އަންނަ އަހަރަށް ލަފާކޮށް ސަރުކާރުން ހުށަހަޅާފައިވާ ދައުލަތުގެ ބަޖެޓަކީ ކުރީ އަހަރުތަކެކޭ ވެސް އެއްގޮތަށް ރައީސް މުހައްމަދު މުއިއްޒުގެ ސަރުކާރުން ރައްޔިތުންނަށް އޮޅުވައިލުމަށާއި ގައުމު ލޫޓުވައިލަން ލިޔެފައިވާ "ބޮޑު ސްކޭމެއް" ކަމަށް ކަނޑިތީމު ދާއިރާގެ މެންބަރު އަމީން ފައިސަލް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ބަޖެޓަށް ބަހުސް ކުރައްވަމުން އަމީން ވަނީ ސަރުކާރުގެ ބަޖެޓު އެކުލަވައިލުމުގެ ސިޔާސަތަށާއި ފާއިތުވި ތިން އަހަރުގެ ދައުލަތުގެ ހަރަދުތަކަށް ވަރަށް ބޮޑަށް ފާޑުވިދާޅުވެފަ އެވެ.
އަމީން ވިދާޅުވީ "ދިވެހީންގެރާއްޖެ" ޝިއާރުގެ ދަށުން އައިސް ސަރުކާރުން ހުށަހަޅަމުންދާ ބަޖެޓުތަކުން ރައްޔިތުންނަށް ވީ އެއްވެސް ފައިދާއެއް ނެތް ކަމަށެވެ. އަދި އަންނަ އަހަރުގެ ބަޖެޓަކީ ހަގީގަތުގައި ސަރުކާރުގެ ވާހަކަތަކާ އެއްގޮތަށް ރައްޔިތުންނަށް އޮޅުވައިލުމަށް ތައްޔާރުކޮށްފައިވާ ބޮޑު އޮޅުވައިލުމެއް ކަމަށް އޭނާ ސިފ ކުރެއްވިއެވެ.
"މިއީ ވަރަށް ބޮޑު ސްކޭމެއް، އޮޅުވައިލުމެއް. ދިވެހީންގެރާއްޖެ ޖަހައިގެން އައިސް މި ގައުމު ލޫޓުވައިލަން ލިޔެފައި އޮތް ހުތުބާއެއް ގޮތުގައި އަޅުގަނޑަށް ސިފަވަނީ،" އަމީން ވިދާޅުވި އެވެ.
ޕަބްލިކް ސާވިސް އިންވެސްޓްމަންޓް ޕްރޮގްރާމް (ޕީއެސްއައިޕީ) މަޝްރޫއުތަކަށް އަލިއަޅުވައިލައްވަމުން އަމީން ވިދާޅުވީ، 2025 ވަނަ އަހަރުގެ ބަޖެޓު ހުށަހެޅިއިރު މަޝްރޫއުތަކުގެ ތަފުސީލު ވަކިވަކިން ނުލިޔެ، ގަނޑުކޮށް ޖުމުލަ އަދަދުތަކެއް ޖެހީ ކަންކަން އެކަށީގެންވާ ގޮތެއްގައި ނިންމުމަށް ކަމަށް ސަރުކާރުން ބުނެފައިވާ ކަމަށެވެ.
ނަމަވެސް އެ އަހަރު ނިމިގެން ދިޔައިރު އޭނާގެ ދާއިރާގައި ފަށާފައި މެދުކެނޑުނު ނުވަތަ ނިމުނު އެއްވެސް މަޝްރޫޢެއް ނެތް ކަމަށް ވިދާޅުވިއެވެ.އަދި 2026 ވަނަ އަހަރުގެ ބަޖެޓުގައި ރަށްތަކާއި ދާއިރާތައް ވަކިން ނުޖެހީ ރައީސުލްޖުމްހޫރިއްޔާ ރަށްރަށަށް ވަޑައިގެން ރައްޔިތުންގެ ގާތުން އައްސަވައިގެން އެކަން ކުރައްވަން ބޭނުންފުޅުވާތީ ކަމަށް ސަރުކާރުން ބުނި ކަމަށް އަމީން ފާހަގަކުރެއްވި އެވެ.
ރައީސް މުއިއްޒު ރަށްރަށަށް ކުރެއްވި ދަތުރުތަކުގައި ގިނަ ވައުދުތަކެއް ވެވަޑައިގެންނެވި ނަމަވެސް، އެއިން އެއްވެސް ކަމެއް ހަގީގަތަކަށް ވެފައި ނުވާ ކަމަށް އަމީން ވިދާޅުވި އެވެ.
ފާއިތުވި ތިން އަހަރުގެ ތެރޭގައި ދައުލަތުގެ ބަޖެޓުން ބޮޑެތި ހަރަދުތަކެއް ކޮށްފައިވާކަން ފާހަގަކުރައްވަމުން އަމީން ވިދާޅުވީ، 52.8 ބިލިއަން އަދި 56.5 ބިލިއަން ރުފިޔާއާއެކު މި އަހަރުގެ ނިޔަލަށް ޖުމުލަ 173.5 ބިލިއަން ރުފިޔާ ހުސްވެގެންދާ ކަމަށެވެ. ނަމަވެސް އެހާ ބޮޑު ހަރަދެއް ކުރެވިގެން ދިޔައިރުވެސް ރައްޔިތުންނަށް ވީ ކަމެއް ނެތުމުން އަމީން ވަނީ ކަންބޮޑުވުން ފާޅުކުރައްވައިފަ އެވެ.
