ގެދޮރު ނުވަތަ ޕްރޮޕަޓީއެއް ގަންނަނަމަ ތިން ޕަސެންޓު ފީއެއް ސަރުކާރަށް ދައްކަން ޖެހޭނެ ކަމަށް މިއަދު ރައްޔިތުންގެ މަޖީލީހަށް ހުށަހަޅާފައިވާ ރިއަލް އެސްޓޭޓް ބިލުގައި ހިމަނައިފި އެވެ.
މަޖިލީހަށް ހުށަހެޅި ބިލުގެ މައިގަނޑު ބޭނުމަކީ ޔަހޫދީންނާ އާދަޔާ ހިލާފު ގާތް ގުޅުމެއް އޮންނަ ޔޫއޭއީގެ މުހައްމަދު އަލައްބާރަށް އަވަސްއަރުވާލައިގެން ރަސްމާލެއިން 500 ހެކްޓަރު ދޫކޮށްލުމަށް މަގުފަހިކޮށްދިނުމެވެ. އެ ބިލުގެ 44 ވަނަ މާއްދާގައި ވަނީ ލީސް ރަޖިސްޓްރޭޝަން ފީއެއް ނެގުމަށް ހިމަނާފަ އެވެ. މި ބިލް ފާސްވެ ގާނޫނަކަށް ވުމުން، ރާއްޖޭގެ ރިއަލް އެސްޓޭޓް ވިޔަފާރީ ރެގިއުލޭޓުކުރާނީ މި ގާނޫނުގެ ދަށުންނެވެ.
"މި ގާނޫނުގެ ދަށުން ޕްރޮޕަޓީއެއް ވިއްކުމުން ނުވަތަ ބަދަލުވުމުން، އެ ޕްރޮޕަޓީއެއްގެ ބާޒާރު އަގުން ނުވަތަ ވިއްކާ އަގުގެ ތެރެއިން މަތީ އަގުގެ ތިން އިންސައްތަ، ލީސް ރަޖިސްޓްރޭޝަން ފީގެ ގޮތުގައި، ގަންނަ ފަރާތުން ނުވަތަ ބަދަލުވާ ފަރާތުން އޮތޯރިޓީއަށް ދައްކަން ވާނެ،" އެ މާއްދާގައި ބުނެފައިވެ އެވެ.
ރިއަލް އެސްޓޭޓް ގާނޫނުގައި ބުނެފައިވާ ގޮތުގައި މި ގާނޫނަށް އަމަލުކުރަން ފަށާ ތާރީހުން ފެށީގެން ރާއްޖޭގައި ގޯތިގެދޮރު ވިއްކުމުގެ އެންމެހައި ކަމެއް ހިނގާނީ އަލަށް އުފައްދާ ޕްރޮޕަޓީ ރެގިއުލޭޓަރީ އޮތޯރިޓީގެ ދަށުންނެވެ.
މި ފީ ނުދައްކާނަމަ އެފަދަ މުއާމަލާތެއް އެ އޮތޯރިޓީގައި ރަޖިސްޓްރީ ނުކޮށްދޭނެ އެވެ. ރަޖިސްޓްރީ ބާތިލުކުރާ ހާލަތެއްގައި ވެސް މި ފީ އަނބުރާ ނުލިބޭނެ ކަމަށް ބިލުގައި ބުނެފައި ވެ އެވެ.
ގޯތިގެދޮރު ވިއްކާނަމަ އެ ވިއްކާ ފަރާތުން ސަރުކާރަށް 15 ޕަސެންޓުގެ ފީއެއް ދައްކަންޖެހޭ ގޮތަށް އޮތް މާއްދާ އުވާލީ 2020 ވަނަ އަހަރު އިންކަމް ޓެކްސް ނަގަން ފެށުމާއެކު އެވެ. އޭގެ ފަހުން ބިން ވިއްކުމުގެ މުއާމަލާތާ ގުޅިގެން ޖީ.އެސް.ޓީ.ގެ އިތުރުން ވަކި ފީ އެއް ދައްކާކަށް ނުޖެހެ އެވެ. އެހެންނަމަވެސް ރިއަލް އެސްޓޭޓު ގާނޫނުން މި ގެންނަ ބަދަލުގެ ސަބަބުން ބިން ނުވަތަ ޕްރޮޕަޓީ ވިއްކުމުގެ މުއާމަލާތާ ގުޅިގެން ޖީ.އެސް.ޓީ.ގެ އިތުރުން ވިއްކާ އަގުގެ 3 އިންސައްތައިގެ ފީ އެއް ދެއްކުން ލާޒިމު ވެގެންދާނެ އެވެ.
