ޗައިނާގެ ސިޔާސީ ލީޑަރަކަށް އެމްބާޕޭ ޖެހި ޖޯކެއްގެ މައްސަލައިގައި ރެއާލް ވެސް ހޫނުފެނަށް!

Oct 29, 2026, 9:22 AM
ރެއާލް މެޑްރިޑާއި ފްރާންސްގެ ފޯވާޑް, ކީލިއަން އެމްބާޕޭ

ރެއާލް މެޑްރިޑާއި ފްރާންސްގެ ފޯވާޑް, ކީލިއަން އެމްބާޕޭ

ޝަންހާއީ، ޗައިނާ (އޮކްޓޫބަރު 29) - ޗައިނާގެ ސިޔާސީ ތާރީހުގައި ބޮޑު އިހުތިރާމެއް ލިބިފައިވާ، ކުރީގެ ލީޑަރު، މާއޯ ޒެޑެންގަކީ ހުދުމުހުތާރު ލީޑަރެއް (ޑިކްޓޭޓަރެކޭ) ބުނެ ދެއްކި ވާހަކައެއްގެ ސަބަބުން، ފްރާންސްގެ ކެޕްޓަން ކީލިއަން އެމްބާޕޭ އާއި އޭނާ ކުޅެމުން އަންނަ ސްޕެއިނުގެ ކްލަބް ރެއާލް މެޑްރިޑް ހޫނު ފެނަށް ވެއްޓިއްޖެ އެވެ. 

ފްރާންސްގައި ކުރިއަށްދިޔަ ޝޯއެއްގައި ވާހަކަ ދައްކަމުން އެމްބާޕޭ ބުނެފައިވަނީ، އޭނާ އަކީ ޑިކްޓޭޓަރެއްގެ ގޮތުގައި ސިފަކޮށް ގިނަ ފޮޓޯޓަކެއް ސޯޝަލް މީޑިއާ އާއި އިންޓަނެޓްގެ އެކި ޕްލެޓްފޯމްތަކުގައި ދައުރުވާ ކަމަށެވެ. އޭގެ ތެރެއިން އޭނާ އަށް ފެނުނު އެންމެ މަޖާ ޕޯސްޓަކީ ހުދުމުހުތާރު ލީޑަރަކާއި އޭނާގެ މޫނު ގުޅުވައިގެން ހަދާފައިވާ ފޮޓޯ ކަމަށާއި އެ ފޮޓޯގައި ހިމެނެނީ ޗައިނާގެ ކުރީގެ ލީޑަރު މާއޯ އެވެ. 

އެމްބާޕޭގެ މި ވާހަކަތަކާ ގުޅިގެން، ޗައިނާ ދެ ބްރޭންޑަކުން ވަނީ އެމްބާޕޭގެ ސްޕޮންސާޝިޕް އެއްބަސްވުންތައް އުވާލައިފަ އެވެ. އަދި ޗައިނާގެ ދައުލަތުގެ ޓީވީ، ސީސީޓީން ވަނީ އެމްބާޕޭ ފެންނަ އެއްވެސް ފުޓޭޖެއް ނުދައްކާއިރު، ސްޕެނިޝް ލީގާއި ރެއާލް މެޑްރިޑް ކުޅޭ އެއްވެސް މެޗެއް ނުދައްކަން ނިންމައިފަ އެވެ. 

ޗައިނާގެ މި ނިންމުންތަކާ ގުޅިގެން، އެމްބާޕޭ، ރެއާލް މެޑްރިޑް އަދި ސްޕެނިޝް ލީގުން ވަނީ މައާފަށް އެދިފަ އެވެ. އަދި، މިކަން ހައްލުކުރުމަށްޓަކައި ގިނަ މަސައްކަތްތަކެއް ފަށައިފަ އެެވެ. 

