ކޮންމެ ދެ މަހަކުން އެއް މަހު ބާއްވާނެކަމަށް ބުނެ މި ސަރުކާރުން ފެށި އަހާ ފޯރަމް ސިލްސިލާގެ ފޯރަމެއް އަހަރުދުވަސްފަހުން ބާއްވަން ނިންމައިފި އެވެ.
އަހާ ފޯރަމެއް އެންމެފަހުން ބޭއްވީ ޖުލައި 14، 2025 ގަ އެވެ. އެއީ ކޮންމެ ދެ މަހަކުން އެއް މަހު، ފަހަރަކު ފަސް މިނިސްޓަރުން ބައިވެރިވާގޮތަށް ބާއްވާނެކަމަށް ބުނެ ފެށި އެ ސިލްސިލާގެ ހަވަނަ ފޯރަމް އެވެ.
މާދަމާ ރޭ 9:00 ގައި ބާއްވަން ނިންމާފައިވާ އަހާ ފޯރަމްގައި ބައިވެރިވަނީ ހޯމް މިނިސްޓަރު، އަލީ އިހުސާން އާއި ފިޝަރީޒް މިނިސްޓަރު، އަހުމަދު ޝިޔާމްގެ އިތުރުން، ސްޕޯޓްސް މިނިސްޓަރު، އަބްދުﷲ ރާފިއު އެވެ.
އަހާ ފޯރަމް ކުރިއަށްދާ ވަގުތު ފޭސްބުކް އާއި އެކްސް އަދި، ޕީއެސްއެމް އެއާ މެދުވެރިކޮށް ސުވާލުކުރެވޭނެ ކަމަށް ޕީއެސްއެމުން ބުންޏެވެ.
މި ފޯރަމުތައް ސިލްސިލާ ގޮތެއްގައި ދެމަހުން އެއް މަހު ބާއްވާނެ ކަމަށް ވިދާޅުވީ ރައީސުލްޖުމްހޫރިއްޔާ މުހައްމަދު މުއިއްޒު އެވެ.
"އެއީ ޕަބްލިކް ފޯރަމެއް. އެ ފޯރަމްގައި ބޭނުން ސުވާލެއް އެ ފޯރަމްގައި އެ ވަގުތަކު ބައިވެރިވާ ވަޒީރުންގެ ދާއިރާތަކުން ކުރަން ފުރުސަތު ދޭނަން. ދެން އަނެއްކާ ދެ މަސް ފަހުން އަނެއް ބެޗް އޮފް ކެބިނެޓް މެމްބާސް ވަޑައިގަންނަވާނެ. ފަސް ބޭފުޅުން ފަސް ބޭފުޅުން ގޮތަށް ދެ މަހުން އެއް މަހުން ޕަބްލިކް ފޯރަމް ބާއްވާނަން،" ޖެނުއަރީ 22، 2024 ގައި މުއިއްޒު ވިދާޅުވި އެވެ.
މުއިއްޒު އެހެން ވިދާޅުވި ނަމަވެސް، އެމަނިކުފާނުގެ އެ ވައުދާ އެއްގޮތަށް އަހާ ފޯރަމްތަކެއް ނުބާއްވަ އެވެ. އަދި، މި އަހަރުގެ ރިޔާސީ ބަޔާން އިއްވަވަމުން ފެބްރުއަރީ 5، ގައި އެމަނިކުފާނު ވައުދުވެވަޑައިގެންނެވި ގޮތަށް، ކޮންމެ ހަފުތާއަކު އެއްފަހަރު މިނިސްޓަރުން ވެސް އެމަނިކުފާނު ވެސް ނޫސްވެރިންނާ ބައްދަލެއް ނުކުރައްވަ އެވެ.
