ޕާކިސްތާނާއެކު އަސްކަރީ ގުޅުން ފުޅާކުރުމަށް ރާއްޖެއަށް ނުރައްކާވާނެ ކަމަށް މޯލްޑިވިއަން ޑިމޮކްރަޓިކް ޕާޓީގެ ޗެއާޕާސަން، ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ނަޝީދު އެކްސް ގައި ވިދާޅުވީ ޕާކިސްތާނާއެކު މިލިޓަރީ ގުޅުން ފުޅާކުރުމަކީ އެކަމާ އިންޑިއާ އިން ކަންބޮޑުވެ، ރާއްޖެއަށް ނުރައްކާވާނެ ކަމެއް ކަމަށެވެ. އެގޮތުން ވާދަވެރި ގައުމުތަކުގެ ދެބަސްވުންތަކުގެ ތެރެއަށް ރާއްޖެއިން ވަދެގެން ނުވާނެ ކަމަށް އެމަނިކުފާނު ވިދާޅުވި އެވެ.
ރައީސް މުހައްމަދު މުއިއްޒުގެ ސިޔާސަތުތަކާއި އަމަލުކުރައްވާ ގޮތުގެ ސަބަބުން ރާއްޖޭގެ ސަލާމަތާއި ރައްކާތެރިކަން ގެއްލެމުންދާ ކަމަށްވެސް ނަޝީދު ވިދާޅުވި އެވެ.
"ރައީސް ޑރ. މުއިއްޒުގެ ސިޔާސަތުތަކުގެ ސަބަބުން ރާއްޖޭގެ ސަލާމަތާއި ރައްކާތެރިކަން މިދަނީ ގެއްލެމުން. ވާދަވެރި ގައުމުތަކުގެ ދެބަސްވުންތަކުގެ ތެރެއަށް ރާއްޖެ ވަދެގެން ނުވާނެ. ޕާކިސްތާނާއެކު މިލިޓަރީ ގުޅުންތައް ފުޅާކުރުމަކީ އިންޑިއާގެ ކަންބޮޑުވުން އިތުރުވާނެ ކަމެއް. ރާއްޖެއަށް ނުރައްކާވާނެ ކަމެއް،" އެމަނިކުފާނު ވިދާޅުވި އެވެ.
މުއިއްޒު ޕާކިސްތާނަށް ކުރައްވާ ދަތުރުގެ ތެރެއިން އެ ގައުމާއެކު މިލިޓަރީ އެމްއޯޔޫތައް ހިމެނޭގޮތަށް ޖުމްލަ 20 އެމްއޯޔޫއެއްގައި ސޮއިކުރި އެވެ. އެ އެމްއޯޔޫތައް އެގްރީމަންޓްތަކަށް ބަދަލުކުރުމަށް ޕާކިސްތާނުގެ ބޮޑުވަޒީރު ޝެހްބާޒް ޝަރީފް އިއްޔެ ބާރު އެޅުއްވި އެވެ.
މުއިއްޒު ވިދާޅުވީ ޝެހެބާޒްއާއެކު ބޭއްވުނު މަޝްވަރާތަކަކީ ވަރަށް ފުޅާ ދާއިރާއެއްގައި ކުރިއަށްދިޔަ، ނަތީޖާ ނެރެވޭނެ ފަދަ މަޝްވަރާތަކެއް ކަމަށެވެ. އެގޮތުން އެ މަޝްވަރާތައް ނިމިގެންދިޔައިރު، ރާއްޖެއާއި ޕާކިސްތާނުގެ ގުޅުން އާ އުސްމިންތަކަކަށް ގެންދިއުމަށް ދެ ގައުމުގެ މެދުގައި އޮތް ސާފު އަޒުމާއި އެއްގޮތް ވިސްނުންތައް ހާމަވެގެން ގޮސްފައިވާ ކަމަށް އެމަނިކުފާނު ވިދާޅުވި އެވެ.
މުއިއްޒު ވެރިކަމަށް އައީ "އިންޑިއާ އައުޓް" އެޖެންޑާއަކާއެކު އެވެ. އިންޑިއާއާ ދުރަށް ޖެހުމުގެ މަގުޗާޓެއް ވެސް ވެރިކަމަށް ވަޑައިގަތުމަށްފަހު އެމަނިކުފާނު އިއުލާނު ކުރެއްވި އެވެ. ނަމަވެސް މާލީ ގޮތުން ދަތިވުމުން މުއިއްޒު ވަނީ އިންޑިއާއާއެކު އޮތް ގުޅުން ރަނގަޅު ކުރަން މަސައްކަތް ކުރައްވާފަ އެވެ.
އޭގެ ފަހުން އޮކްޓޯބަރު، 2024، ގައި މުއިއްޒު އިންޑިއާއަށް ވަޑައިގެން ބޮޑުވަޒީރު މޯދީއާ ބައްދަލު ކުރެއްވި އެވެ. އަދި ރާއްޖެ އާއި އިންޑިއާގެ ގުޅުން ކުރިއަށްގެންދާނެ ގޮތުގެ އެއްބަސްވުމެއްގައި ދެ ގައުމުން ސޮއި ކުރި އެވެ.
ޕާކިސްތާނަށް މުއިއްޒު ވަޑައިގަތީ، އިންޑިއާ ސަރުކާރުން ވަނީ ރާއްޖެއިން ދައްކަންޖެހޭ 30 ބިލިއަން ރުޕީސްގެ ކަރަންސީ ސްވޮޕެއް ރޯލްއޯވާ ކޮށްދިންތާ މާ ގިނަދުވަސްތަކެއް ނުވަނީސް އެވެ. އެއީ އިންޑިއާ އަތުން ކުރިން ނެގި ކަރަންސީ ސްވޮޕު ދެއްކި ދުވަހު ދިން ސްވޮޕެކެވެ.