އެ ގޮތުން، އެމްބާޕޭ މައާފަށް އެދިފައި ނެރުނު ބަޔާނާ ހަވާލާދީ، ރެއާލުން ވެސް ވަނީ ބަޔާނެއް ނެރެފަ އެވެ، ރެއާލްގެ ބަޔާނުގައި ބުނެފައިވަނީ، އެމްބާޕޭ ގަސްދުގައި އެއްެވެސް ބަޔަކަށް އިހުތިރާމްކުޑަކުރުމުގެ ގޮތުން ކަމެއް ނުކުރާނެ ކަމަށާއި ނޭނގުމެއްގެ ތެރޭގައި މި ހިނގައިދިޔަ ކަންތައްތައް އަވަހަށް ހައްލުވާން އެދޭ ކަމަށެވެ. 

އެ އަށް ފަހު، ސީސީޓީވީ ހިންގާ ޗައިނީސް މީޑިއާ ގްރޫޕް (ސީއެމްޖީ) އިން ބުނެފައިވަނިީ، ހިނގައިދިޔަ ކަންކަމުން ގަބޫލުކުރެވިފައި އޮތީ އެމްބާޕޭ ވަނީ ޗައިނާގެ ރައްޔިތުންނަށް ބޭއިހުތިރާމް އަދާކޮށް އިންތައް ފަހަނައަޅާފައި ކަމަށެވެ. އަދި، މިކަމުގައި ރެއާލް އިން ނެރުނު ބަޔާނުގައި މިއީ އެމްބާޕޭ ގަސްދުގައި ކޮށްފައިވާ ކަމެއް ނޫން ކަމަށް ދޭހަވާ މޭރުމުން ކަންކަން ތަފްސީލްކޮށްދޭން ކޮށްފައިވާ މަަސައްކަތްތައް ބަލައިގަންނަން އުނދަގޫ ކަމަށް ވެސް ސީއެމްޖީން ބުނެފައިވެ އެވެ. 

ސީއެމްޖީގެ މި ބަޔާނާ އެކު، ރެއާލުން ވަނީ އިތުރު ބަޔާނެއް ނެރެ، ޗައިނާގެ ތާރީހާއި ސަގާފަތަށް އަދި ހުރިހާ ކަމަކަށް ރެއާލުން ފުރިހަަމަ އަށް އިހުތިރާމް އަދާކުރާ ކަމަށް ބުނެފަ އެވެ. 

އެމްބާޕޭ ވާހަކަ ދައްކަައި، ހިނގައިދިޔަ ކަންކަމާ މެދު މައާފަށް އެދިފައިވުމުން، އެ އަށް ވިސްނަމުން އަންނަ ކަމަށް ޗައިނާގެ ފޮރިން މިނިސްޓްރީން އިއްޔެ ނެރުނު ބަޔާނެއްގައި ވަނީ ބުނެފަ އެވެ. 

އޭނާގެ މޫނު ބޭނުންކޮށްގެން ޑިކްޓޭޓަރެއްގެ ސިފައިގައި ހަދާ ފޮޓޯތަކާއި ވީޑިއޯތަކުން ހަގީގަތުގައި ދެ ކަމެއް ފާހަގަވެެގެންދާ ކަމަށް މީގެ ކުރިން ދިން އިންޓަވިއުއެއްގައި އެމްބާޕޭ ވަނީ ބުނެފަ އެވެ. 

އެމްބާޕޭ ކިޔައިދިނީ "ޑިކްޓޭޓަރު ފޮޓޯ"ގެ ދެ ފަރާތް

އޭއައި ބޭނުންކޮށްގެން ޑިކްޓޭޓަރެއްގެ ސިފައިގައި އެމްބާޕޭގެ ފޮޓޯތައް އުފައްދާތީ، އެކަމުގައި މަޖާ ކަންތައްތަކަކާއި ސީރިއަސް މައްސަލަތަކެއް ހުރިކަން އޭނާ ފާހަގަކުރި. މިފަދަ ފޮޓޯތަކުގެ ސަބަބުން އިންސާނީ ކަރާމާތަށް އަސަރުކޮށް، އަނބުރަށް ގެއްލުންވާ ކަމަށާއި، އަނިޔާވެރި ވެރިންނާ އޭނާ އެއްގޮތްކުރުމަކީ ބަލައިގަނެވޭނެ ކަމެއް ނޫންކަމަށް އެމްބާޕޭ ބުނި.

