ރަސްމާލެ ވޯޓާ ފްރޮންޓު އެންޑް މެރީނާ މަޝްރޫއު ހިންގުމަށް ހަވާލުކޮށްފައިވާ ޔޫއޭއީގެ އީގަލް ހިލްސް ކުންފުނީގެ ހިއްސާދާރުންނާއި، އެ ކުންފުނީގެ އަސްލު މިލްކުވެރިން އަދި އެ ފަރާތްތަކުގެ ހިއްސާގެ ނިސްބަތް އާންމުކޮށް ހާމަކޮށްދެއްވުމަށް، އެ ކުންފުނީގެ ބާނީ އަދި ޗެއާމަން މުހައްމަދު އަލައްބާރަށް، މިހާރު ހިނގަމުންދާ ޕީއެންސީ ސަރުކާރުގައި އެމްޑަބްލިޔޫއެސްސީގެ މެނޭޖިން ޑިރެކްޓަރަކަށް ހުންނެވި އަބްދުލް މަތީން ގޮވާލައްވައިފި އެވެ.
އަލައްބާރަށް ޓެގްކުރައްވައި މަތީން ކުރެއްވި ފޭސްބުކް ޕޯސްޓުގައި ރަސްމާލެ މަޝްރޫއަށް ފައިސާ ހޯދާ ގޮތްތަކާއި ފައިސާގެ އަސްލު މަސްދަރުތަކަކީ ކޮބައިކަން ދިވެހި ރައްޔިތުންނަށް ސާފުކޮށްދެއްވުމަށް ވަނީ އެދިވަޑައިގެންފަ އެވެ. އެގޮތުން، މި އިންވެސްޓްމަންޓްގެ ފަހަތުގައި ތިބީ ކޮން ބައެއްކަމާއި ފައިސާ އަންނަނީ ކޮން ތަނަކުންކަން އެނގުމަކީ ދިވެހި ރައްޔިތުންނަށް ލިބިގެންވާ ހައްގެއްކަމަށާއި، އެކަމުގައި ފުރިހަމަ ދެފުށް ފެންނަ ނިޒާމެއް އޮންނަންޖެހޭނެކަމަށް އޭނާ ވިދާޅުވި އެވެ.
މި މައްސަލައިގައި ސަރުކާރާއި ރައްޔިތުންގެ މަޖިލީހުގެ ދައުރަށް އިޝާރާތްކުރައްވަމުން މަތީން ވިދާޅުވީ، ރައްޔިތުންގެ މަޖިލީހުން ގާނޫނުތައް ފާސްކޮށް، ރައީސުލްޖުމްހޫރިއްޔާގެ އޮފީހުން އެއްބަސްވުންތަކުގައި ސޮއިކުރި ނަމަވެސް، ހާމަކަން ބޮޑު ނިޒާމަކާއި، ޖަވާބުދާރީވުމާއި، އަދި ދިވެހި ރައްޔިތުންގެ ހައްގު މަސްލަހަތުތަކުގެ ބަދަލުގައި މަޖިލީހުގެ ރުހުމާއި ސަރުކާރުގެ ސޮއި ފުދޭނެކަމަށް ބެލެވިގެން ނުވާނެކަމަށެވެ.
ރަސްމާލޭ ބިމުގެ ހައްގު ވެރިންނަކީ ދިވެހި ރައްޔިތުންކަން ފާހަގަކުރައްވައި، އިންވެސްޓްމަންޓްގެ ނަމުގައި ހެޔޮ ވެރިކަމުގެ އުސޫލުތަކާއި، ޑިމޮކްރެޓިކް ހަމަތަކާއި، ދެފުށް ފެންނަ ސިޔާސަތުގެ އިތުރުން ޖަވާބުދާރީވުމުގެ އުސޫލުތަކަށް ބުރޫއަރާ އެއްވެސް ކަމެއް ދިވެހި ރައްޔިތުން ބަލައިނުގަންނާނެ ކަމަށް ވެސް މަތީން ވިދާޅުވި އެވެ.
ރަސްމާލޭގެ 500 ހެކްޓަރުގެ ބިން އަލައްބާރަށް ރައީސް މުހައްމަދު މުއިއްޒު ހިލޭ ދޫކޮށްލާއިރު މިހާރު ހަދާފައިވާ އެއްބަސްވުން އަދިވެސް ހާމައެއް ނުކުރެ އެވެ. ރަސްމާލެ އަލައްބާރަށް ދިނުމަށްޓަކައި ރައްޔިތުންގެ މަޖިލީހަށް މިހާރު ހުށަހަޅާފައިވާ ބިލްގެ މަސައްކަތް މުއިއްޒުގެ މެޖޯރިޓީ އޮތް މަޖިލީހުން ވަރަށް ބާރަށް ކުރިއަށް އެބަގެންދެ އެވެ.
މުއިއްޒުގެ މަގުބޫލްކަން އިންތިހާއަށް ދަށްވެފައި ވާއިރު، ރައްޔިތުންގެ ބަހެއް ނެތި ޣައިރު ދީންތަކުގެ މީހުން ވަޒަންވެރިވެވޭގޮތަށް މަޝްރޫއުތައް ހިންގުމާއި ރަސްމާލެ ހިލޭ ދޫކޮށްލާތީ އިދިކޮޅު ސިޔާސީ ޕާޓީތަކާއި ދީނީ އިލްމުވެރިންނާއި އާންމު ރައްޔިތުން ދަނީ ކަންބޮޑުވުން ފާޅުކުރަމުންނެވެ.







