ރަސްމާލެއިން 500 ހެކްޓަރުގެ ބިން އީގަލް ހިލްސްއަށް ކުރިއަށް ދިނުމާމެދު ދިވެހިރައްޔިތުން ދެކޭގޮތް ބެލުމަށް ފެންނަނުފެންނަ ވޯޓެއް ނުނަގާނެކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން މުއިއްޒު ވިދާޅުވީ މިއަދު މަޖިލީހަށް ހުށަހެޅި ރިއަލް އެސްޓޭޓު ގާނޫނުން ރަސްމާލެ މަޝްރޫއުއާ މެދު ހުރި ކަންބޮޑުވުންތަކަށް ޖަވާބު ލިބޭ ކަމަށެވެ.
"މި ކަމަކީ އަޅުގަނޑުމެން ރިފަރެންޑަމެއް ނަގާނެ ކަމެއް، ރިފަރެންޑަމެއް ހިނގާނެކަމެއް ނޫން އިނގޭތޯ؟ މި ބިލުގައި ވަރަށް ސާފުކޮށް ބަޔާންކޮށްފައި މިހިރީ ރާއްޖޭގެ ރައްޔިތުންގެ ހައްގުތަކާއި ދިވެހި ދައުލަތުގެ މިނިވަންކަމާއި އިސްތިގުލާލާއި ސިޔާދަތީ ބާރު ހިމާޔަތްކުރެވިގެންދާ ގޮތަށް، އަޅުގަނޑުމެންގެ ގާނޫނުތަކާއި މި ހުރިހާ ކަމެއް އަދި، އަޅުގަނޑުމެންގެ ތެރޭގައި ކަންކަން ބައްޓަންކުރެވިފައި ހުންނަ ގޮތާއި ހުރިހާ ކަމަކަށް ރިއާޔަތްކުރެވިފައި މިއޮތީ،" މުއިއްޒު ވިދާޅުވި އެވެ.
މުއިއްޒު ވިދާޅުވީ ރައްޔިތުންގެ މަޖިލީހަށް މިހާރު ހުށަހަޅައިފައިވާ ރިއަލް އެސްޓޭޓް ގާނޫނުގައި ވަރަށް ރަނގަޅަށް ކުރިއަށް އަންނަން އޮތް ޖީލުތަކުގެ ހައްގުތައް ވެސް ކަށަވަރުކޮށްފައިވާނެ ކަމަށެެވެ. އެ ކަމާ ދެކޮޅަށް ވާހަކަދައްކާ މީހުން ފާޅުކުރާ ކަންބޮޑުވުންތަކަކަކީ އެއްވެސް އަސްލެއް ނެތް ކަންކަން ކަމަށް ވިދާޅުވާ ވާހަކަ މިއަދު ވެސް މުއިއްޒު ތަކުރާރުކުރެއްވި އެވެ.
"އަސާސެއް ނެތް ހިޔާލީ ވާހަކަތަކެއް ސިޔާސީ ބޭނުމެއްގައި ދައްކަމުންދާކަން އެއީ އިދިކޮޅު ފަރާތްތަކުން އެ ކުރާ ކަންކަމާ ދޭތެރޭގައި ދަންނަވަން އޮތް އެއްޗަކީ،" މުއިއްޒު ވިދާޅުވި އެވެ.
މުއިއްޒު މިހެން ވިދާޅުވިއިރު، ގައުމީ މުހިންމު މައްސަލަތަކުގައި ރައްޔިތުންގެ ފެންނަ ނުފެންނަ ވޯޓެއް ނަގަން ރައީސުލްޖުމްހޫރިއްޔާއަށް ނިންމިދާނެ ކަމަށް މިދިޔަ އަހަރު އެމަނިކުފާނުގެ ޕާޓީން އިސްނަގައިގެން ފާސްކުރި ރިފަރެންޑަމް ގާނޫނުގައި ބަޔާންކޮށްފައިވެ އެވެ.
އަދި، ރައްޔިތުންނާ ގުޅޭ މުހިންމު ކަންކަމުގައި އާންމު ރައްޔިތުންގެ ހިޔާލު ހޯދުމުގެ ވޯޓެއް ނަގަން ރައްޔިތުންގެ މަޖިލީހަށް ނިންމިދާނެ ކަމަށް ވެސް އެ ގާނޫނުގައި ބަޔާންކޮށްފައިވެ އެވެ.
ބިދޭސީންނަށް ވަޒަންވެރިވެވޭ ގޮތަށް ރަސްމާލޭގައި މަޝްރޫއެއް ކުރިއަށް ގެންދަން ފެނޭތޯ ބެލުމަށް ރައްޔިތުންގެ ފެންނަނުފެންނަ ވޯޓަކަށް ދިޔުމަށް އިދިކޮޅު އެމްޑީޕީގެ މަޖިލިސް މެންބަރުން ވަނީ ރައްޔިތުންގެ މަޖިލީހަށް ހުށަހަޅައިފަ އެވެ. ނަމަވެސް، އަދި އެ ގަރާރު މަޖިލީހުގައި އެޖެންޑާއެއް ނުކުރެ އެވެ.
