އެމަނިކުފާނުގެ ބަހާއި އަމަލާ ދިމާވާނެ ކަމަށް ވިދާޅުވެ އަމިއްލަ ދިފާއުގައި ރައީސް މުހައްމަދު މުއިއްޒު މިއަދު ވާހަކަ ދައްކަވައިފި އެވެ.
މިހާރު ކުރިއަށްދާ ނޫސްވެރިންގެ ބައްދަލުވުމެއްގައި މުއިއްޒުއާ އަމާޒުވި އެއް ސުވާލަކީ ޝަރުއީ ދާއިރާގެ މިނިވަންކަމަށް ސަރުކާރުން އިތުރު މަސައްކަތްތަކެއް ކުރައްވާނެތޯ އެވެ. އެ ސުވާލުގެ ޖަވާބުގައި މުއިއްޒު ވަނީ މި ސަރުކާރަށްވުރެ ބޮޑަށް ޝަރުއީ ދާއިރާގެ މިނިވަންކަމަށް މަސައްކަތްކުރި ސަރުކާރެއް ނާންނަކަމަށް އަމިއްލައަށް ވިދާޅުވެފަ އެވެ.
"އަމަލާއި ބަހާ އަޅުގަނޑުގެ މިކަމުގައި ދިމާވާނެ. އަޅުގަނޑު ރައްޔިތުންނާ މުހާތަބުކޮށް ފުރަތަމަ ވާހަކަ ދެއްކި ދުވަހު އަޅުގަނޑު ދެންނެވިން މިހިނދުންހިނދަށް ޝަރުއީ ނިޒާމު މިވަނީ މިނިވަން ވެފައޭ. އެކަން އެނގިލައްވާނެ ސިޔާސީ ވެރިންނަށް،" މުއިއްޒު ވިދާޅުވި އެވެ.
ކޯޓުތަކުގައި ހިނގާ މައްސަލަތައް އަވަސްވެ ނުވަތަ ލަސްވަނީ ރައީސް އޮފީހުން ކޯލެއް ގޮސްގެން ނޫން ކަމަށް މުއިއްޒު ވިދާޅުވި އެވެ. ޝަރުއީ ދާއިރާ ނުފޫޒުން މިނިވަންކުރުމުގެ ގޮތުން ބަޖެޓު ވަކިކޮށްދީފައިވާ ކަމަށް މުއިއްޒު ވިދާޅުވި އެވެ.
"އަޅުގަނޑަށް ވެސް ބައެއް ކަންކަން ފެންނަނީ ނޫހުން، ދެން އެކަމަށް ބައެއް މީހުން މަލާމާތް ކުރިޔަސް އެއީ ހަގީގަތް. އެހެންވީމާ، އަޅުގަނޑެއް ޝަރުއީ ނިޒާމަށް އެއް ކަމަކަށް، ސަރުކާރުގެ ނުފޫޒެއް ނުހިނގާނެ ޝަރުއީ ނިޒާމަށް،" މުއިއްޒު ވިދާޅުވި އެވެ.
ބަހާއި އަމަލާ ދިމާވާނެ ކަމަށް މުއިއްޒު ވިދާޅުވި ނަމަވެސް އެމަނިކުފާނު ކަންކަމުގައި އަމަލުކުރައްވާނެ ކަމަށް ވިދާޅުވާ ގޮތާ މުޅިން އިދިކޮޅަށް އަމަލުކުރައްވާތީ ވަރަށް ގިނަ ފާޑުކިޔުން އަމާޒުވެ އެވެ.
ނޫސްވެރިކަމުގެ މިނިވަންކަން ފުރިހަމައަށް އޮންނާނެ ކަމަށް މުއިއްޒު ވިދާޅުވި ނަމަވެސް މިއަދު ވެސް ނޫސްވެރިންގެ ބައްދަލުވުން ބާއްވަމުން ދަނީ ރައީސް އޮފީހުން ބޭނުންވާ މީޑިއާތަކަށް ދައުވަތު ދީގެންނެވެ. އޭގެ އިތުރުން މީޑިއާ ކޮންޓްރޯލް ކުރުމަށް ހަރުކަށި އަދަބުތަކެއް ހިމަނައި ގާނޫނެއް ވެސް ވަނީ ވުޖޫދުކޮށްފަ އެވެ.
ޝަރުއީ ދާއިރާއަށް ސަރުކާރުން ނުފޫޒު ނުފޯރުވާ ކަމަށް އެކި ޕްލެޓްފޯމްތަކުގައި މުއިއްޒު ވިދާޅުވި ނަމަވެސް މި ސަރުކާރުން އަންނަނީ ވަރަށް ބޮޑަށް ޝަރުއީ ދާއިރާއަށް ނުފޫޒު ފޯރުވަމުންނެވެ. ސުޕްރީމް ކޯޓުގެ ބެންޗަށް ވެސް ބޮޑެތި ބަދަލުތަކެއް މި ސަރުކާރުން ވަނީ ގެނެސްފަ އެވެ.
އަޒްމިރަލްދާ އާއި މަހާޒު އަދި ފަނޑިޔާރު ހުސްނުއް ސުއޫދު، ޖޭއެސްސީން ސަސްޕެންޑުކުރީ ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ބާތިލުކުރުމަށް ހުށަހެޅި މައްސަލަ ބަލައިގަންނަން ނިންމައި، އެ މައްސަލައިގެ ޝަރީއަތުގެ އަޑުއެހުން ފެށުމަށް ކުޑަ ހިނދުކޮޅަކަށް ވެފައި ވަނިކޮށެވެ.
މި މައްސަލައިގައި ސުއޫދު މަގާމުން އިސްތިއުފާ ދެއްވީ ރައީސް މުހައްމަދު މުއިއްޒު އާއި ބަންޑާރަ ނައިބު ފަނޑިޔާރުންނަށް ނުފޫޒު ފޯރުވަން މަސައްކަތްކުރެއްވި ކަމަށް ތުހުމަތު ކުރެއްވުމަށް ފަހު އެވެ. އެހެންވެ، ޖޭއެސްސީ މައްސަލަ ކުރިއަށް ގެންގޮސް މަޖިލީހުން ވަކިކުރީ އަޒްމިރަލްދާ އާއި މަހާޒު އެވެ.
ނަމަވެސް، އަޒްމިރަލްދާ ޒާހިރު އާއި ފަނޑިޔާރު މަހާޒު އަލީ ޒާހިރު މަގާމުން ވަކިކުރިތާ އަހަރަކަށް ވުރެ ގިނަ ދުވަސް ވެފައިވަނިކޮށް، މި މައްސަލައިގެ ތަހުގީގަށް ލިބިފައިވާ ހެއްކާއި ގަރީނާތަކަށް ބެލިއިރު، ޖިނާއީ ކުށެއް ހިނގާފައިވާ ކަމަށް ބެލެވެން ނެތުމުން، ޖިނާއީ ދައުވާއެއް ނުކުރުމަށް ނިމިގެންދިޔަ ސެޕްޓެމްބަރު 30 ގައި ޕްރޮސެކިއުޓަ ޖެނެރަލްގެ އޮފީހުން ނިންމި އެވެ.
