ކ. ބޮލިދުއްފަރު ފަޅުގައި ތަރައްގީކުރަމުންދާ ރިސޯޓުގައި މަސައްކަތްކުރާ 21 ބިދޭސީ މުވައްޒަފުން ގައުމަށް ފޮނުވާލަން އުޅުމުން އެކަމާ ދެކޮޅު ހެދުމުން އިމިގްރޭޝަން ޑިޓެންޝަން ސެންޓަރުގައި ބަންދުކުރުމަށްފަހު ޑީޕޯޓުކޮށްލައިފި އެވެ.
އިމިގްރޭޝަނުން އަދަދު އަށް ބުނީ ފުލުހުންގެ އަމުރަށް ނުކިޔަމަންތެރިވެގެން ފިޔަވަޅު އެޅުމަށް އޮކްޓޯބަރު 30، ގައި އިމިގްރޭޝަނާ ހަވާލުކުރި 21 ބިދޭސީއަކު ގާނޫނުގައިވާ ގޮތުގެ މަތިން އެ އެންމެން ޑީޕޯޓްކޮށްލާފައިވާ ކަމަށެވެ.
އެ މީހުން ގައުމަށް ފޮނުވާލަން އުޅުނީ މުސާރަ ނުލިބުމާއި އެހެން މުވައްޒަފުންގެ ވެލްފެއާއާ ގުޅޭ ބައެއް އެހެން ކަންކަމުގައި އިހުތިޖާޖު ކުރުމުންނެވެ. އެ އިހުތިޖާޖުގައި 100 އަށް ވުރެ ގިނަ މަސައްކަތްތެރިން ބައިވެރިވެވި ކަމަށް އަންދާޒާ ކުރެވެ އެވެ.
މިކަމާ ގުޅިގެން އެ ބިދޭސީން މަސައްކަތްކުރަމުންދިޔަ އައިމާ ކޮންސްޓްރަކްޝަނުން އަދަދު އަށް ބުނީ އިހުތިޖާޖުގައި ބައިވެރިވި 25 މުވައްޒަފަކު ވަޒީފާއިން ވަކިކޮށް ގައުމަށް ފުރުވާލަން ނިންމި ކަމަށެވެ. އެގޮތަށް ކުންފުނިން ނިންމީ އެ މުވައްޒަފުން އެހެން މުވައްޒަފުންނަށް ބިރުދައްކައި މަސްލަހަތު ނަގާލަން މަސައްކަތްކުރުމުން ކަމަށެވެ.
މައުލޫމާތު ލިބިފައިވާ ގޮތުގައި ގައުމަށް ފޮނުވާލަން ނިންމި 25 މުވައްޒަފުންގެ ތެރެއިން ފަސް މުވައްޒަފުން އެއާޕޯޓަށް ގެންދިޔުމާއެކު ގަދަ ހެދުމަކާ ނުލައި ފުރައިގެން ގޮސްފައިވެ އެވެ.
އައިމާއިން ބުނީ ބިދޭސީ މުވައްޒަފުން އިހުތިޖާޖުކުރީ އެ މުވައްޒަފުންނަށް ޑޮލަރުން މުސާރަ ދިނުަމަށް ޑިމާންޑުކުރުމަށްފަހު ކަމަށާއި އިހުތިޖާޖު ފެށީ އެ އިންތިޒާމު ހަމަޖެއްސުމަށް ކުންފުނިން މަސައްކަތް ކުރަމުންދަނިކޮށް ކަމަށެވެ. އެ ކުންފުނިން ބުނީ މުވައްޒަފުންނަށް ދިވެހި ރުފިޔާއިން މުސާރަ ދޭކަން ކޮންޓްރެކްޓުގައި ބަޔާންކޮށްފައިވާނެ ކަމަށެވެ.
ރާއްޖޭގައި ޑޮލަރުގެ ދަތިކަން ބޮޑުވެ، ޑޮލަރުގެ އަގު އިންތިހާއަށް އުފުލުމުގެ ސަބަބުން ބިދޭސީ މަސައްކަތްތެރިންނަށް އަންނަނީ ދަތިތައް ދިމާވަމުންނެވެ. އެގޮތުން ރުފިޔާއިން މުސާރަ ލިބޭ މުވައްޒަފުންނަށް ގައުމަށް ފައިސާ ފޮނުވުމުގައި ދަތިތައް ދަނީ ދިމާވަމުންނެވެ.
މިކަމާ ގުޅިގެން ޓްރާންސްޕޭރެންސީ މޯލްޑިވްސްއިން ބުނީ ގާނޫނުއަސާސީގެ ދަށުން، ރާއްޖޭގައި ވަޒީފާ އަދާކުރާ ކޮންމެ މީހަކަށްމެ، މަސައްކަތް ހުއްޓާލުމާއި އިހުތިޖާޖު ކުރުމުގެ މިނިވަންކަން ލިބިދީފައިވާއިރު، އެފަދަ ހައްގުތަކުގެ ބޭނުން ހިފުމުގެ ސަބަބުން އެއްވެސް މަސައްކަތްތެރިއަކަށް ބިރުދެއްކުމާއި، ބަންދުކުރުމާއި ނުވަތަ ބަދަލު ހިފުމުގެ ގޮތުން ފިޔަވަޅުތަކާ ކުރިމަތިލާން ޖެހިގެން ނުވާނެ ކަމަށެވެ.