ގަދަބާރުން އެކި ގައުމުތަކުގައި ވެރިކަން ކޮށްފައި ހުރި ޑިކްޓޭޓަރުންގެ ޔުނިފޯމާ އެކު، އެމްބާޕޭގެ މޫނު ޖަހަައިގެން އޭއައި އިން ހަދާފައިވާ ވީޑިއޯ އާއި ފޮޓޯތައް ވަނީ މިދިޔަ ދެ އަހަރެއްހާ ދުވަސް ތެރޭ ސޯޝަލް މީޑިއާގައި ވައިރަލްވެފަ އެވެ. އަދި، މި ފަހަރު، އެމެރިކާ، މެކްސިކޯ އަދި ކެނަޑާގަައި ފްރާންސް ގައުމީ ޓީމު ކުޅުނު މެޗުތަކަށް އެ ފޮޓޯ ހިފައިގެން ބައެއް ސަޕޯޓަރުން ވަނީ ގޮސްފަ އެވެ. 

ފްރާންސް ފުޓްބޯލް އަށް ދިން އިންޓަވިއުއެއްގައި އެމްބާޕޭ، ވަނީ ފުރަތަމަ ފަހަރަށް މި ކަންކަމާ ބެހޭގޮތުން ވާހަކަ ދައްކަައިފަ އެވެ. 

ޕީއެސްޖީ އާއި މޮނާކޯ އަށް ކުރިން ކުޅުނު އެމްބާޕޭ ބުނީ، އެ ފޮޓޯތަކުގައި ސަމާސާ ބަޔަކާއި ސީރިއަސް ނަޒަރަކުން ވިސްނަން ޖެހޭ ކަންތައްތައް ވެސް އެކުލެވިގެންވާ ކަމަށެވެ. އެ ގޮތުން، އޭގެ ސަމާސާ ނޫނީ މަޖާޒީ ގޮތެއްގައި ވިސްނޭ ކަމަކީ މީހުން މެދުގައި ވާހަކަ އެނބުރޭ ގޮތް ކަމަށް އެމްބާޕޭ ފާހަަގަކުރި އެވެ. އަދި، އޭގެ ހިމެނޭ ސީރިއަސް ބަޔަކީ މީހުން ވަރަށް ފުންކޮށް ވިސްނަން ޖެހޭ ކަމެއް ކަމަށް އެމްބާޕޭ ވަނީ ބުނެފަ އެވެ. 

"މި ކަމުގައި ހިމެނޭ މަޖާ ނޫން ކަމަކީ އޭގެ ސަބަބުން އަންނަ ގެއްލުން. ދުނިޔޭގެ ތާރީހުގައި އެ ފަދަ ގޮތަކަށް އުޅެފައި (ޑިކްޓޭޓަރުން ކަންކޮށްފައި) ހުރި ގޮތް މި ނަކަލު ވަނީ އެހެން މީހަކަށް. ގެއްލުން ބޮޑުވެ، މީހެއްގެ އަނބުރަށް އެ އަރައިގަނެވެނީ،" އެމްބާޕޭ ބުންޏެވެ. 

"މީހުން މަރާފައި ތިބި މީހުންނާއި އެތައް މިލިއަން މީހުންނަށް ފޫނުބެއްދޭ ވަަރުގެ ގެއްލުން ދީފައި ހުރި މީހުންނާ އެއްގޮތް ކުރުމަކީ، އަހަރެން ދުނިޔޭގައި އުޅުނު ގޮތާ މުޅިން ހިލާފު އުސޫލުތަކެއް. މީގެ ސަބަބުން މީހުންގެ މެދުގައި ހަގީގަތުގައި އޮންނަން ޖެހޭ ހޭލުންތެރިކަން ގެއްލި އިންސާނީ ކަރާމާތަށް ވެސް އަސަރުކުރޭ،" 

