ގާނޫނުއަސާސީން ބޭރުގެ ފަރާތްތަކަށް ބިން ކުއްޔަށް ދެވޭނެ އެންމެ ދިގު މުއްދަތަކީ 99 އަހަރު ކަމަށް ކަނޑައަޅާފައި ވަނިކޮށް، އެ ހިމާޔަތް ފަހަނައަޅައި ގޮސް "ސަރެންޑާ އެންޑް ރީ-ގްރާންޓް" މޮޑެލް މެދުވެރިކޮށް ތާއަބަދަށް ލީސް އާވާ ގޮތަށް ހަދަން ރިއަލް އެސްޓޭޓް ބިލުގައި ހިމަނައި މަޖިލީހަށް ހުށަހަޅައިފި އެވެ.
ރައްޔިތުންގެ މަޖިލީހަށް ސަރުކާރުން ހުށަހެޅި މި ބިލުގެ 89 ވަނަ މާއްދާގައި ބަޔާންކޮށްފައި ވަނީ ހާއްސަ ޒޯނުގައިވާ އެޕާޓްމަންޓްތަކާއި ޕްރޮޕަޓީތަކުގެ ލީސްހޯލްޑް ބޭރު މީހުންނަށް 99 އަހަރަށް ވިއްކޭނެ ކަމަށެވެ. އަދި ބޭރު މީހަކު މާސްޓާ ޑިވެލޮޕަރުގެ އަތުން ތަނެއް ގަތުމުން، ލިބެނީ ކުރީގެ ލީސްގެ ބާކީ އޮތް މުއްދަތެއް ނޫނެވެ.
އޭގެ ބަދަލުގައި، ކުރީގެ ލީސް ސަރުކާރަށް ދޫކޮށްލުމުން، ގަތް ފަރާތަށް ސީދާ އާ 99 އަހަރުގެ ލީސްއެއް އޮތޯރިޓީން ދޫކުރަން ޖެހޭނެ އެވެ. ބިލުގެ 78 ވަނަ މާއްދާގެ ށ. ގައިވާ ގޮތުން، މާސްޓާ ޑިވެލޮޕަރުގެ މުއްދަތު ހަމަވި ނަމަވެސް އެ ގޮތަށް ދޫކުރާ ލީސް ދެމިއޮންނާނެ އެވެ.
މި މޮޑެލްގެ ދަށުން ގަންނަ ބޭރު މީހުންނަށް އެ ޕްރޮޕަޓީ އެހެން ފަރާތްތަކަށް އަލުން ވިއްކުމާއި، ބޭންކުތަކަށް ރަހުނުކުރުމުގެ ފުރިހަމަ އިހުތިޔާރު ލިބިގެންދެ އެވެ. އެހެންކަމުން މިއީ ގާނޫނުއަސާސީގެ ހިމާޔަތްތައް ނައްތާލައި، ތާއަބަދަށް ނުވަތަ ހުސްނުވާ ގޮތަށް ބޭރު މީހުންނަށް ބިން މިލްކުކުރެވޭނެ ގޮތް ހެދުމަށް ގެނައި އިންތިޒާމެއް ކަމަށް ބެލެވެ އެވެ.
އެކަމަކު ސަރުކާރުން މިކަން ސިފަކުރަނީ މިއީ ރިއަލް އެސްޓޭޓް މާކެޓަށް ގެންނަ ވަރަށް ބޮޑު ލުޔެއްގެ ގޮތުގައި، އަދި ކޮންމެހެން ވެސް ބޭނުންވާ ކަމެއްގެ ގޮތުގައި އެވެ.
ސަރުކާރުން މި ބަދަލު މި ގޮތަށް މަޖިލީހަށް މި ހުށަހެޅީ، މި ވީހާ ދުވަހު މިކަމުގެ ހަގީގަތް ރަސްމީކޮށް ހާމަނުކޮށް ސިއްރުކޮށްފައި ބޭއްވުމަށް ފަހު އެވެ. ނަމަވެސް ރަސްމާލެ މަޝްރޫއުގެ ދަށުން ޕްރޮޕަޓީ ވިއްކަނީ ހުސްނުވާ 99 އަހަރުގެ އުސޫލުން ކަމަށް ހައުސިން މިނިސްޓަރު އަބްދުﷲ މުއްތަލިބު އެއްބަސްވެވަޑައިގެންނެވި އޯޑިއޯއެއް ދާދި ފަހުން ވަނީ ލީކުވެފަ އެވެ.
ދީނީ އިލްމުވެރިންނާ އެކު ސެޕްޓެމްބަރު މަހު ބޭއްވި ބައްދަލުވުމެއްގައި މުއްތަލިބު ވިދާޅުވީ، އިންވެސްޓަރުންގެ މުދާ ޑިޕްރިޝިއޭޓް ނުވާނެ ހާއްސަ މެކޭނިޒަމެއް ސަރުކާރުން ގެންނަނީ ކަމަށެވެ. އަދި ތަން ވިއްކާލާ ކޮންމެ ފަހަރަކު ފީއެއް ނަގައި އަލުން އާ 99 އަހަރުގެ ލީސްއެއް ދޭނެ ކަމަށް ވެސް އޭނާ ހާމަކުރެއްވި އެވެ.
މި މަޝްރޫއުގެ ފަސްމަންޒަރަށް ބަލާއިރު، ޔޫއޭއީގެ އީގަލް ހިލްސް ކުންފުންޏާ އެކު 12 ބިލިއަން ޑޮލަރުގެ މި ބިޔަ މަޝްރޫއު ހިންގަނީ ރަސްމާލޭގެ 500 ހެކްޓަރު ދޫކޮށްލައިގެންނެވެ.
ދިވެހިންގެ ބޯހިޔާވަހިކަމަށް ހިއްކި ބިން ބޭރު ބަޔަކަށް ތާއަބަދަށް ލިބޭ ގޮތަށް ގާނޫނު ބަދަލުކުރުމަކީ ގައުމީ ސަލާމަތަށް އޮތް ބޮޑު ނުރައްކަލެއް ކަމަށް ބުނެ ރައްޔިތުންގެ ފެންނަ ނުފެންނަ ވޯޓަކަށް ވެސް ދަނީ ގޮވާލަމުންނެވެ. އަދި އެ ކުންފުނީގެ ވެރިޔާ އަލައްބާރަކީ އިޒްރޭލުގެ އެކުވެރިއަކަށް ވާތީ އާއި، ރާއްޖޭގައި އެހެން ދީންތަކުގެ މީހުން ވަޒަންވެރިވުމަށް ޖާގަ ލިބޭތީ އިދިކޮޅު ޕާޓީތަކާއި އާންމުންގެ ބޮޑު ނުރުހުމެއް އޮތީ އުފެދިފަ އެވެ.
