް މިހާރު މުސާރަ ލިބެމުންދާ ކަމަށެވެ.
އޮޑިޓާ ޖެނެރަލްގެ އޮފީހުން ތައްޔާރުކުރާ އޮޑިޓް ރިޕޯޓްތަކުން ފާހަގަކުރެވޭ ކަންކަމަށް ފިޔަވަޅު އެޅުމާއި ގެއްލިދިޔަ ފައިސާ އަނބުރާ ހޯދުމުގެ ހުރިހާ ޒިންމާއެއް އޮތީ އެންޓި ކޮރަޕްޝަން ކޮމިޝަނުގެ އިތުރުން ފުލުހުންގެ ބޮލުގައި އެޅިފައިކަން ފާހަގަކޮށް ޝާމިލް ވިދާޅުވީ އޭސީސީގެ ތަހުގީގުގެ ފެންވަރު ދަށްވާ ކަމަށްވާނަމަ އޮޑިޓްތަކުގެ އަސްލު ނަތީޖާ ހާސިލު ނުވާނެ ކަމަށެވެ.
މީގެއިތުރުން އޭސީސީއަށް ޖާގައިގެ ދަތިކަން ބޮޑުވެ، އަމިއްލަ ފަރުދެއްގެ ގެއިން ތަނެެއް ކުއްޔަށް ނަގައިގެން ތިބެންޖެހޭ ތިބުމާ ގުޅިގެން ކޮމިޝަނުން ކަންބޮޑުވުން ފާޅުކުރި އެވެ. އެގޮތުން ކޮމިޝަނަށް އައު އޮފީސް އިމާރާތެއްގެ މުހިންމުކަން ކޮމިޝަނުން ފާހަގަކުރި އެވެ.