މި ފަހަރުގެ ފީފާ ވޯލްޑް ކަޕްގެ ތެރޭގައި، އެމްބާޕޭގެ ޑިކްޓޭޓަރު ފޮޓޯތަކަށް އިޝާރާތްކޮށް، ފްރާންސްގެ ތަރި، އޮސްމާން ޑެމްބެލޭ ވަނީ އެމްބާޕޭ އަށް ވަނަމަކުން "މޮބުޓް" ކިޔައި، މުހާތަބުކޮށްފަ އެވެ. މޮބުޓް އަކީ ޑިމޮކްރަޓިކް ރިޕަބްލިކް އޮފް ކޮންގޯގައި ޑިކްޓޭޓަރެއްގެ ސިފައިގައި ވެރިކަން ކުރި، މޮބުޓޫ ސެސޭ ސެކޯ އަށް ކުރުކޮށް ކިޔާ ނަމެކެވެ. 

އެމްބާޕޭ ބުނީ، ޑެމްބެލޭގެ ފަރާތުން ފެނުނު ކަމަކީ، ސޯޝަލް މީޑިއާ އިން އައި ކަމެއް ކަމަށާއި އޭގެ އެއްވެސް ސީރިއަސް ކަމެއް ނެތް ކަމަށެެވެ. 

ކޮމެންޓް

ފަހުގެ ޚަބަރު

މާޒިޔާ އާއި ނިއު ރޭޑިއަންޓް ވަރުގަދަ ފެށުމާ އެކު ކުރިއަށް

އެފްއޭއެމް ވިމެންސް ލީގުގައި ކުޅުނު ފުރަތަމަ ދެ މެޗުން މޮޅުވެ، މާޒިޔާ އާއި ނިއު ރޭޑިއަންޓުން މުބާރާތުގެ ވަރުގަދަ ފެށުމެއް ދަމަހައްޓައިފިއެވެ. މިހާތަނަށް ކުޅުނު މެޗުތަކުން ދެ ޓީމަށްވެސް ހަ ޕޮއިންޓް ލިބިފައިވާއިރު، ލަނޑުގެ ތަފާތުން ތާވަލުގެ އެއްވަނައިގައި އޮތީ ނިއު ރޭޑިއަންޓެވެ. މި މުބާރާތުގެ ފޯރިގަދަ މެޗެއްގައި އަންނަ އާދިއްތަ ދުވަހު ނިއު އާއި މާޒިޔާ ބައްދަލުކުރާނެއެވެ.

ސިޓީއާ ޔުނައިޓެޑުން އަރާހަމަކުރާނެ ކަމަށް ޕޮޗެޓީނޯ ބުނެފި

މެންޗެސްޓާ ޔުނައިޓެޑްގެ ކޯޗުކަމާ ހަވާލުވެ، މައުރީސިއޯ ޕޮޗެޓީނޯ ބުނީ އެ ސަރަހައްދުގެ އެންމެ ކާމިޔާބު ޓީމަކަށް އަލުން ޔުނައިޓެޑް ހަދައި، ސިޓީގެ ކުރި ހޯދާނެ ކަމަށް. ލީގުގެ 18 ވަނައިގައި އޮތް ޔުނައިޓެޑްގެ ހާލަތު ބަދަލުކުރަން ވަގުތު ބޭނުންވާނެ ކަމަށާއި، ނަމަވެސް ފުރަތަމަ ދުވަހުން ފެށިގެން އެ މަސައްކަތް ކުރާނެ ކަމަށް އޭނާ ވަނީ ބުނެފައި.

އެމްއައިބީން ގައުމީ ބިލިއާޑު ޗެމްޕިއަންކަން ހޯދައިފި

ޤައުމީ ބިލިއާޑް މުބާރާތުގެ ފައިނަލުގައި ދިވެހި ސިފައިންގެ ކްލަބް 3-2 އިން ބަލިކޮށް، މޯލްޑިވްސް އިސްލާމިކް ބޭންކް (މިބްސާ) އިން މުބާރާތުގެ ޗެމްޕިއަންކަން ހޯދައިފި. ޖުމްލަ 10 ޓީމު ވާދަކުރި މި މުބާރާތުގެ ޗެމްޕިއަން ޓީމަށް 30,000 ރުފިޔާގެ ފައިސާގެ އިނާމެއް ވަނީ ދީފައި.

