މެޑްރިޑް (އޮކްޓޫބަރު 25) - މި ވަގުުތުގެ ހާލަތާއި ކަންކަން ހުރި ގޮތަށް ބަލާއިރު، ރެއާލް މެޑްރިޑާއި ބާސެލޯނާ އަޅާކިޔުން އެއީ އިންސާފުވެރި ކަމަކަށް ނުވާނެ ކަމަށް ރެއާލްގެ ކޯޗު ހޯސޭ މޮރީނިއޯ ބުނެފި އެެވެ.
މޮރީނިއޯ މިހެން ބުނެފައިވަނީ، ސްޕެނިޝް ލީގުގައި މިރޭ ރެއާލާއި ބާސެލޯނާ ބައްދަލުކުރާ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގަ އެވެ. ސްޕެނިޝް ލީގު ތާވަލުގައި ބާެސެލޯނާ އޮތީ ރެއާލަށް ވުރެން ހަ ޕޮއިންޓު ކުރީގަ އެވެ.
އޭނާ ބުނީ މީގެ ހަފްތާއެއް ކުރިން ގިނަ ބަޔަކު ދެކޭނީ، ބާސެލޯނާ އިން ބޮޑު ތަފާތަކުން ރެއާލް ބަލިކުރާނެ ކަަމަށް ކަމުގަ އެވެ. އެކަމަކު، ޗެމްޕިއަންސް ލީގުގައި ޕީއެސްޖީ އަތުން ބާސެލޯނާ ބަލިވެ، ރެއާލުން ލައިޕްޒިގު ބަލިކުރުމުން މީހުން ދައްކާ ވާހަކަ ތަފާތު ވެދާނެ ކަމަށް މޮރީނިއޯ ވަނީ ބުނެފަ އެވެ.
އެންމެ މުހިންމު ކަމަކަމަށް ވިސްނަން ޖެހެނީ ބާސެލޯނާގައި މިހާރު ހުރި ކޯޗު ހަންސީ ފްލިކްގެ ވިސްނުމަށް އެ ކްލަބް ބައްޓަން ކުރަމުން އަންނަތާ ދެ އަހަރު ވެފައިވާ ކަމަށާއި ރެއާލުން މިހާރު ކުރިއަށްދާ ވިސްނުމުގައި މަސައްކަތްކުރާތާ ވީ ތިން މަސް ކަމަށް މޮރީނިއޯ ވަނީ ބުނެފަ އެވެ.
"މީހުން އަހަރެެމެންނަށް ބަލަނީ ނިމިފައި އޮތް މަސައްކަތެއްގެ ގޮތުގައި. އެކަމަކު، އަހަރެމެން މި ތިބީ ޕްރޮސަސް އެއްގެ މެދުގައި. ކޯޗު މި ދަނީ ކުުޅުންތެރިން ދަސްކުރަމުން، ކުޅުންތެރިން އެ ދަނީ ކޯޗު ދަސްކުރަމުން. އެހެންވީމަ، މި ހާލަތުގައި އޮތް ޓީމަކާ، ރަނގަޅަށް ފައްކާވެފައި އޮތް ޓީމެއްގެ ތަފާތު ހުންނާނެ، އެ ގޮތަށް ނުބަލައި އަޅާކިޔުން އިންސާފުވެރިނުވާނެ،" މޮރީނިއޯ ބުންޏެވެ.
އޭނާ ބުނީ، ފީފާ ވޯލްޑް ކަޕަށް ފަހު ކުޅުންތެރިންނަށް ދޭން ޖެހޭ ބްރޭކް ނިންމާފައި އައިސް ސީޒަން ފެށުމާ މެދު މުއްދަތު ކުރު ވުމުން، އެންމެ ރަނގަޅު ޕްރީ ސީޒަނެއް ކުރިއަށް ނުގެންދެވުނު ކަމަށެވެ. އަދި، ސީޒަން ފަށާފައި ދިގު އިންޓަނޭޝަނަލް ބްރޭކެއް އައިސް އަނެއްކާ ވެސް މަސައްކަތަށް ހުއްޓުމެއް އައި ކަމަށާއި މަޑުމަޑުން މިހާރު ހަމަޔަކަށް އެޅެމުން އަންނަކަން މޮރީނިއޯ ވަނީ ފާހަގަކޮށްފަ އެވެ.
އާދަޔާހިލާފު ފޯމެއްގައި ކުޅެމުން އައި ބާސެލޯނާ އިން ޕީއެސްޖީ އަތުން ބަލިވުމުގެ އަސަރު ކްލަސިކޯ މެޗަށް ކުރާނެ ކަމަށް މޮރީނިއޯ ނުދެކެ އެވެ.
"އަހަރެމެން މި އައީ ރަނގަޅަށް ކުޅެ، ލަނޑު ޖަހައި މެޗުތަކުން މޮޅުވަމުން. އެކަމަކު، އެލް ކްލަސިކޯ މުޅިން ތަފާތު. މި މެޗުގައި ކުރިން ކުރި އެއްވެސް ކަމެއްގެ އަސަރެއް ނުކުރާނެ، ކްލަސިކޯ އަކީ މުޅިން އާ މެޗެއް. އާންމުކަމެއް މުޅި ފުޓްބޯޅަ ދުނިޔެ މި މެޗު ބަލަން ހުއްޓޭނެ. އުންމީދަކީ ރަނގަޅު މެޗަކަށް، އަހަރެމެން މޮޅުވާން،" މޮރީނިއޯ ބުންޏެވެ.
ބާސެލޯނާގެ ވަަކިވަކި ކުުޅުންތެރިންގެ ވާހަކަ ދެއްކުމަކީ މި ވަގުތު އެންމެ ރަނގަޅު ކަމެއް ނޫން ކަމަށާއި އެހެން ނަމަވެސް ލަމީން ޔަމާލަކީ ތަފާތު ކުޅުންތެރިއެއް ކަމަށް އެއްބަސްވާންޖެހޭ ކަމަށް މޮރީނިއޯ ވަނީ ބުނެފަ އެވެ.
ބާސެލޯނާގެ ކޭމްޕް ނޯގައި ކުޅޭ އެލް ކްލަސިކޯ މެޗު ފަށާނީ މިރޭ 1 ޖަހާއިރު އެވެ.
