ޔަހޫދީންނާ އާދަޔާ ހިލާފު ގާތް ގުޅުމެއް އޮންނަ ޔޫއޭއީގެ މުހައްމަދު އަލައްބާރަށް ރަސްމާެލެއިން ދޫކޮށްލާ 500 ހެކްޓަރު ބިމުގެ 25 ޕަސެންޓު އެއް ގައުމެއްގެ ރައްޔިތުންނަށް ގަނެވޭނެ ކަމަށް ހިމަނައި ރައްޔިތުންގެ މަޖިލީހަށް ރިއަލް އެސްޓޭޓުގެ ބިލު މިއަދު ހުށަހަޅައިފި އެވެ.
މަޖިލީހަށް ހުށަހެޅި ބިލުގެ މައިގަނޑު ބޭނުމަކީ އަވަސްއަރުވާލައިގެން ރަސްމާލެ ވިއްކާލުމުގެ މަރުހަލާތައް ފުރިހަމަކޮށްދިނުމެވެ. ރަސްމާލެ ތަރައްގީކުރާނީ އިންޓަގްރޭޓެޑް ރިއަލް އެސްޓޭޓް ޒޯނެއްގެ ގޮތުގަ އެވެ. އެފަދަ ޒޯނުތަކުގެ ބިމާއި ޕްރޮޕަޓީ ކޯޓާއާ ގުޅޭ މާއްދާތަކެއް އެ ބިލުގައި ވަނީ ހިމަނާފަ އެވެ.
"އިންޓަގްރޭޓެޑް ރިއަލް އެސްޓޭޓް ޒޯނުގައިވާ ބިންތައް ވަކި އެއް ގައުމަކަށް ނިސްބަތްވާ ރައްޔިތުންނަށް އަދި/ނުވަތަ އެ ގައުމެއްުގެ ރައްޔިތުންގެ މިލްކުވެރިކަން ނުވަތަ ކޮންޓްރޯލް އޮންނަ ގާނޫނީ ޝަހްސުތަކަށް މި ގާނޫނުގައި ބަޔާންކޮށްފައިވާ ގޮތެއްގެ މަތިން ރަޖިސްޓްރީކޮށްދެވޭނީ ޖުމުލަ ބިންތަކުގެ ނިސްބަތުގެ 25 އިންސައްތަ އަށްވުރެ އިތުރުނުވާނެ ގޮތުގެ މަތިން،" އެ ބިލުގެ 94 ވަނަ މާއްދާގެ ހ. ގަައި ލިޔެފައިވެ އެވެ.
ބިމުގެ އިތުރުން އެ ތަންތަނުގައި އިމާރާތްކުރާ ޕްރޮޕަޓީގެ ލީސްހޯލްޑް ރައިޓްސް ވެސް ވިއްކޭނީ އެއް ގައުމަކަށް އެންމެ ގިނަވެގެން އެ ޕްރޮޕަޓީތަކުގެ ޖުމުލަ 25 ޕަސެންޓު ކަމަށް ވެސް ބިލުގައި ވަނީ ހިމަނާފަ އެވެ.
އެހެންކަމުން، ރަސްމާލެއިން އަލައްބާރުގެ އީގަލް ހިލްސް ކުންފުންޏަށް ދޫކޮށްލާ 500 ހެކްޓަރުގެ ތެރެއިން އެއް ގައުމެއްގެ މީހުންނަށް އެންމެ ގިނައިން ގަނެވޭނީ 125 ހެކްޓަރެވެ. އަދި އެ ތަނުގައި 8،000 ޕްރޮޕަޓީ ތަރައްގީކުރާނަމަ އެ އަދަދު ހުންނާނީ 2،000 ޕްރޮޕަޓީގަ އެވެ.
ސަރުކާރުން ބުނަނީ ރަސްމާލެއަށް އީގަލް ހިލްސް އިން 20 ބިލިއަން ޑޮލަރު އިންވެސްޓު ކުރާނެ ކަމަށެވެ. އެކަމަކު އީގަލް ހިލްސް އިން ބުނަނީ އެ ކުންފުނިން އިންވެސްޓު ކުރާނީ 12 ބިލިއަން ޑޮލަރު ކަމަށެވެ. އަލައްބާރު ފަހުން ވިދާޅުވީ 20 ބިލިއަން ޑޮލަރަކީ އެތަނުގެ މަސައްކަތް ނިމުމުން ތަނުގެ އަގު ހުންނާނެ މިންވަރު ކަމަށެވެ.
ރަސްމާލެ ހިއްކުމުެގ ޕްރޮޖެކްޓަކީ ޑިސެމްބަރު 17، 2023 ގައި ފެށި ޕްރޮޖެކްޓެކެވެ. އޭރު ބުނީ އަށް މަސް ތެރޭގައި ބިން ހިއްކާ ނިންމާލާނެ ކަމަށެވެ. ނަމަވެސް އެ ތާރީހާއި އެ ފަހުން ދިން އެއްވެސް ތާރީހަކަށް ރަސްމާލެ ހިއްކާ ނުނިމޭއިރު، މިއަދާ ހަމައަށް މި ޕްރޮޖެކްޓަށް 1000 އަށް ވުރެ ގިނަ ދުވަސް ވޭތުވެއްޖެ އެވެ.