ލުކާކޫ، 16 އަހަރަށް ފަހު ބެލްޖިއަމް ޓީމުން ރިޓަޔާކޮށްފި

ބެލްޖިއަމްގެ ގައުމީ ޓީމަށް 16 އަހަރު ކުޅެދިނުމަށްފަހު، އެ ގައުމަށް އެންމެ ގިނަ ލަނޑު ޖަހައިދިން ރޮމެލޫ ލުކާކޫ ބައިނަލްއަގުވާމީ ފުޓްބޯޅައިން ރިޓަޔާކޮށްފި. ޖުމްލަ 135 މެޗުން 94 ލަނޑު ކާމިޔާބުކޮށްފައިވާ ލުކާކޫ އަކީ ބައިނަލްއަގުވާމީ ފުޓްބޯޅައިގައި ފަސްވަނައަށް އެންމެ ގިނަ ލަނޑު ޖެހި ކުޅުންތެރިޔާގެ އިތުރުން ޔޫރޯ ކޮލިފައިންގެ ރެކޯޑް އޮތް ކުޅުންތެރިޔާ

ލިބުނީ މަދު ވަގުތުކޮޅެއް، ޝަކުވާނުކޮށް ހޯދައިދިނީ ސާފްގެ ތަށި!

މި އަހަރުގެ ސާފް ޗެމްޕިއަންޝިޕް ކާމިޔާބުކުރި އިންޑިއާ ޓީމަށް ތައްޔާރުވާން މަދު ވަގުތުކޮޅެއް ލިބުނުއިރު، މުބާރާތުގެ ތެރެއިން މުހިންމު ކުޅުންތެރިންތަކެއް ޓީމުން ވަކިވުމުން ގިނަ ގޮންޖެހުންތަކަކާ ކުރިމަތިލާން ޖެހުނު. ނަމަވެސް ކޯޗު ނައުޝާދުގެ އިރުޝާދުގެ ދަށުން، ޒުވާން ކުޅުންތެރިންނަށް އިތުބާރުކޮށްގެން އިންޑިއާ އިން ވަނީ ޝަކުވާއެއް ނެތި ތަށި ހޯދާފައި

ސާފް ޗެމްޕިއަންޝިޕްގެ ފެއާ ޕްލޭ އެވޯޑް ރާއްޖެ އަށް

ބަންގްލަދޭޝްގައި ނިމުނު ސާފް ޗެމްޕިއަންޝިޕްގައި ރާއްޖެ ކުޅުނު ދެ މެޗުން ބަލިވެ، މުބާރާތުން ކެޓި ނަމަވެސް، މުޅި މުބާރާތުގެ ފެއާޕްލޭ އެވޯޑް ރާއްޖެއަށް ވަނީ ލިބިފައި. މިއީ ލަނޑެއް އަދި ޕޮއިންޓެއް ނުލިބި ރާއްޖެ މި މުބާރާތުން ކެޓި ފުރަތަމަ ފަހަރު ކަމަށްވާއިރު، މިއީ ސާފް ޗެމްޕިއަންޝިޕްގެ ތާރީޚުގައި ރާއްޖެއަށް ލިބުނު އެންމެ ދަށް ނަތީޖާއ

ރިވައިވަލް ބެޑްމިންޓަން ޗެލެންޖް ތަށި ހައިޝަމް އާއި ނަބާ އަށް

އެމްއައިބީ ރިވައިވަލް ބެޑްމިންޓަން ޗެލެންޖުގެ ފިރިހެން ސިންގަލްސް ތަށި ހައިޝަމް އިބްރާހިމް އަލީ ހޯދިއިރު، އަންހެން ސިންގަލްސް ތަށި ކާމިޔާބުކުރީ ފާތިމަތު ނަބާހާ އެވެ. މި މުބާރާތުގެ ފިރިހެން ޑަބަލްސް ޒަޔާން އާއި ނިބާލް ކާމިޔާބުކުރިއިރު، އަންހެން ޑަބަލްސް ތަށި ހޯދީ ނަބާ އާއި ނަބީހާގެ ޕެއާ އިންނެވެ.

Newsletter

Get the latest news delivered straight to your inbox