ދައުލަތަށް ޓެކުހުގެ ގޮތުގައި ލިބެންޖެހޭ މިންވަރު އަހަރުން އަހަރަށް އިތުރުވަމުންދާ އެއް ސަބަބަކީ ވިޔަފާރިތަކަށް ސަރުކާރުން ދޭންޖެހޭ ފައިސާ ނުދައްކައި ގިނަދުވަސްވުން ކަމަށް އޮޑިޓާ ޖެނެރަލް، ހުސެއިން ނިޔާޒީ ވިދާޅުވެއްޖެ އެވެ.
އަންނަ އަހަރަށް ލަފާކުރާ ބަޖެޓު ދިރާސާ ކުރުމަށް މިއަދު ބޭއްވި ކޮމިޓީ ބައްދަލުވުމުގައި ވާހަކަ ދައްކަވަމުން ނިޔާޒީ ވިދާޅުވީ މިހާރު ވެސް ދައުލަތަށް ޓެކުހުގެ ގޮތުގައި ލިބެންޖެހި، ނުލިބި ހުރި އަދަދު 22 ބިލިއަން ރުފިޔާއަށް އަރާ ކަމަށެވެ. ހަމަ އެއާއެކު، ނިމިދިޔަ ސެޕްޓެމްބަރު މަހުގެ ނިޔަލަށް ސަރުކާރުން އެކި ވިޔަފާރިތަކަށް ދޭންޖެހި، ނުދީ ހުރި ފައިސާގެ އަދަދު ހަތް ބިލިއަނަށް އަރާކަން އޭނާ ފާހަގަކުރެއްވި އެވެ.
"ޓެކްސް ކޮމްޕަލަޔަންސް ދަށްވުމުގެ އެއްކަމެއްގެ ގޮތުގައި މީރާއިން ވެސް ފާހަގަކުރައްވައިފައި އޮތީ ޕްރައިވެޓް ސެކްޓާއަށް ދައުލަތުން ދޭންޖެހިފައި ހުރި ބިލްތައް ގިނަދުވަސްވެ ނުދެއްކުމުގެ ސަބަބުން އެ ދިމާވާ ދަތިތައް،" ނިޔާޒީ ވިދާޅުވި އެވެ.
ނިޔާޒީ ވިދާޅުވީ އެހައި ބޮޑު އަދަދެއްގެ ބިލުތައް ވިޔަފާރިތަކަށް ދައްކަން އޮތްއިރު، އޭގެ ތެރޭގައި އަމިއްލަ ވިޔަފާރިތަކަށް ސަރުކާރުން ދައްކަންޖެހޭ ފައިސާ ވެސް ހިމެނޭ ކަމަށެވެ. ނަމަވެސް، އަންނަ އަހަރަށް ލަފާކޮށް މަޖިލީހަށް ހުށަހަޅާފައިވާ ބަޖެޓުގައި އެ ފައިސާ ދައްކަން ހިމަނައިފައި ނުވާ ކަމަށެވެ.
ބަޖެޓު ދިރާސާކުރާއިރު، އެ ފައިސާ ދައްކާނެ ގޮތުގެ ޝެޑިއުލްއެއް ފިނޭންސް މިނިސްޓްރީން ހޯދުމަށް މެންބަރުންގެ އަރިހުން ނިޔާޒީ އެދިވަޑައިގެންނެވި އެވެ.
"އަޅުގަނޑުމެން ސާފުކުރިން ފިނޭންސް މިނިސްޓްރީގައި އަންނަ އަހަރުގެ ބަޖެޓުގައި ނުދެއްކި ހުރި ބިލުތައް ދައްކަން ވަކިން ބަޖެޓު ކުރެވިފައި ވާނެތޯ، އެ ބޭފުޅުން ވިދާޅުވި އެ ބައެއް ނެތޭ ހިމަނައިފައެއް،" ނިޔާޒީ ވިދާޅުވި އެވެ.
ވިޔަފާރިތަކަށް ސަރުކާރުން ދައްކަންޖެހޭ ދަރަންޏެއް އޮތް ނަމަ އެ ފައިސާ އަޅައިކެނޑުމަށްފަހު ޓެކްސް ދެއްކޭގޮތަށް މި މަހު ކުރީކޮޅު ސަރުކާރުން ވަނީ ހަމަޖައްސައިފަ އެވެ.
ފިނޭންސް މިނިސްޓްރީން ބުނެފައިވާ ގޮތުގައި އެކަމަށްޓަކައި އެދި ހުށަހަޅަން ޖެހެނީ މީރާއިން ކަނޑައަޅާފައިވާ އުސޫލުގެ ދަށުންނެވެ. އެ އުސޫލުގައިވާ ގޮތުން ދައުލަތުގެ އިދާރާތަކުގެ އިތުރުން ސަރުކާރު ހިއްސާވާ ކުންފުނިތަކުން ލިބެންޖެހޭ ފައިސާއެއްވާ ނަމަ އެ ފައިސާ އަޅައިކެނޑުމަށްފަހު ޓެކްސް ދެއްކިދާނެ އެވެ. ޓެކްސް އާއި މީރާއަށް ދައްކަންޖެހޭ އެ ނޫން ޖޫރިމަނާ ފަދަ ފައިސާ ވެސް އުސޫލުގެ ދަށުން ކެނޑޭނެ އެވެ.
އެކަމަކު އުސޫލުގައިވާ ގޮތުން އެއްވެސް ފައިސާއެއް އަޅައިކަނޑައިދެވޭނީ އަމިއްލަ ވިޔަފާރިއަށް ނުލިބިވާ ފައިސާ ސަރުކާރުގެ އިދާރާއިން ނުވަތަ ކުންފުނިން މީރާއަށް ޖަމާކޮށްދިނުމުންނެވެ.
އެހެންކަމުން، ޓެކްސް އަޅައިކެނޑުމަށް ވިޔަފާރިވެރިން ހުށަހެޅި ނަމަވެސް އެކަން ޕްރޮސެސް ވާނީ ވިޔަފާރިވެރިޔާއަށް ސަރުކާރުން ދައްކަންޖެހޭ ފައިސާ ސަރުކާރުން މީރާއަށް ޖަމާކޮށްދިން އިރަކުންނެވެ.
ސަރުކާރުން ވިޔަފާރިވެރިންނަށް ދައްކަންޖެހޭ ދަރަނިތައް ދައްކައި ހަލާސް ކުރުމަކީ މުއިއްޒުގެ ވަރަށް ބޮޑު ވައުދެކެވެ. އެ ފައިސާތައް ދައްކައި ހަލާސް ކުރުމަށް ރައްޔިތުންގެ މަޖިލީހުގެ އިންތިހާބާއި ލޯކަލް ކައުންސިލްތަކުގެ އިންތިހާބުގެ ކުރިން މުއިއްޒު ހަ ތާރީހެއް ދެއްވި އެވެ. ނަމަވެސް އެއިން އެއްވެސް ފަހަރަކު އެ ފައިސާ ދައްކާ ހަލާސްކޮށްފައެއްނުވެ އެވެ.
