ދައުލަތުގައި ޖުމްލަކޮށް މުވައްޒަފުން މާ ގިނަ ކަމަށް ސަރުކާރުގެ ހުރިހާ އިދާރާތަކަކުން ވެސް އެއްބަސްވި ނަމަވެސް، ކޮންމެ އިދާރާއަކުން އިތުރު މުވައްޒަފުން ބޭނުންވެގެން އެ ކަމަށް ޕްރެޝަރު ކުރަމުންދާ ކަމަށް ފިނޭންސް މިނިސްޓްރީން ރައްޔިތުންގެ މަޖިލީހުގައި މިއަދު ބުނެފި އެވެ.
ފީނޭންސުން މިހެން ބުނީ، ދައުލަތުގެ ޕޭ ފްރޭމްވޯކް ތަންފީޒުކުރުމާ ގުޅޭގޮތުން ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގައި ކޮމިޓީގައި، އެ މިނިސްޓްރީ އާއި ނޭޝަނަލް ޕޭ ކޮމިޝަން ހާޒިރުކޮށްގެން ބޭއްވި ބައްދަލުވުމުގައި މެންބަރުންގެ ސުވާލުތަކަށް ޖަވާބުދެމުންނެވެ.
ކޮމިޓީގައި ފިނޭންސް މިނިސްޓްރީގެ ޑެޕިއުޓީ އަހުމަދު ސާއިދު މުސްތަފާ ވިދާޅުވި ގޮތުގައި ކޮންމެ އަހަރަކު ބަޖެޓު ހަދާއިރު ވެސް ދައުލަތުގެ ޒިންމާދާރު އިދާރާތަކާ އެކު ދިރާސާތައް ހަދަ އެވެ.
އެ ގޮތުން ދައުލަތުގެ މުވައްޒަފުން ގިނަތޯ އެހުމުން ހުރިހާ އިދާރާއަކުން ވެސް ބުނަނީ ގިނަ ކަމަށެވެ. ނަމަވެސް އެ އިދާރާއަކަށް ބޭނުންވާ ވަރަށް މުވައްޒަފުން އެބަތިބިތޯ އެހުމުން، އެއްވެސް އިދާރާއަކުން އެކަމަށް އެއްބަސްނުވެ މުވައްޒަފުން މަދު ކަމަށް ބުނާ ކަމަށް އޭނާ ވިދާޅުވި އެވެ.
"ބަޖެޓު ހަދާއިރު ހުރިހާ އިދާރާއަކުން ބުނަނީ ދައުލަތުގެ މުވައްޒަފުން މާ ގިނައޭ، އެކަމަކު އަމިއްލަ އިދާރާއާ ބެހޭގޮތުން އަހާއިރު ބުނަނީ މުވައްޒަފުން މަދޭ." އޭނާ ވިދާޅުވި އެވެ.
މި ދެ ހަގީގަތް އެއްގޮތް ކުރާނެ ގޮތަކާ މެދު ސުވާލު އުފެދޭ ކަމަށް ސާއިދު ވިދާޅުވި އެވެ. އޭނާ ވިދާޅުވީ ދައުލަތުގެ ވަރަށް ގިނަ މަސައްކަތްތަކުގައި އެފިޝެންސީ ނެތް ކަމަށް އޮޑިޓް އޮފީހުން ވެސް ފާހަގަކުރާ ކަމަށެވެ. އަދި އިދާރާތަކަށް މުވައްޒަފުން އިތުރުކުރުމުގެ ބަދަލުގައި ތިބި މީހުން ލައްވައި ގިނަ ވަގުތު މަސައްކަތް ކުރުވަން ޖެހުމަކީ އޯވާޓައިމް ހަރަދު ބޮޑުވާ މައިގަނޑު ސަބަބު ކަމަށް ވެސް އޭނާ ވިދާޅުވި އެވެ.
އޯވާޓައިމްގެ މައްސަލައިގައި ސާއިދު ވިދާޅުވީ، މުސާރައިގެ އޮނިގަނޑަށް ގެނައި ބަދަލާ އެކު މުވައްޒަފުންނަށް ލިބޭ އާމްދަނީ ބޮޑުކުރެވުނީ އޯވާޓައިމަށް ބަރޯސާނުވާ ގޮތަށް ކަމަށެވެ.
ނަމަވެސް ޕޭ ފްރޭމްވޯކްގައި ކަނޑައަޅާފައިވާ މި އަސާސްތަކާ މެދު ހިތްހަމަނުޖެހޭ ނަމަ އެއީ ބަހުސްކުރެވެން ހުރި ކަންކަން ކަމަށް ވެސް އޭނާ ވިދާޅުވި އެވެ. އަދި އެ ކަންކަމުގައި މަޖިލީހުގެ ލަފަޔާއި އިމްޕުޓް ލިބިއްޖެ ނަމަ ސިޔާސަތު ކަނޑައަޅާ ފަރާތްތަކާ ވާހަކަދައްކައިގެން ހައްލުތަކެއް ހޯދިދާނެ ކަމަށް ވެސް ސާއިދު ފާހަގަކުރެއްވި އެވެ.
މި ބައްދަލުވުމުގައި ޕޭ ކޮމިޝަނުން ވަނީ ދައުލަތުގެ އިދާރާތަކުން ފާހަގަކުރާ ކަންބޮޑުވުންތަކަށް ބަލައި ޕޭ ފްރޭމްވޯކްގެ ތެރެއިން އިތުރު އިނާޔަތްތައް ތައާރަފުކުރަމުން އަންނަ ކަމަށް ބުނެފަ އެވެ. އަދި އުސޫލުތައް ތަންފީޒުކުރުމުގައި ދިމާވާ ދަތިތައް ހައްލުކުރަން އިދާރާތަކާ އެކު އަބަދުވެސް މަޝްވަރާކުރަމުންދާ ކަމަށް ބުންޏެވެ.








